20 പൗണ്ടിന്റെ ഒരു നോട്ട് കളഞ്ഞു കിട്ടിയപ്പോള്‍ ആ യുവതി കരുതിയത് ഇന്നത്തെ കണി കൊള്ളാമല്ലോ എന്നാണ്. എന്നാല്‍ തന്റെ ജീവിതത്തെ ദുരിത പൂര്‍ണ്ണമാക്കി തീര്‍ക്കാനുള്ള അസുരവിത്താണ് ആ 20 പൗണ്ടിന്റെ നോട്ടെന്ന് പിന്നീടാണ് അവള്‍ക്ക് മനസ്സിലായത്.

ഇംഗ്ലണ്ടിലെ സ്റ്റോഫോര്‍ഡ്ഷയറിലുള്ള ബ്ലര്‍ട്ടന്‍ എന്ന സ്ഥലത്തുള്ള ഒരു സൂപ്പര്‍മാര്‍ക്കറ്റാണ് വണ്‍സ്റ്റോപ്പ് സ്റ്റോര്‍. നിക്കോള ബെയ്‌ലി എന്ന 23 കാരി അന്ന് അവിടെ ഷോപ്പിംഗിനായാണ് എത്തിയത്.

സൂപ്പര്‍ മാര്‍ക്കറ്റിനുള്ളിലൂടെ നടക്കവേയാണ് ഇരുപതു പൗണ്ടിന്റെ ( ഏകദേശം 200 ഇന്ത്യന്‍ രൂപയ്ക്കു തുല്യമായ തുക) ഒരു കറന്‍സി നോട്ട് താഴെ കിടക്കുന്നത് കണ്ടത്. അടുത്തെങ്ങും മറ്റാരും ഉണ്ടായിരുന്നില്ല. തന്മൂലം തനിക്കു വീണു കിട്ടിയ ഭാഗ്യമാണെന്നു കരുതി അവള്‍ അത് എടുത്ത് കടന്നു പോയി. പിന്നീട് അതേ കുറിച്ച് അവള്‍ മറന്നും പോയി.

ഒരു മൂന്നു മാസം കഴിഞ്ഞപ്പോള്‍ ഇക്കഴിഞ്ഞ നവംബറില്‍ അവളുടെ അമ്മയുടെ മേല്‍വിലാസത്തിലുള്ള വീട്ടിലേയ്ക്ക് രണ്ടു പോലീസുകാരെത്തി അവളെ കുറിച്ച് അന്വേഷണങ്ങള്‍ നടത്തി. പോലീസ് സ്റ്റേഷനുമായി ബന്ധപ്പെടുവാന്‍ നിക്കോളയോട് ആവശ്യപ്പെടണമെന്ന് അറിയിച്ചിട്ടാണ് അന്ന് പോലീസുകാര്‍ പോയത്.

അന്ന്, എന്തിനാണ് താന്‍ പോലീസ് സ്റ്റേഷനുമായി ബന്ധപ്പെടാന്‍ ആവശ്യപ്പെട്ടതെന്നറിയാനുള്ള കൗതുകത്തോടെയാണ് അവള്‍ പോലീസ് സ്റ്റേഷനിലെത്തിയത്. അതു കൊണ്ടു തന്നെ ഏതെങ്കിലും വക്കീലിനെ ഒപ്പം കൂട്ടുകയോ, നിയമ സഹായം തേടുകയോ ഒന്നും ചെയ്തിട്ടുണ്ടായിരുന്നില്ല. അന്ന് മറ്റാരുടെയെങ്കിലും പണം കൈവശപ്പെടുത്തിയിട്ടുണ്ടോ എന്ന് ചോദിച്ചപ്പോള്‍ താന്‍ ആരുടേയും കാശ് കട്ടെടുത്തിട്ടില്ല എന്നാണ് മറുപടി പറഞ്ഞത്. അന്ന് പോകാനനുവദിച്ചെങ്കിലും വീണ്ടും സ്റ്റേഷനിലെത്താന്‍ പിന്നീട് ആവശ്യപ്പെട്ടു. അന്നും നിയമ പരിരക്ഷയൊന്നുമില്ലാതെയാണ് സ്റ്റേഷനിലെത്തിയത്. താന്‍ തെറ്റെന്തെങ്കിലും ചെയ്തതായി ഓര്‍ക്കാത്തതിനാല്‍ എന്തിനാണ് തന്നെ വിളിപ്പിക്കുന്നതെന്നറിയാനുള്ള കൗതുകമാണ് അന്നും ഉണ്ടായിരുന്നത്. അന്നാണ് സൂപ്പര്‍മാര്‍ക്കറ്റില്‍ നിന്നുള്ള സിസിടിവി ദൃശ്യങ്ങള്‍ തന്നെ കാണിച്ചത്. ആ ദൃശ്യത്തിലുള്ളത് താനാണെന്ന് അവള്‍ സമ്മതിക്കുകയും ചെയ്തു.

