ഏറെ നിർണായകമായ എൽഡിഎഫ് യോഗം ഇന്ന് തിരുവനന്തപുരത്ത്. ലോക്സഭാ തിരഞ്ഞെടുപ്പിനുമുമ്പായി മുന്നണി വിപുലീകരണം ലക്ഷ്യമിട്ടുള്ള പ്രാരംഭ ചർച്ചകളാണ് ഇന്ന് നടക്കാൻ പോകുന്നത്. യോഗത്തിൽ കേരളത്തിലെ രാഷ്ട്രീയ സാഹചര്യങ്ങളും വിവാദങ്ങളും ചർച്ചചെയ്യും. ഇന്ന് ഉച്ചകഴിഞ്ഞാണ്‌ നിർണായക യോഗം. മൂന്നുമണിക്ക് എകെജി സെന്ററിലാണ് യോഗം നടക്കുന്നത്.

മുന്നണി പ്രവേശനം കാത്തു നിൽക്കുന്ന പത്തിലധികം പാർട്ടികളിൽ ആരൊക്കെയാണ് നേതൃത്വം പരിഗണിക്കുന്നത് എന്നതിൽ അവ്യക്തത തുടരുകയാണ്. ഐ.എൻ.എല്ലിനും ലോക്താന്ത്രിക് ജനതാദളിനും (എൽ.ജെ.ഡി) പുറമേ കേരള കോൺഗ്രസ്- ബി, ജനാധിപത്യ കേരള കോൺഗ്രസ്, ആർ.എസ്.പി- ലെനിനിസ്റ്റ്, നാഷണൽ സെക്യുലർ കോൺഫറൻസ്, ഗൗരി അമ്മയുടെ ജെ.എസ്.എസ് വിഭാഗം, സി.എം.പി അരവിന്ദാക്ഷൻ വിഭാഗം എന്നിവയാണ് മുന്നണിപ്രവേശനം കാത്ത് കഴിയുന്നവർ.

23 വർഷമായി മുന്നണിക്കൊപ്പം നിൽക്കുന്ന ഇന്ത്യൻ നാഷണൽ ലീഗ് ഇത്തവണ മുന്നണിപ്രവേശനം സാദ്ധ്യമാകുമെന്ന പ്രതീക്ഷയിലാണ്. മുന്നണിപ്രവേശനത്തിന്റെ ഭാഗമായി കഴിഞ്ഞാഴ്ച എൽ.ജെ.ഡി നേതൃത്വം സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണനുമായി കൂടിക്കാഴ്ച നടത്തിയതായി സൂചനയുണ്ട്.