ഇന്ത്യയും പാക്കിസ്ഥാനും അതിര്‍ത്തിയില്‍ ഏറ്റുമുട്ടല്‍ നടത്തുമ്പോള്‍ രണ്ട് യുവാക്കള്‍ മാനവികതയുടെ പുതിയ സന്ദേശം പകരുകയാണ് അതിനു ഉപാധിയായി എടുത്തിരിക്കുന്നത് ഫെയ്‌സ്ബുക്കും.

ശരിക്കും അവര്‍ ഹീറോകള്‍ തന്നെയാണ്. ഫെയ്‌സ്ബുക്കിലൂടെ മാനവികതയുടെ പുതിയ സന്ദേശം പകരുകയാണ് ഇവര്‍. ശത്രുക്കളെ പോലെ കഴിയുന്ന രണ്ട് രാജ്യങ്ങളില്‍ നിന്നുള്ളവരാണ് ഈ യുവാക്കള്‍. സന്ദീപ് ദത്ത്, ലുധിയാനയില്‍ നിന്നുള്ള ഐടി സ്റ്റുഡന്റ് ആണ്. മറ്റൊരാള്‍ ഫൈസല്‍ ഹയാത്, 19കാരനായ കക്ഷി പാക്കിസ്ഥാനിലെ റാവല്‍ പിണ്ടിയില്‍ ജേര്‍ണലിസം വിദ്യാര്‍ത്ഥിയും.

ബോല്‍തി കിഡ്കിദി സ്പീക്കിങ് വിന്‍ഡോ എന്നൊരു ഫേസ്ബുക്ക് പേജ് രണ്ട് മാസം മുമ്പ് ഇവര്‍ തുടങ്ങിയിരുന്നു. ഐക്യഭാരതം വിഭജിക്കപ്പെട്ട് 1947ല്‍ പാക്കിസ്ഥാന്‍ പിറവിയെടുത്തപ്പോള്‍ വേര്‍പാടിന്റെയും അക്രമത്തിന്റെയും കടുത്ത യാതനകളാണ് ലക്ഷക്കണക്കിന് ആളുകള്‍ക്ക് അനുഭവിച്ചത്.

രണ്ടു രാജ്യങ്ങളുടെയും അതിര്‍ത്തിയില്‍ കഴിയുന്നവരുടെ വിഭജനത്തിന്റെ കെടുതികളുടെ കഥ പറയുന്ന ഫേസ്ബുക്ക് പേജാണ് ഇത് എന്നുള്ളതാണ് ഏറ്റവും പ്രാധാന്യമര്‍ഹിക്കുന്നത്. ഇത്തരത്തിലുള്ള ആളുകളെ കണ്ട് പിടിച്ച് അവരുടെ കഥകളാണ് ഫേസ്ബുക്ക് പേജിലൂടെ ഇവര്‍ പുറം ലോകത്തെ അറിയിക്കുന്നത്. വിഭജനത്തിന്റെ മുറിപ്പാടുകള്‍ ഏറ്റുവാങ്ങി ജീവിക്കുന്നവരുടെ അനുഭവങ്ങള്‍ ലോകം അറിയണമെന്നും അതിലൂടെ മാത്രമേ ഇരുരാജ്യങ്ങളും തമ്മിലുള്ള പ്രശ്‌നങ്ങള്‍ക്ക് പരിഹാരമാകുകയുള്ളൂവെന്നും ചിന്തിക്കുകയാണ് ഇവര്‍.

ആഴ്ച്ചയില്‍ രണ്ട് തവണ ഇവര്‍ തങ്ങളുടെ പേജില്‍ ഇത്തരം കഥകള്‍ പോസ്റ്റ് ചെയ്യും. വലിയ പ്രതികരണമാണ് ഇതിന് ലഭിച്ചുകൊണ്ടിരിക്കുന്നത്. വെറുക്കപ്പെടേണ്ടവരാണ് ഇന്ത്യയും പാക്കിസ്ഥാനുമെന്ന പൊതുബോധം നിലനില്‍ക്കുന്ന ഇക്കാലത്ത് സാഹോദര്യത്തിന്റെ നന്മയുടെ പുതുസന്ദേശം പകരാനാണ് ഈ രണ്ട് യുവാക്കളും ശ്രമിക്കുന്നത്.

ഒരു വര്‍ഷം മുമ്പ് അമന്‍ കി ആശാ പദ്ധതിയിലൂടെയാണ് ഇവര്‍ കണ്ടുമുട്ടിയത്. അങ്ങനെ മൊട്ടിട്ട സൗഹൃദമാണ് ഇത്തരമൊരു നൂതന സംരംഭത്തിലേക്ക് ഇരുവരെയും നയിച്ചത്. ഇവര്‍ക്ക് എഡിറ്റിങ് പോലുള്ള സഹായങ്ങള്‍ ചെയ്തു നല്‍കുന്നത് ലുധിയാനയിലെ ഒരു ഇംഗ്ലീഷ് ടീച്ചറായ റികിത ശര്‍മ്മയാണ്.