അഴിമതി ആരോപണവുമായി ബന്ധപ്പെട്ട പാനമ രേഖകളുടെ വെളിപ്പെടുത്തലില്‍ പാക്കിസ്ഥാന്‍ പ്രധാനമന്ത്രി നവാസ് ഷെരീഫ് സംയുക്ത അന്വേഷണ സംഘത്തിനു മുന്നില്‍ ഹാജരായി. സുപ്രീം കോടതി നിര്‍ദേശത്തെ തുടര്‍ന്നാണ് ഇസ്!ലാമാബാദിലെ ജുഡീഷ്യല്‍ അക്കാദമിയിലെ അന്വേഷണ സംഘത്തിനു മുന്നില്‍ ഷെരീഫ് ഹാജരായത്. വിവിധ രാജ്യങ്ങളില്‍ ഷെരീഫിന്റെ കുടുംബത്തിന് നിക്ഷേപമുണ്ടെന്ന പനാമ രേഖകള്‍ പുറത്തു വന്നതിനെ തുടര്‍ന്നാണ് സുപ്രീം കോടതി അന്വേഷണത്തിന് ഉത്തരവിട്ടത്.

തന്റെ സാമ്പത്തിക വിവരങ്ങള്‍ സംബന്ധിച്ച വസ്തുതകള്‍ സുപ്രീം കോടതിയില്‍ ഉള്‍പ്പെടെ ഉണ്ടെന്ന് നവാസ് ഷെരീഫ് മാധ്യമങ്ങളോട് പ്രതികരിച്ചു. സംയുക്ത അന്വേഷണ സംഘത്തിനുമുന്നിലും സാമ്പത്തിക രേഖകള്‍ സമര്‍പ്പിച്ചു. പ്രധാനമന്ത്രി എന്ന സ്ഥാനത്തിനെതിരെയല്ല ആരോപണം. തീര്‍ത്തും വ്യക്തിപരമായ ആരോപണമാണ് ഉന്നയിച്ചിരിക്കുന്നത്. ഞാനും എന്റെ കുടുംബവും വിചാരണ നേരിടും. ജനിച്ചതിനു ശേഷം ഇതുവരെ നടത്തിയ മുഴുവന്‍ ഇടപാടുകളും കോടതിക്കു മുന്നില്‍ സമര്‍പ്പിക്കും. എതിരാളികളാണ് തനിക്കെതിരെ ആരോപണം ഉന്നയിച്ചിരിക്കുന്നത്. എനിക്കെതിരെ ഇതുവരെ ഒരു തരത്തിലുള്ള ആരോപണവും തെളിയിക്കപ്പെട്ടിട്ടില്ല. ഏതാനും ദിവസത്തിനുള്ളില്‍ സംയുക്ത അന്വേഷണ സംഘം റിപ്പോര്‍ട്ട് കോടതിയില്‍ നല്‍കും– നവാസ് ഷെരീഫ് പറഞ്ഞു.

പ്രധാനമന്ത്രിപദത്തിലിരിക്കെ അന്വേഷണ സംഘത്തിനു മുമ്പില്‍ ഹാജരാകുന്ന ആദ്യത്തെ പാക്കിസ്ഥാന്‍ പ്രധാനമന്ത്രിയാണ് ഷെരീഫ്.