ഭീകരസംഘടനയില്‍ ചേരുന്ന മലയാളികളുടെ എണ്ണം കൂടാന്‍ സാധ്യതയെന്ന് ഐബി റിപ്പോര്‍ട്ട്. ഭീകരസംഘടനയായ ഐസിസില്‍ ചേരാനായി സ്ത്രീകളുള്‍പ്പെടെ 55 മലയാളികള്‍ സിറിയയില്‍ എത്തിയതായി കേന്ദ്ര രഹസ്യാന്വേഷണ ബ്യൂറോയ്ക്ക് വിവരം ലഭിച്ചു. ഗള്‍ഫ് വഴിയാണ് പലരും ഇറാനിലേക്കും സിറിയയിലേക്കും കടക്കുന്നത്.

നാല്പതോളം പേരെ ഐസിസ് ബന്ധത്തിന്റെ പേരില്‍ ഗള്‍ഫ് രാജ്യങ്ങളില്‍ നിന്ന് നാട്ടിലേക്ക് തിരിച്ചയച്ചിട്ടുണ്ട് . ഇവരില്‍ പലരും ഭീകരബന്ധത്തിന് അവിടെ ഒരു മാസം മുതല്‍ ആറുമാസം വരെ തടവു ശിക്ഷ അനുഭവിച്ച ശേഷമാണ് വന്നത്. ഇവരില്‍ കൂടുതലും 2015ല്‍ റാസല്‍ ഖൈമയില്‍ നിന്ന് കടന്ന മലയാളി യുവാവുമായി ബന്ധപ്പെട്ടവരാണ്. രണ്ടു മലയാളി യുവാക്കള്‍ ഐസിസില്‍ ചേരാന്‍ പോയി കൊല്ലപ്പെട്ടതായി സ്ഥിരീകരിച്ചിരുന്നു.

ഗള്‍ഫില്‍ പോയശേഷം യാതൊരു വിവരവും ഇല്ലാത്തവരുടെ എണ്ണം തിരക്കുകയാണ്. ഇങ്ങനെയുള്ളവരുടെ സുഹൃത്തുക്കളും ബന്ധുക്കളും അന്വേഷണം ഭയന്ന് നിശബ്ദത പാലിക്കുന്നതും കൂടുതല്‍ വിവരങ്ങള്‍ പുറത്തുവരാന്‍ തടസമാകുന്നുണ്ട്.തിരിച്ചു വന്നവരിലും കൊല്ലപ്പെട്ടവരിലും ഇപ്പോള്‍ സിറിയയില്‍ ഉള്ളവരിലുമായ നൂറോളം പേരില്‍ 13 പേര്‍ക്കെങ്കിലും പോപ്പുലര്‍ ഫ്രണ്ട് എസ്ഡിപിഐ സംഘടനകളുമായി ബന്ധമുണ്ടായിരുന്നെന്ന് ഇന്റലിജന്‍സ് ബ്യൂറോ സ്ഥിരീകരിച്ചിട്ടുണ്ട്. 

ഗള്‍ഫിലേക്കെന്ന് പറഞ്ഞാണ് എന്റെ മകന്‍ ആദ്യം പോയത്. പക്ഷേ ഞങ്ങളാരും അറിഞ്ഞില്ല അവന്‍ ഐഎസിലേക്കാണ് ചേരാന്‍ പോകുന്നതെന്ന കാര്യം. പോകുന്നതിന് ദിവസങ്ങള്‍ക്ക് മുമ്പ് അവനില്‍ ചില മാറ്റങ്ങള്‍ ഞങ്ങള്‍ കണ്ടിരുന്നുവെന്ന് ഗള്‍ഫില്‍ നിന്ന് ഐഎസിലേക്ക് ചേര്‍ന്ന ഒരു യുവാവിന്റെ അമ്മ പറയുന്നു.