ഇന്ത്യ ഫ്രാന്‍സില്‍ നിന്നും എത്തിക്കുന്ന 36 റഫാല്‍ യുദ്ധവിമാനങ്ങളുടെ ആദ്യ ബാച്ച് ഇന്ന് രാജ്യത്തെത്തുകയാണ്. അഞ്ച് റഫാല്‍ യുദ്ധവിമാനങ്ങളാണ് ആദ്യ ബാച്ചിലുള്ളത്. ഹരിയാനയിലെ അംബാല വ്യോമതാവളത്തിലെത്തുന്ന വിമാനങ്ങള്‍ ഇന്ത്യന്‍ വ്യോമസേനയുടെ ഭാഗമാകുന്നതോടെ സേനയുടെ നിര്‍ണ്ണായക ഭാഗമായി ഇവ മാറുമെന്നതില്‍ യാതൊരു സംശയവുമില്ല. . കാറ്റിന്റെ പ്രവാഹം എന്നാണ് റഫാല്‍ എന്ന വാക്കിന്റെ അര്‍ഥം. നിരവധി ആയുധങ്ങള്‍ക്കൊപ്പം ഇന്ത്യ ആവശ്യപ്പെട്ട മാറ്റങ്ങള്‍ക്കൂടിയുള്‍പ്പെടുത്തിയാണ് ഫ്രാന്‍സ് റഫാല്‍ വിമാനങ്ങള്‍ വ്യോമസേനയ്ക്ക് കൈമാറുന്നത്. ഫ്രഞ്ച് കമ്പനിയായ ഡാസോ ഏവിയേഷനാണ് നിര്‍മാതാക്കള്‍. 17ാം നമ്പര്‍ സ്‌ക്വാഡ്രന്‍ ഗോള്‍ഡന്‍ ആരോസാണ് റഫാലിനായി അംബാലയില്‍ സജ്ജമാക്കുന്നത്. മിസൈലുകള്‍ ഉള്‍പ്പെടെ ഘടിപ്പിച്ച് ഓഗസ്റ്റ് രണ്ടാം പകുതിയോടെ പ്രവര്‍ത്തനക്ഷമമാകും

2016 ലാണ് 36 റഫാല്‍ വിമാനങ്ങള്‍ക്കായി ഇന്ത്യ- ഫ്രാന്‍സ് സര്‍ക്കാരുകള്‍ തമ്മില്‍ കരാര്‍ ഒപ്പിടുന്നത്. 60,000 കോടിയോളം രൂപയ്ക്കാണ് വിമാനങ്ങള്‍ വാങ്ങുന്നത്. റഫാല്‍ യുദ്ധവിമനങ്ങളില്‍ ഉണ്ടായിരുന്ന സവിശേഷതകള്‍ക്കും നിരവധി ആയുധള്‍ക്കുമൊപ്പം ഇന്ത്യ ആവശ്യപ്പെട്ട മാറ്റങ്ങള്‍കൂടി പൂര്‍ത്തിയാക്കിയ ശേഷമാണ് ഫ്രാന്‍സ് ഇന്ത്യന്‍ വ്യോമസേനയ്ക്ക് വിമാനങ്ങള്‍ കൈമാറിയത്. റഫാല്‍ യുദ്ധ വിമാനങ്ങളെ 'ഗെയിം ചെയ്ഞ്ചര്‍' എന്നാണ് വ്യോമസേന വിദഗ്ദര്‍ വിശേപ്പിക്കുന്നത്. ചൈനയുടെ ജെ-20 യുദ്ധ വിമാനങ്ങളേക്കാള്‍ കാര്യക്ഷമതയുള്ളതാണ് റഫാലെന്നാണ് റിപ്പോര്‍ട്ടുകള്‍ വ്യക്തമാക്കുന്നത്.പല ദൗത്യങ്ങളും ഒന്നിച്ച് നടത്താവുന്ന മള്‍ട്ടി റോള്‍ കോംപാറ്റ് ഫൈറ്റര്‍. 9.3 ടണ്‍ ആയുധങ്ങള്‍ വഹിക്കാനാകും. ആകാശത്തും കരയിലുമുള്ള ലക്ഷ്യങ്ങളെ തകര്‍ക്കാന്‍ കെല്‍പ്പുള്ള മിസൈലുകള്‍ സജ്ജമാക്കാം. 3,700 കിലോ മീറ്ററാണ് ഓപ്പറേഷണല്‍ റേഞ്ച്. മണിക്കൂറില്‍ 2,222 കിലോ മീറ്ററില്‍ കുതിക്കാം. 60,000 അടി ഉയരം താണ്ടാം.

