കറാച്ചിയില്‍ നിന്നു മദീനയിലേക്ക് പറന്ന പാക്കിസ്ഥാന്‍ ഇന്റര്‍നാഷനല്‍ എയര്‍ലൈന്‍സ് വിമാനത്തില്‍ ഗുരുതര സുരക്ഷാ വീഴ്ചയുണ്ടായെന്ന് റിപ്പോര്‍ട്ട്. മൂന്നു മണിക്കൂറില്‍ കൂടുതല്‍ സമയമുള്ള യാത്രയില്‍ ഏഴു പേര്‍ നിന്നാണ് യാത്ര ചെയ്തതെന്ന് പാക്ക് മാധ്യമം ദ് ഡോണ്‍ റിപ്പോര്‍ട്ട് ചെയ്തു. ജനുവരി 20ന് കറാച്ചി-മദീന റൂട്ടില്‍ പറന്ന പികെ-743 എന്ന വിമാനത്തിലാണ് സുരക്ഷാ വീഴ്ചയുണ്ടായത്. സംഭവത്തില്‍ അന്വേഷണം പ്രഖ്യാപിച്ചു കഴിഞ്ഞു. ജീവനക്കാര്‍ ഉള്‍പ്പെടെ 409 യാത്രക്കാര്‍ക്കുള്ള സീറ്റാണ് വിമാനത്തിലുള്ളത്.

എന്നാല്‍, സംഭവദിവസം 416 മദീനയിലേക്ക് യാത്ര ചെയ്തുവെന്നാണ് കണ്ടെത്തല്‍. അധികമായി വിമാനത്തില്‍ പ്രവേശിച്ച ഏഴ് യാത്രക്കാര്‍ക്കും കയ്യെഴുത്തിലുള്ള ബോര്‍ഡിങ് പാസുകളാണ് നല്‍കിയതത്രേ. സീറ്റില്ലാതെ യാത്ര ചെയ്തവര്‍ക്ക് യാതൊരു സുരക്ഷാ മുന്‍കരുതലും ഉണ്ടായിരുന്നില്ല. അടിയന്തരസാഹചര്യങ്ങളില്‍ ലഭ്യമാകേണ്ട ഓക്‌സിജന്‍ മാസ്‌കുകളോ മറ്റു സുരക്ഷാ സംവിധാനങ്ങളോ ഉണ്ടായിരുന്നില്ല. ഗുരുതരമായ സുരക്ഷാ വീഴ്ച വരുത്തിയ വിമാന ജീവനക്കാര്‍ക്കെതിരെ ഇതുവരെ നടപടിയൊന്നും എടുത്തിട്ടില്ലെന്നാണ് റിപ്പോര്‍ട്ട്. വിമാന ജീവനക്കാരികളില്‍ ഒരാള്‍ ആളുകളുടെ എണ്ണം കൂടുതലാണെന്ന കാര്യം പൈലറ്റിന്റെ ശ്രദ്ധയില്‍പ്പെടുത്തിയെങ്കിലും വിമാനം തല്‍ക്കാലം യാത്രക്കാരോട് സഹകരിച്ച് ഇരിക്കാനായിരുന്നു പൈലറ്റിന്റെ മറുപടി.

വിമാനം ടേക്ക് ഓഫ് ചെയ്തു കഴിഞ്ഞതിനുശേഷമായിരുന്നു വിമാന ജീവനക്കാരി ഇക്കാര്യം പറഞ്ഞത് എന്നാണ് പൈലറ്റിന്റെ വിശദീകരണം. വിമാനത്തിന്റെ പ്രധാന വാതില്‍ അടയ്ക്കുന്നതിന് മുന്‍പ് ജീവനക്കാര്‍ ഇക്കാര്യം പറഞ്ഞിരുന്നില്ല. പിന്നീട് ഉണ്ടായിരുന്ന ഏക മാര്‍ഗം വിമാനം തിരികെ കറാച്ചിയില്‍ ഇറക്കുക എന്നതായിരുന്നു. പക്ഷേ, അതിന് ഒരുപാട് ഇന്ധനം ആവശ്യമാണെന്നും ക്യാപ്റ്റന്‍ അന്‍വര്‍ ആദില്‍ പറഞ്ഞു.