മാത്യു ടി തോമസിന്റെ മന്ത്രി സ്ഥാനം തുലാസിലാണ്. കൃഷ്ണൻകുട്ടിയെ മന്ത്രിയാക്കാനാണ് സി പി എം ആഗ്രഹം. ജലവിഭവ മന്ത്രി മാത്യു ടി തോമസിനെതിരെ അദ്ദേഹത്തിന്റെ പാർട്ടിയിൽ തന്നെ പടയൊരുക്കം നടക്കുകയാണ്. കെ കൃഷ്ണൻകുട്ടി സി പി എമ്മിന്റെ വിശ്വസ്തനാണ്. മാത്യു ടി തോമസിന്റെ പല നീക്കങ്ങളോടും സി പി എമ്മിന് എതിർപ്പുണ്ട്. ജലവിഭവ വകുപ്പിൽ സി പി എമ്മിന്റെ കളി മാത്യു ടി തോമസ് അനുവദിക്കാറില്ല. മന്ത്രി അദ്ദേഹത്തിന്റെ വഴിയിലൂടെയാണ് സഞ്ചരിക്കുന്നത്. വകുപ്പിൽ അഴിമതി അനുവദിക്കില്ല.തന്റെ തട്ടകത്തിൽ സി പി എം ഇടപാടുകൾ അനുവദിക്കാറുമില്ല.

മാത്യു ടി തോമസും കൃഷ്ണൻകുട്ടിയും തമ്മിൽ മന്ത്രി സ്ഥാനത്തിന് രണ്ടര വർഷത്തെ കരാറുണ്ടെന്നാണ് വാദം. എന്നാൽ അക്കാര്യം മാത്യു ടി സമ്മതിക്കുന്നില്ല. വീരേന്ദ്രകുമാർ നേരത്തെ യു ഡി എഫിലായിരുന്നപ്പോൾ സി പി എമ്മുമായി ബന്ധപ്പെട്ട ചർച്ചകളെല്ലാം നടത്തിയിരുന്നത് കൃഷ്ണൻകുട്ടിയാണ്. അന്ന് പാർട്ടി സെക്രട്ടറിയായിരുന്നു പിണറായി. പ്ലാച്ചിമട സമരത്തിൽ വീരനെക്കാൾ സജീവം കൃഷ്ണൻകുട്ടിയായിരുന്നു. വി എസിനും കൃഷ്ണൻകുട്ടിയുമായി അടുത്ത ബന്ധമുണ്ട്. എല്ലാവർക്കും സ്വീകാര്യനാണ് പരിസ്ഥിതി പ്രവർത്തകൻ കൂടിയായ കൃഷ്ണൻകുട്ടി.

താൻ തെറിക്കുമെന്ന് മാത്യു ടി തോമസിനറിയാം. അതിനു മുമ്പ് കഴിയുന്നിടത്തോളം വിവാദമുണ്ടാക്കാനാണ് മന്ത്രിയുടെ ശ്രമം. തണ്ണീർമുക്കം ബണ്ട് മന്ത്രി തിലോത്തമന്റെ മണ്ഡലത്തിലാണ്. അദ്ദേഹത്തിന് മുഖ്യമന്ത്രി ഉദ്ഘാടനം ചെയ്യണമെന്നാണ് ആഗ്രഹം. എന്നാൽ ജലവിഭവ മന്ത്രിക്ക് താൻ ഉദ്ഘാടനം ചെയ്താൽ മതിയെന്നാണ് താല്പര്യം.

കഴിഞ്ഞ ദിവസം ഒരു സ്വകാര്യ ചാനാലാണ് തണ്ണീർമുക്കം ഉദ്ഘാടനം ചെയാൻ മുഖ്യമന്ത്രിക്ക് സമയമില്ലെന്ന വാർത്ത പുറത്തുവിട്ടത്. വാർത്തക്ക് പിന്നിൽ സി പി ഐ യെയാണ് ആദ്യം സി പി എം സംശയിച്ചത്. പിന്നീടത് മാത്യു ടിയിലേക്ക് മാറി. അതിനിടെ തണ്ണീർമുക്കത്തിന്റെ ഉദ്ഘാടനം ഉടൻ നടക്കുമെന്നും അതിന് മുഖ്യമന്ത്രിയെ കാത്തിരിക്കില്ലെന്നും മാത്യു ടി പരസ്യമായി പറഞ്ഞു. ഇത് മുഖ്യമന്ത്രിക്ക് നാണക്കേടായി. കാരണം ഉദ്ഘാടനം വൈകാൻ കാരണം താനല്ലന്ന് മുഖ്യമന്ത്രി പ്രസ്താവനയിറക്കിയതിന്റെ പിന്നാലെയാണ് മാത്യു ടി തോമസിന്റെ വിശദീകരണം വന്നത്. മുഖ്യമന്ത്രിക്ക് എതിരായ പരസ്യ പ്രസ്താവന മാത്യു ടി തോമസിന്റെ പോക്കറ്റ് കീറാനാണ് സാധ്യത.