സൗദിയില്‍ യുവരാജാവ് മുഹമ്മദ് ബിന്‍ സല്‍മാനെതിര രാജകുടുംബാംഗങ്ങള്‍. രാജ്യത്ത് നടപ്പാക്കിയ കടുത്ത അച്ചടക്കനടപടികള്‍ നടപ്പാക്കിയതും രാജകുടംബാംഗങ്ങളുടെ അലവന്‍സുകള്‍ കുത്തനെ വെട്ടിക്കുറച്ചതും യാത്രകള്‍ക്ക് നിയന്ത്രണം ഏര്‍പ്പെടുത്തിയതുമാണ് യുവരാജാവിനെതിരെ തിരിയാന്‍ രാജകുടുംബത്തെ പ്രേരിപ്പിച്ചത്.
എണ്ണവില കുത്തനെ ഇടിഞ്ഞതോടെ രാജ്യത്തുണ്ടായ സാമ്പത്തിക ഞെരുക്കത്തെ നിയന്ത്രിക്കാനാണ് ഡപ്യൂട്ടി ക്രൗണ്‍ പ്രിന്‍സ് മുഹമ്മദ് ബിന്‍ സല്‍മാന്‍ കടുത്ത സാമ്പത്തിക അച്ചടക്കം പ്രഖ്യാപിച്ചത്. സൗദി അറേബ്യയുടെ ബജറ്റിനുമേല്‍ കൈവച്ച സല്‍മാന്‍, കരാറുകള്‍ റദ്ദാക്കുകയും ഗവണ്‍മെന്റ് ജീവനക്കാരുടെ ശമ്പളം വെട്ടിക്കുറയ്ക്കുകയും ചെയ്തു.
എന്നാല്‍, സാമ്പത്തിക അച്ചടക്കം പ്രഖ്യാപിച്ച രാജകുമാരന്‍ ഫ്രാന്‍സിലെ വിശ്രമ കേന്ദ്രത്തിലൊരു യാട്ടില്‍ അടിച്ച് പൊളിക്കുന്നതിന്റെ ദൃശ്യങ്ങളും മാത്രമല്ല സെറീന്‍ എന്ന യാട്ട് രാജകുമാരന്‍ 55 കോടി ഡോളര്‍ മുടക്കി മണിക്കൂറുകള്‍ക്കകം സ്വന്തമാക്കകുയും ചെയ്തു. 
സൗദി അറേബ്യയുടെ എല്ലാ നയങ്ങളിലും സല്‍മാന്റെ തീരുമാനങ്ങള്‍ ഉണ്ട്. യെമനിലെ സൈനികാധിനിവേശമുള്‍പ്പെടെ എല്ലാ കാര്യങ്ങളും തീരുമാനിച്ചത് സല്‍മാനാണ്. യുദ്ധം സൗദിയുടെ ഖജനാവില്‍നിന്ന് കോടിക്കണക്കിന് ഡോളറാണ് ചോര്‍ത്തിയത്. ഒപ്പം അന്താരാഷ്ട്ര സമൂഹത്തില്‍നിന്നുള്ള വിമര്‍ശനം വേറെയും. സൗദി രാജകുടുംബത്തിലെ എല്ലാ കീഴ്‌വഴക്കങ്ങളെയും അട്ടിമറിച്ചുകൊണ്ടായിരുന്നു സല്‍മാന്റെ ഉയര്‍ച്ച. കിരീടാവകാശത്തില്‍ രണ്ടാം നിരയിലുള്ള സല്‍മാന്‍, തനിക്ക് മുന്നിലുള്ളവരെ മറികടന്നാണ് അധികാരത്തില്‍ പിടിമുറുക്കിയത്. സീനിയോറിറ്റിക്ക് പരമപ്രാധാന്യം കല്‍പിച്ചിരുന്ന സൗദി രാജകുടുംബത്തില്‍, ആദ്യമായി ഡപ്യൂട്ടി ക്രൗണ്‍ പ്രിന്‍സ് അധികാരത്തിന്റെ ചുക്കാന്‍ കൈയിലെടുത്തു. ഇതോടെയാണ് രാജകുടുംബത്തിലെ പലര്‍ക്കും എതിര്‍പ്പ് തുടങ്ങിയത്.
അടുത്ത രാജാവാകാനുള്ള തയ്യാറെടുപ്പുകളാണ് സല്‍മാന്‍ നടത്തുന്നതെന്ന വാദം ഇതോടെ ശക്തമായി. 57കാരനായ മുഹമ്മദ് ബിന്‍ നയേഫാണ് ഇപ്പോഴത്തെ കിരീടാവകാശി. നയേഫിനെ മറികടന്ന് സല്‍മാന്‍ ഭരണാധികാരിയാകാന്‍ ശ്രമിക്കുകയാണെന്ന് ഏവരും കരുതി. മാത്രമല്ല, ഇപ്പോഴത്തെ പ്രായത്തില്‍ സല്‍മാന്‍ അധികാരമേല്‍ക്കുകയാണെങ്കില്‍, 31കാരനായ അദ്ദേഹം ദശാബ്ദങ്ങളോളം സൗദി ഭരിക്കുന്ന സാഹചര്യവുമുണ്ടാകുമായിരുന്നു. രാജകുമാരനെതിരെ രാജകുടുംബത്തില്‍ നിന്ന് തന്നെ വധശ്രമമുണ്ടായേക്കാമെന്ന റിപ്പോര്‍ട്ടുകളും പുറത്ത് വരുന്നുണ്ട്.