ബഹുനില കെട്ടിടത്തിലെ തീപിടിത്തം അണയ്ക്കുന്നതിനിടെ കെട്ടിടം തകര്‍ന്ന് 20 അഗ്‌നിശമന സേനാംഗങ്ങള്‍ കൊല്ലപ്പെട്ടു. ഇറാന്‍ തലസ്ഥാനമായ ടെഹ്‌റാനിലാണ് സംഭവം നടന്നത്.

തലസ്ഥാന നഗരിയിലെ ബഹുനില വ്യാവസായിക കെട്ടിടത്തിലാണ് തീപിടിത്തമുണ്ടായതെന്ന് ടെഹ്‌റാന്‍ മേജര്‍ അറിയിച്ചു. തീയണയ്ക്കുന്നതിനിടെ കെട്ടിടം തകര്‍ന്നുവീഴുകയായിരുന്നു. കെട്ടിടത്തിന്റെ ഏറ്റവും താഴത്തെ നിലയില്‍ തീയണയ്ക്കാന്‍ പരിശ്രമിച്ചിരുന്ന അഗ്‌നിശമന സേനാംഗങ്ങളാണ് മരിച്ചവരില്‍ ഭൂരിഭാഗവും.

20 പേര്‍ കൊല്ലപ്പെട്ടതായാണ് ഔദ്യോഗിക കണക്കെങ്കിലും മരണസംഖ്യ അതിലും അധികമാണെന്ന് പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്യുന്നു. കെട്ടിടം തകര്‍ന്നു വീഴുന്നത് ടിവി ചാനലുകളില്‍ തത്സമയം സംപ്രേക്ഷണം ചെയ്തിരുന്നു.

കെട്ടിടം തകര്‍ന്നും തീപിടിത്തത്തിലുമായി 200ല്‍ അധികം ആളുകള്‍ക്കു പരിക്കേറ്റതായാണ് സൂചന. ഹെലികോപ്റ്ററുകള്‍ അടക്കമുള്ള സന്നാഹങ്ങള്‍ ഉപയോഗിച്ച് രക്ഷാപ്രവര്‍ത്തനം പുരോഗമിക്കുകയാണ്.