ഉത്തരകൊറിയന് ഏകാധിപതി കിം ജോങ് ഉന്നിനെതിരെ ആഞ്ഞടിച്ച് അമേരിക്കന് പ്രസിഡന്റ് ഡൊണാള്ഡ് ട്രംപ്
ഉത്തരകൊറിയന് ഏകാധിപതി കിം ജോങ് ഉന്നിനെതിരെ ആഞ്ഞടിച്ച് അമേരിക്കന് പ്രസിഡന്റ് ഡൊണാള്ഡ് ട്രംപ്. ഏകാധിപതികളാരും യുഎസിനെ ചെറുതായി കാണേണ്ടെന്നും യുഎസിന്റെ സായുധ സൈന്യത്തിന് ജയിച്ച് മാത്രമേ ശീലമുള്ളൂവെന്നും ട്രംപ് പറഞ്ഞു.
ഏഷ്യന് പര്യടനത്തിന്റെ ഭാഗമായി ടോക്കിയോയിലെത്തിയതായിരുന്നു ട്രംപ്. ഒരു ഏകാധിപതിയും, ഒരു ഭരണകൂടവും യുഎസിന്റെ ദൃഢനിശ്ചയത്തെ ചെറുതായി കാണേണ്ടതില്ല, ചരിത്രത്തില് ഇടയ്ക്കൊക്കെ യുഎസിനെ ചെറുതായി കാണുന്ന ശീലം അവര്ക്കുണ്ട്. അത് അവര്ക്കു നല്ലതായി ഒരിക്കലും വന്നിട്ടുമില്ല. പൗരന്മാരുടെ സുരക്ഷയും യുഎസിന്റെ മഹത്തായ ദേശീയ പതാകയും അപകടത്തിലാക്കി ഒരു കളിക്കും യുഎസ് നില്ക്കില്ലെന്നും ട്രംപ് പ്രഖ്യാപിച്ചു.
യുഎസ് സായുധ സൈന്യത്തിനു എന്നും ജയിച്ചു മാത്രമേ ശീലമുള്ളൂവെന്നും ഉത്തരകൊറിയയെ ഉന്നമിട്ട് ട്രംപ് ഓര്മിപ്പിച്ചു. ലോകരാജ്യങ്ങളുടെ സ്വാതന്ത്ര്യത്തിനും അവര്ക്കു നീതി ലഭ്യമാക്കുന്നതിനുമായി നിലകൊള്ളുന്ന സൈന്യമാണു തങ്ങളുടേതെന്നും ട്രംപ് ചൂണ്ടിക്കാട്ടി. മേഖലയിലെ സമാധാനാന്തരീക്ഷം സംരക്ഷിക്കുന്നതില് യുഎസ് ജപ്പാന് സഖ്യത്തിന് നിര്ണായക പങ്കുണ്ടെന്നും ട്രംപ് അവകാശപ്പെട്ടു. കഴിഞ്ഞ ആറ് ദശാബ്ദമായി ഇത് തുടരുകയാണെന്നും ട്രംപ് ഓര്മ്മിപ്പിച്ചു.
കരയിലും കടലിലും ആകാശത്തും ബഹിരാകാശത്തും തങ്ങളാണ് എക്കാലവും ആധിപത്യം പുലര്ത്തുന്നതെന്നും ട്രംപ് ചൂണ്ടിക്കാട്ടി. ജപ്പാനിലുള്ള സൈനികര്ക്കു ആയുധങ്ങളും പ്രതിരോധ സംവിധാനങ്ങളും ലഭ്യമാക്കുമെന്നും ട്രംപ് വാഗ്ദാനം ചെയ്തു. ഉത്തരകൊറിയ സൃഷ്ടിക്കുന്ന ഭീഷണി ചെറുക്കുന്നതിനു ജപ്പാനും ദക്ഷിണ കൊറിയയ്ക്കും കൂടുതല് അത്യാധുനിക ആയുധങ്ങള് ലഭ്യമാക്കുമെന്ന് ട്രംപ് നേരത്തെ വാഗ്ദാനം ചെയ്തിരുന്നു. അഞ്ചു രാജ്യങ്ങള് നീളുന്ന ഏഷ്യന് സന്ദര്ശനത്തിന്റെ ആദ്യ പാദ സന്ദര്ശനത്തിനാണു ട്രംപ് ജപ്പാനിലെത്തിയത്. ജപ്പാന് കൂടാതെ, ദക്ഷിണ കൊറിയ, ചൈന, വിയറ്റ്നാം, ഫിലിപ്പീന്സ് എന്നീ രാജ്യങ്ങളും ട്രംപ് സന്ദര്ശിക്കും.
https://www.facebook.com/Malayalivartha