ഉക്രെയിന്‍കാരിയായ ഐറിനയും സൗത്ത് ആഫ്രിക്കക്കാരനായ എംലിന്‍ കള്‍വര്‍വെല്ലും പ്രണയബദ്ധരായിട്ട് നാളുകളേറെയായി. അവരൊന്നിച്ചു താമസിക്കുന്ന വിവരം ഇരുവരുടെയും വീട്ടുകാര്‍ക്കുമറിയാം. അങ്ങനെയിരിക്കെയാണ് ഇരുവരും തങ്ങളുടെ അവധിക്കാലം ചെലവഴിക്കാന്‍ അബുദാബിയിലേയ്ക്കു പോകാമെന്ന് തീരുമാനിച്ചത്.

27-കാരിയായ ഐറിനയും 29-കാരനായ എംലിന്‍ കള്‍വര്‍വെല്ലും അബുദാബിയിലെത്തി ഉല്ലാസത്തിമിര്‍പ്പിലായിരുന്നു. അപ്പോഴാണ് ഐറിനയ്ക്ക് കഠിനമായ വയറുവേദന അനുഭവപ്പെട്ടത്. ഒട്ടും വൈകിക്കാതെ എംലിന്‍ അവളെ അടുത്തുള്ള ഡോക്ടറുടെ അടുക്കലെത്തിച്ചു. അവളെ പരിശോധിച്ച ഡോക്ടര്‍ പറഞ്ഞപ്പോഴാണ് അവരിരുവരും അറിഞ്ഞത് ഐറിന ഗര്‍ഭിണി ആണെന്ന്. വിവരമറിഞ്ഞപ്പോള്‍ ഇരുവര്‍ക്കും വലിയ സന്തോഷമായി.എന്നാല്‍ അവരുടെ സന്തോഷത്തിന് വലിയ ആയുസ്സുണ്ടായില്ല. അവരുടെ ജീവിതത്തിലെ ആ ഏറ്റവും വലിയ സന്തോഷം അവര്‍ മറക്കാനാഗ്രഹിക്കുന്ന ഏറ്റവും വലിയ അനുഭവമായി പെട്ടെന്നു മാറി.

അബുദാബിയിലെ ആ ഡോക്ടര്‍ പെട്ടെന്നു തന്നെ അധികൃതരെ വിവരമറിയിക്കുകയാണ് ചെയ്തത്. തന്റെ അടുത്ത് മെഡിക്കല്‍ സഹായം തേടിയെത്തിയ ദമ്പതികളിലെ യുവതി ഗര്‍ഭിണി ആണെന്നും എന്നാല്‍ അവള്‍ വിവാഹിതയല്ലെന്നുമുള്ള വിവരം അവര്‍ അധികൃതരെ അറിയിക്കുകയാണുണ്ടായത്. കേസ് ഉടനെ തന്നെ പോലീസിനു കൈമാറുകയാണുണ്ടായത്. പോലീസെത്തി ദമ്പതികളെ അറസ്റ്റു ചെയ്തു. അബുദാബി ഉള്‍പ്പെടുന്ന യുണൈറ്റഡ് അറബ് എമിറേറ്റ്‌സില്‍ വിവാഹത്തിനു മുമ്പ് ലൈംഗിക ബന്ധത്തിലേര്‍പ്പെടുന്നത് ക്രിമിനല്‍ കുറ്റമാണ് തന്മൂലമാണ് അവരെ അറസ്റ്റു ചെയ്തത്.
്
ഇരുവരുടെയും സ്വന്ത ദേശത്തുള്ള കുടുംബാംഗങ്ങള്‍ ആകെ ആശങ്കയിലാണ്. ഇനി എന്താണ് സംഭവിക്കുക എന്ന് ഉത്ക്കണ്ഠയോടെ കാത്തിരിക്കുകയാണ് അവര്‍. അബുദാബിയിലുള്ള അധികൃതരുടെ പല ഫോണ്‍ നമ്പരിലും നാട്ടില്‍ നിന്നും എംലിന്റെ അമ്മ വിളിച്ചു നോക്കിയെങ്കിലും വ്യക്തമായ ഒരു ഉത്തരം അവര്‍ക്കു ലഭിക്കുന്നില്ലെന്ന് അവര്‍ പരാതി പറഞ്ഞു. ദമ്പതികളെ പ്രതിനിധീകരിക്കാന്‍ വക്കീലിനെയെങ്കിലും ലഭിച്ചോ എന്ന വിവരം പോലും തങ്ങള്‍ക്കറിയാന്‍ കഴിഞ്ഞില്ലെന്ന് അവര്‍ പറഞ്ഞു.

