നാം വലിച്ചെറിയുന്ന ടയറുകള്‍ കാരണം ജീവലോകത്തിനുണ്ടാകുന്ന ദോഷങ്ങളെപ്പറ്റി ആലോചിക്കാറുണ്ടോ. പല മൃഗങ്ങളുടെയും ജീവന്‍ തന്നെയാണ് ഇതുവഴി നഷ്ടപ്പെടുന്നത്. അതും അവ പോലും അറിയാതെ.

അമേരിക്കയിലെ ജോര്‍ജിയയിലുണ്ടായ അത്തരമൊരു സംഭവമാണ് പരിസ്ഥിതി സ്‌നേഹികള്‍ക്കിടയില്‍ ഇപ്പോള്‍ ചര്‍ച്ചയാകുന്നത്. ഒരു ടയറിനുള്ളില്‍ പെട്ടു പോയ മുതലയുടെ ചിത്രം പുറത്തുവിട്ടത് ജോര്‍ജിയ ഡിപാര്‍ട്‌മെന്റ് ഓഫ് നാച്വറല്‍ റിസോഴ്‌സസസ് ലോ എന്‍ഫോഴ്‌സ്‌മെന്റ് വിഭാഗമായിരുന്നു. ചത്തുമലച്ച നിലയിലായിരുന്നു മുതല. അതിന്റെ ചിത്രം സമൂഹമാധ്യമത്തില്‍ പോസ്റ്റും ചെയ്തു. വേട്ടക്കാരുടെ ശല്യത്തില്‍ നിന്ന് ഇവയെ സംരക്ഷിക്കാന്‍ ഗാര്‍ഡുമാര്‍ പരിശ്രമം തുടരുന്നതിനിടെയാണു പുതിയ സംഭവം.

ഏകദേശം 12 അടി നീളം വരും മുതലയ്ക്ക്. ഹാംബര്‍ഗ് സ്‌റ്റേറ്റ് പാര്‍ക്കിലെ തടാകത്തോടു ചേര്‍ന്നായിരുന്നു ഈ ആണ്‍മുതലയുടെ ശവശരീരം അടിഞ്ഞത്. നീന്തുന്നതിനിടെ എങ്ങനെയോ മുതല ടയറിനകത്തേക്ക് കയറിപ്പോയതാണ് തലയില്‍ നിന്ന് ടയര്‍ വയറിനു സമീപത്തേക്കു നീങ്ങുകയും ചെയ്തു. ഭക്ഷണം കഴിക്കാന്‍ പോലും പറ്റാത്ത വിധം ടയര്‍ വരിഞ്ഞു മുറുക്കിയതോടെയാണ് മുതലയുടെ മരണമെന്നാണ് കരുതുന്നത്.

ഇത്തരം സംഭവങ്ങള്‍ക്ക് സാധ്യതയുള്ളതിനാലാണ് വനമേഖലകളെ പ്ലാസ്റ്റിക്കും മറ്റും കൊണ്ട് മലിനമാക്കല്ലേയെന്ന് ഫോറസ്റ്റ് അധികൃതര്‍ പറയുന്നത്. ആനയുടെ വയറ്റില്‍ പ്ലാസ്റ്റിക്കും കടലാമയുടെ ആമാശയത്തില്‍ നാണയങ്ങളുമെല്ലാം എത്തിച്ചേരുന്നതു പോലെ മനുഷ്യന്റെ കൈകള്‍ തന്നെയാണ് മുതലയുടെയും മരണത്തിനു പിന്നില്‍. വലിച്ചെറിയുന്ന ടയറില്‍ വെള്ളം കെട്ടിക്കിടന്ന് കൊതുകു മുട്ടയിട്ട് പെരുകുന്നതിനെപ്പറ്റി എല്ലാവരും കേട്ടിട്ടുണ്ട്. എന്നാല്‍ ഇത്തരം ടയറുകള്‍ പൊടിഞ്ഞ് അതിലെ വിഷപദാര്‍ഥങ്ങള്‍ മണ്ണിലും വെള്ളത്തിലും കലരുന്ന പ്രശ്‌നവുമുണ്ടെന്നോര്‍ക്കണം. ടയര്‍ കത്തിക്കുമ്പോഴുണ്ടാകുന്ന അന്തരീക്ഷമലിനീകരണത്തെപ്പറ്റി പറയുകയും വേണ്ട.

ടയര്‍ കൃത്യമായി റീസൈക്കിള്‍ ചെയ്യാനുള്ള സംവിധാനം ലോകവ്യാപകമായി ഉണ്ടെന്നതാണു സത്യം. കാരണം ഉപയോഗശൂന്യമായ ടയര്‍ പല ആവശ്യങ്ങള്‍ക്കും ഉപയോഗിക്കാനാകും. ബാസ്‌കറ്റ് ബോള്‍ കോര്‍ട്ട് നിര്‍മിക്കാന്‍ തുടങ്ങി റോഡുകളുടെ ഉപരിതലത്തില്‍ വരെ ഇതുപയോഗിക്കുന്നു. അമേരിക്കയിലാകട്ടെ പ്രതിവര്‍ഷം 30 കോടി ടയറെങ്കിലും ഉപയോഗിക്കപ്പെടുന്നുണ്ട്. ഇവയുടെ റീസൈക്ലിങ് ഒരു വലിയ പ്രശ്‌നവുമാണ്. പുതിയ സാഹചര്യങ്ങളില്‍ ജനങ്ങള്‍ക്കിടയില്‍ ബോധവത്കരണം ശക്തമാക്കാനാണ് അധികൃതരുടെ തീരുമാനം.