ആ ക്യാമറയില്‍ പതിഞ്ഞ ദൃശ്യങ്ങള്‍ മുഴുവന്‍ സൂപ്പര്‍മാര്‍ക്കറ്റുകാരുടെ കൈയ്യിലുളളതിനാല്‍ ആ കറന്‍സി അവള്‍ എടുക്കുമ്പോള്‍ അടുത്തെങ്ങും ആരും ഇല്ലെങ്കിലും അതിനു മുമ്പ് ക്യാമറയില്‍ പതിഞ്ഞ ദൃശ്യത്തില്‍ മറ്റൊരു കസ്റ്റമറുടെ പക്കല്‍ നിന്നും ആ നോട്ട് താഴെ വീഴുന്നതായി ദൃശ്യങ്ങളില്‍ കാണുന്നുണ്ട്. അതു കൊണ്ടു തന്നെ ആ നോട്ട് നിക്കോളയുടേതല്ല എന്ന് പെട്ടെന്ന് മനസ്സിലാക്കാന്‍ കഴിയും.

ഓഗസ്റ്റിലാണ് സംഭവം നടന്നത്. പോലീസ് സ്റ്റേഷനിലേയ്ക്ക് വിളിപ്പിച്ചത് നവംബറിലും. അതു കഴിഞ്ഞ് രണ്ടു മാസം കൂടി കഴിഞ്ഞ് ജനുവരിയില്‍ അവള്‍ക്കൊരു കോടതി നോട്ടീസ് കിട്ടി. പ്രസ്തുത കുറ്റത്തിന് കോടതിയില്‍ ഹാജരാകണമെന്നായിരുന്നു നിര്‍ദ്ദേശിച്ചിരുന്നത്. അപ്പോള്‍ മാത്രമാണ് താനൊരു കേസില്‍ പ്രതിയാണെന്നും നിയമസഹായം തേടേണ്ടതുണ്ടെന്നും അവള്‍ക്കു മനസ്സിലായത്.

ഒരു വക്കീലുമായി സംസാരിച്ചപ്പോഴാണ് തന്റെ ഭാഗത്തെ തെറ്റ് എന്താണെന്ന് മനസ്സിലായതെന്നാണ് നിക്കോള പറയുന്നത്. ആ കറന്‍സി നോട്ട് തന്റേതല്ലെന്ന് അറിയാമായിരുന്നിട്ടും ആരുടെയെങ്കിലും കൈയ്യില്‍ നിന്നും പണം നഷ്ടപ്പെട്ടിട്ടുണ്ടോ എന്ന് ഒന്നന്വേഷിക്കാന്‍ പോലും ശ്രമിക്കാതെ ആ പണം സ്വന്തമാക്കിയതിനാലാണ് അവളില്‍ മോഷണക്കുറ്റം ആരോപിക്കുന്നതത്രേ.

നിക്കോളയുടെ കേസിന്റെ വിവരങ്ങള്‍ പുറത്തു വന്നതോടെ എല്ലാവരും അവളോട് സഹതപിക്കുകയാണ്. തങ്ങള്‍ ആയിരുന്നാലും ആ സ്ഥിതിയില്‍ അത്രയേ ചെയ്യുമായിരുന്നുള്ളൂ എന്നാണ് ആളുകള്‍ പറയുന്നത്. ഇത്രയധികം മാധ്യമ ശ്രദ്ധ കിട്ടിയതോടെ അവളുടെ ജോലിയ്ക്കു തന്നെ പ്രശ്‌നമായി തുടങ്ങിയിട്ടുണ്ടത്രേ. ഒരു 'കള്ളിയെ' തന്റെ സ്ഥാപനത്തില്‍ ജോലിയില്‍ നിലനിര്‍ത്തണമോ എന്നാണ് സ്ഥാപനമുടമ ചിന്തിക്കുന്നതത്രേ.കാലങ്ങളേയും സമയങ്ങളേയും തിരിച്ചു കറക്കാനുള്ള ശേഷി തനിക്കുണ്ടായിരുന്നെങ്കില്‍ ആ ദിവസത്തെ മറ്റൊരു രീതിയിലാക്കിയേനെ എന്നാണ് നിക്കോള പറയുന്നത്.

പണ്ടൊക്കെ നമ്മുടെ നാട്ടില്‍ വേലുത്തമ്പി, ദളവാ സ്ഥാനത്തുണ്ടായിരുന്നപ്പോള്‍ ഇപ്രകാരം പൊതുനിരത്തില്‍ സ്വര്‍ണ്ണ നാണയം കിടക്കുന്നതു കണ്ടാല്‍ പോലും ആരും അത് എടുക്കാറില്ലായിരുന്നത്രേ. മറ്റാരുടെയെങ്കിലും കാശ് അവകാശമില്ലാതെ ആരെങ്കിലും എടുത്താല്‍ എടുത്തവന്റെ കൈ വെട്ടിക്കളയുമായിരുന്നു വേലുത്തമ്പി ദളവ. അല്ലെങ്കില്‍ എണ്ണ തിളപ്പിച്ചു ആ കൈ അതില്‍ മുക്കിക്കുമായിരുന്നു അതു പേടിച്ച് എല്ലാവരും 'എക്‌സ്ട്രാ സത്യസന്ധത' യോടെയാണ് അന്ന് ജീവിച്ചിരുന്നത്. ഇതാ ഇംഗ്ലണ്ടിലെ നിയമത്തിലും ഒരു ദളവാച്ചുവ അനുഭവപ്പെടുന്നു!