ഇന്ത്യ ഫ്രാന്‍സില്‍ നിന്നെത്തിക്കുന്ന റഫാല്‍ വിമാനങ്ങളില്‍ 30 എണ്ണമാണ് യുദ്ധവിമാനങ്ങള്‍. മറ്റ് ആറെണ്ണം പരിശീലനങ്ങള്‍ക്കായാണ് ഉപയോഗിക്കുന്നത്. പരിശീലനങ്ങള്‍ക്കായുള്ള റഫാല്‍ ജെറ്റുകള്‍ ട്വിന്‍ സീറ്ററാണെന്നാണ് റിപ്പോര്‍ട്ടുകള്‍ വ്യക്തമാക്കുന്നത്. യുദ്ധവിമാനങ്ങളുടെ എല്ലാ സവിശേഷതകളും ഈ ആറ് വിമാനങ്ങള്‍ക്കും ഉണ്ടാകും. 22 വര്‍ഷങ്ങള്‍ക്ക് ശേഷം വ്യോമസേനയിലേക്ക് ഇറക്കുമതി ചെയ്യുന്ന യുദ്ധവിമാനങ്ങളെന്ന പ്രത്യേകതയുമുണ്ട് റഫാലിന്. റഷ്യന്‍ സുഖോയ്-30 യുദ്ധവിമാനങ്ങളാണ് വ്യോമസേനയിലേക്ക് അവസാനം എത്തിച്ചത്. ആദ്യത്തെ സുഖോയ്-30 വിമാനമെത്തുന്നത് 1997 ജൂണിലായിരുന്നു.

ഒരു വിമാനവാഹിനിക്കപ്പലില്‍ നിന്നും കരയില്‍ നിന്നും പ്രവര്‍ത്തിക്കാന്‍ കഴിയുന്ന ട്വിന്‍ ജെറ്റ് യുദ്ധവിമാനമാണ് റഫാല്‍. വ്യോമ മേധാവിത്വവും വ്യോമ പ്രതിരോധവും റഫാലുകളുടെ പ്രത്യേകതയാണ്. ആഴത്തിലുള്ള ആക്രമണങ്ങള്‍, ആന്റി-ഷിപ്പ് ആക്രമണങ്ങള്‍, ന്യൂക്ലിയര്‍ പ്രതിരോധം എന്നിവ നേടുന്നതിനായി എല്ലാ യുദ്ധവിമാന ദൗത്യങ്ങളും നടത്താന്‍ കഴിയുന്ന ഒരു വൈവിധ്യമാര്‍ന്ന വിമാനമായാണ് നിര്‍മ്മാതാക്കള്‍ റഫാല്‍ യുദ്ധ വിമനാത്തെ വിശേഷിപ്പിക്കുന്നത്.