ഉക്രേനിയന്‍ എംബസി, അബുദാബി അധികൃതരുമായി ബന്ധപ്പെട്ടു കൊണ്ട് ഇരിക്കയാണെന്നും ഇരുവരേയും അവിടെ വച്ചു വിവാഹം ചെയ്യാന്‍ അനുവദിക്കുകയോ അല്ലെങ്കില്‍ നാട്ടിലേയ്ക്ക് മടക്കി അയയ്ക്കുകയോ ചെയ്യാനുള്ള ക്രമീകരണം നടത്തണമെന്ന് ആവശ്യപ്പെട്ടു കൊണ്ടിരിക്കുകയാണ് . എത്രാമത്തെ വയസ്സു മുതല്‍ ഐറിന ലൈംഗിക ബന്ധത്തില്‍ ഏര്‍പ്പെട്ടു കൊണ്ടിരിക്കയാണെന്നു തെളിയിക്കാനുള്ള പരിശോധനകള്‍ നടത്തി വരികയാണെന്നുള്ള റിപ്പോര്‍ട്ടുകള്‍ തങ്ങള്‍ക്കു കിട്ടിയിട്ടുള്ളത് തങ്ങളെ വല്ലാതെ ആശങ്കപ്പെടുത്തുന്നുവെന്ന് അമ്മ ലിന്‍ഡ അറിയിച്ചു.

അതൊക്കെ എങ്ങനെയാണ് കണ്ടുപിടിക്കാന്‍ സാധിക്കുന്നതെന്നു പോലും മനസ്സിലാക്കാന്‍ കഴിയുന്നില്ല! ഇതൊക്കെ കാണുമ്പോള്‍ അബുദാബി നിയമം ഐറിനയെ മാനഭംഗത്തിനു വിധേയയാക്കുന്നുവെന്നു പറയേണ്ടി വരുമെന്നാണ് അവര്‍ രോഷം പ്രകടിപ്പിച്ചത്.

അവള്‍ക്കുണ്ടായ വയറുവേദന ഒരു പക്ഷേ ഗര്‍ഭമലസലിന്റെ ലക്ഷണമായിരുന്നിരിക്കാം. അതിനുവേണ്ട ചികിത്സകള്‍ അവള്‍ക്കു നല്‍കുന്നുണ്ടോ എന്നും അറിയാന്‍ കഴിയുന്നില്ലെന്നും എംലിന്റെ മാതാവ് ആകുലപ്പെടുന്നു. അവര്‍ പ്രണയബദ്ധരായെന്ന ഒരു കുറ്റം മാത്രമേ അവര്‍ ചെയ്തിട്ടുള്ളൂവെന്നും അതൊന്നും തങ്ങളുടെ രാജ്യത്ത് ഒരു കുറ്റമല്ലെന്നും അവര്‍ ഓര്‍മ്മിപ്പിക്കുന്നു. കുടുംബാംഗങ്ങള്‍ അവരുടെ ഒപ്പമുണ്ടെന്ന സ്‌നേഹ സന്ദേശം അവരിലേക്കെത്തിക്കാന്‍ കഴിയാത്തതിലും അവര്‍ക്കു ഉത്കണ്ഠയുണ്ട്. ഇന്റര്‍നാഷണല്‍ റിലേഷന്‍സിന്റെ ഏതു വകുപ്പുമായി ബന്ധപ്പെട്ടാലും ധൃതി കൂട്ടാതെ, സമാധനമായിരിക്കൂ എന്നാണ് അവര്‍ തങ്ങളോടു പറയുന്നതെങ്കിലും മൂന്നു മനുഷ്യജീവനുകളുടെ പ്രശ്‌നമാണിത് എന്നോര്‍ക്കുമ്പോള്‍ തങ്ങള്‍ക്കെങ്ങനെ സമാധാനമായിരിക്കാനാവുമെന്നും അവര്‍ ചോദിക്കുന്നു.