ബലൂചിസ്താന്റെ തലസാഥാനമായ ക്വെറ്റയിലെ പൊലീസ് അക്കാദമിയിലുണ്ടായ ഭീകരാക്രമണത്തില്‍ 57 പേര്‍ കൊല്ലപ്പെട്ടു. നൂറിലേറെ പേര്‍ക്ക് പരിക്കേറ്റിട്ടുണ്ട്. ക്വെറ്റയില്‍ നിന്ന് 20 കിലോമീറ്റര്‍ കിഴക്ക് മാറി സ്ഥിതി ചെയ്യുന്ന ബലൂചിസ്താന്‍ പൊലീസ് കോളേജില്‍ ഇന്നലെ രാത്രി 11:10-ഓടെയാണ് ഭീകരാക്രമണമുണ്ടായതെന്ന് സൈനിക വൃത്തങ്ങള്‍ അറിയിച്ചു. പോലീസ് ട്രെയിനിങ് അക്കാദമിയിലേക്ക് അതിക്രമിച്ച് കയറിയ ഭീകരര്‍ തലങ്ങും വിലങ്ങും വെടിയുതിര്‍ക്കുകയായിരുന്നു. ഭീകരാക്രമണം നടക്കുന്ന സമയത്ത് ഏകദേശം 700 ട്രെയിനികള്‍ അക്കാദമിയിലുണ്ടായിരുന്നു.

മരണസംഖ്യ ഇനിയും ഉയര്‍ന്നേക്കാമെന്നാണ് റിപ്പോര്‍ട്ടുകള്‍. അതേസമയം ആക്രമണത്തിന്റെ ഉത്തരവാദിത്തം ആരും ഏറ്റെടുത്തിട്ടില്ല. മൂന്ന് ഭീകരരാണ് തോക്ക് ഉപയോഗിച്ച് ആക്രമണം നടത്തിയത്. മണിക്കൂറുകള്‍ നീണ്ട സൈനിക നടപടിയിലൂടെ മൂന്ന് ഭീകരരേയും വധിച്ചിട്ടുണ്ട്. ശരീരത്തില്‍ ബോംബ് ധരിച്ച ചാവേറുകളാണ് ഇവരെന്നാണ് സൈന്യം പറയുന്നത്. ഈ ബോംബുകള്‍ സ്വയം പൊട്ടിച്ചപ്പോഴാണ് രണ്ട് ഭീകരര്‍ കൊല്ലപ്പെട്ടത്. മൂന്നാമത്തെ ഭീകരനെ സുരക്ഷാ സേന വെടിവെച്ച് കൊല്ലുകയായിരുന്നു.

സൈന്യം എത്തിയ ശേഷം നൂറുകണക്കിന് പൊലീസ് ട്രയിനികളെ കോളേജില്‍ നിന്ന് ഒഴിപ്പിച്ചിട്ടുണ്ട്. ആക്രമണത്തെ തുടര്‍ന്ന് ക്വെറ്റയിലെ എല്ലാ സര്‍ക്കാര്‍ ആശുപത്രികളിലും അടിയന്തിരാവസ്ഥ പ്രഖ്യാപിച്ചു. പാക് താലിബാനാണ് ആക്രമണത്തിന് പിന്നില്‍ എന്നാണ് സൈനികോദ്യോഗസ്ഥര്‍ പറയുന്നത്. കൊല്ലപ്പെട്ടവരും പരുക്കേറ്റവരും പൊലീസ് കോളേജിലെ ട്രയിനികളാണ്.

വാച്ച് ടവറിലെ സെന്‍ട്രിയെ വെടിവെച്ച് കൊന്ന ശേഷമാണ് ഭീകരര്‍ പൊലീസ് അക്കാദമി മൈതാനത്തേക്ക് പ്രവേശിച്ചത് എന്ന് ബലൂചിസ്താന്‍ ആഭ്യന്തരമന്ത്രി സര്‍ഫറാസ് ബഗ്തി പറഞ്ഞു. പാകിസ്താനില്‍ ഈ വര്‍ഷം ഉണ്ടാകുന്ന മൂന്നാമത്തെ വലിയ ആക്രമണമാണ് ഇത് എന്നും അദ്ദേഹം പറഞ്ഞു. എകെ-47 തോക്കുകളും ഗ്രനേഡുകളും ഉപയോഗിച്ചാണ് ഭീകരര്‍ ആക്രമണം നടത്തിയത്. പ്രദേശത്ത് നിരീക്ഷണത്തിനായി രണ്ട് സൈനിക ഹെലികോപ്റ്ററുകള്‍ എത്തിയിട്ടുണ്ട്. ഇന്നലെ പകല്‍ ദക്ഷിണ ക്വെറ്റയിലെ സുറാബില്‍ രണ്ട് കസ്റ്റംസ് ഉദ്യോഗസ്ഥര്‍ കൊല്ലപ്പെടുകയും ഒരുദ്യോഗസ്ഥന് ഗുരുതരമായി പരുക്കേല്‍ക്കുകയും ചെയ്തിരുന്നു. 
ഇന്ത്യ, അഫ്ഗാനിസ്ഥാന്‍ തുടങ്ങിയ വിവിധ രാജ്യങ്ങളില്‍ ഭീകരാക്രമണം നടത്തുന്ന തീവ്രവാദിക്ള്‍ലെ സംരക്ഷിക്കുന്ന പാകിസ്താന് ഭീകാരാവാദികളില്‍ നിന്ന് തന്നെ തിരിച്ചടി നേരിടുന്ന അവസ്ഥയാണ് നിലവിലുള്ളത്. തുടരെ ഇന്ത്യന്‍ അതിര്‍ത്തികള്‍ വഴി നുഴഞ്ഞു കയറ്റവും, ഭീകരവാദ പ്രവര്‍ത്തനങ്ങള്‍ നടത്തുകയും ചെയ്യുന്ന പാകിസ്ഥാന്‍ നേരിടുന്ന വെല്ലിവിളിയായി മാറുകയാണ് തീവ്രവാദികള്‍ തന്നെ ആക്രമണം നടത്തുന്നത്തിലൂടെ.