കാറ്റിന്റെ പ്രവാഹം എന്ന അര്‍ത്ഥമുള്ള റഫാല്‍ പേരിനോട് നീതി പുലര്‍ത്തുന്ന വേഗത പുലര്‍ത്തുന്ന യുദ്ധവിമാനമാണ്. മണിക്കൂറില്‍ 2223 കിലോമീറ്ററാണ് ഇന്ത്യന്‍ വ്യോമസേനയുടെ പുതിയ യുദ്ധ വിമാനത്തിന്റെ പരമാവധി വേഗത. 10 ടണ്‍ ഭാരമുള്ള വിമാനത്തിന് 24,500 കിലോഗ്രാം ഭാരം വരെ വഹിക്കാനുള്ള ശേഷിയുണ്ട്. 10.3 നീളവും 05.0 മീറ്റര്‍ ഉയരവുമുള്ള ചിറകുകളാണ് വിമാനത്തിന്റെ മറ്റൊരു പ്രത്യേകത. ശത്രുവിമാനങ്ങളെ ആക്രമിക്കാനുള്ള മിസൈലുകളുള്‍പ്പെടെയുള്ള ആയുധങ്ങളാണ് യുദ്ധവിമാനത്തിലുള്ളത്.


ബഹുമുഖ യുദ്ധവിമാനമെന്നാണ് റഫാല്‍ ജെറ്റുകള്‍ അറിയപ്പെടുന്നത്. കരയുദ്ധത്തിനും കപ്പലുകളെ ആക്രമിക്കാനും വ്യോമസേനയുടെ ഈ പുതിയ അതിഥിയ്ക്ക് നിഷ്പ്രയാസം കഴിയും. ചെറിയ ആണവായുധങ്ങളും റഫാല്‍ ജെറ്റുകള്‍ വഹിക്കും. ഇന്ത്യക്ക് പ്രത്യേകമായി ഇന്‍ഫ്രാറെഡ് തിരച്ചിലിനുള്ള സജ്ജീകരണം, ട്രാക്കിങ് സംവിധാനം, ലോ ബാന്‍ഡ് ജാമറുകള്‍ തുടങ്ങിയവയും റഫാലില്‍ ഒരുക്കിയിട്ടുണ്ട്.
ഇന്ന് അംബാലയിലെ വ്യോമതാവളത്തിലേക്ക് വിമാനങ്ങളെത്തുന്നതോടെ റഫാലുകള്‍ പറത്താനൊരുങ്ങുന്ന നാലാമത്തെ രാജ്യമായി ഇന്ത്യ മാറും. ഫ്രാന്‍സ്, ഈജിപ്ത്, ഖത്തര്‍ എന്നിവിടങ്ങളിലാണ് നിലവില്‍ റഫാലുകള്‍ ഉള്ളത്. ആദ്യ ബാച്ചിലെ റഫാലുകള്‍ ഉള്‍പ്പെടെ 18 യുദ്ധവിമാനങ്ങള്‍ 2021 ഫെബ്രുവരിയാകുമ്പോഴേക്കും ഇന്ത്യന്‍ എയര്‍ഫോഴ്‌സിലെത്തിച്ചേരും. ബാക്കിയുള്ളവ 2022 ഏപ്രില്‍ മെയ് മാസങ്ങളിലായി രാജ്യത്തെത്തുമെന്നാണ് വിലയിരുത്തപ്പെടുന്നത്.ത്രിതലശേഷിയുള്ള യുദ്ധവിമാനമാണ് റാഫേല്‍. വായുവില്‍ നിന്നും വായുവിലേക്ക്, വായുവില്‍ നിന്ന് കരയിലേക്ക്, എയര്‍ ടു സര്‍ഫെഴ്‌സ് ആക്രമണ ശേഷിയുള്ള യുദ്ധവിമാനമാണ് റാഫേല്‍. പ്രയോഗിക രംഗത്ത് കഴിവ് തെളിയിച്ച വിമാനമാണ് റാഫേല്‍ ലിബിയയിലും സിറിയയിലും ആക്രമണം നടത്താന്‍ ഫ്രാന്‍സ് ഉപയോഗിച്ച റഫാലിന്റെ പ്രവര്‍ത്തനം മികച്ചതായിരുന്നു.