ആശങ്കകള്‍ക്ക് അല്‍പം ആശ്വാസം, ഇന്ന് രാവിലെ ഇടുക്കി അണക്കെട്ടിലെ ജലനിരപ്പില്‍ ചെറിയ കുറവ് രേഖപ്പെടുത്തി. ഇപ്പോള്‍ 2401 അടിയാണ് ജലനിരപ്പ്. അതിരാവിലെയിത് 2401.10 അടിയായിരുന്നു. ഡാമിന്റെ വൃഷ്ടിപ്രദേശത്ത് മഴകുറഞ്ഞതോടെയാണ് ജലനിരപ്പ് കുറഞ്ഞത്. ജലനിരപ്പ് 2400 അടി ആകുന്നത് വരെ ഷട്ടറുകള്‍ താഴ്ത്തില്ലെന്ന് വൈദ്യുതി മന്ത്രി എംഎം മണി പറഞ്ഞു. പലയിടത്തും മഴ തുടരുന്നതിനാല്‍ ഷട്ടറുകള്‍ അടയ്ക്കാനാകില്ലെന്നും അദ്ദേഹം പറഞ്ഞു.

ഇടുക്കി അണക്കെട്ടിന്റെ നാല്‍പ്പത് വര്‍ഷത്തെ ചരിത്രത്തില്‍ മൂന്നാംതവണയാണ് അഞ്ച് ഷട്ടറുകളും തുറക്കുന്നത്. മഴയും നീരൊഴുക്കും കുറഞ്ഞിട്ടുണ്ട്. ഡാം തുറന്നതോടെ വെളളം ഒഴുകിപ്പോകുന്ന പെരിയാറിന്റെ തീരത്ത് താമസിക്കുന്ന 6500 കുടുംബങ്ങളെ മാറ്റിപാര്‍പ്പിച്ചിട്ടുണ്ട്. ജാഗ്രതാ നിര്‍ദ്ദേശവും നല്‍കിയിട്ടുണ്ട്. മറ്റന്നാള്‍ മുതല്‍ മഴ ശക്തമാകുമെന്ന് കാലാവസ്ഥാ നിരീക്ഷണകേന്ദ്രം മുന്നറിയിപ്പ് നല്‍കിയിട്ടുണ്ട്. ഒറീസാ തീരത്ത് രൂപം കൊണ്ട അന്തരീക്ഷ ചുഴിയാണ് ശക്തമായ മഴയ്ക്ക് കാരണം. സാധാരണ മണ്‍സൂണ്‍ ആഗസ്റ്റില്‍ ദുര്‍ബലമാകുന്നതാണ് പതിവ്. എന്നാല്‍ അന്തരീക്ഷ ചുഴികാരണം ഇത്തവണ അതുണ്ടായില്ല.

കോട്ടയം, എറണാകുളം, മലപ്പുറം ജില്ലകളില്‍ നാളെയും മഴ തുടരും. കനത്ത മഴ പെയ്യില്ല. തൃശൂര്‍, കൊല്ലം, കാസര്‍കോട് ജില്ലകളില്‍ നേരിയ തോതില്‍ മഴ ലഭിക്കും. കനത്ത മഴയെ തുടര്‍ന്ന് 29 പേരാണ് കേരളത്തില്‍ മരിച്ചത്. ആയിരക്കണക്കിന് പേരെ മാറ്റിപ്പാര്‍പ്പിച്ചിട്ടുണ്ട്. ഭൂതത്താന്‍കെട്ടിലും ജലനിരപ്പ് താഴുന്നുണ്ട്. കക്കി ഡാമിലും ജലനിരപ്പ് കുറഞ്ഞതിനാല്‍ പഴയപോലെ വെള്ളം തുറന്ന് വിടുന്നില്ല.