പ്രളയ ദുരിതമനുഭവിക്കുന്നവരെ കാണാനെത്തിയ കേന്ദ്ര ആഭ്യന്തര മന്ത്രി രാജ്നാഥ് സിങ്​ സംസ്ഥാനത്തിന്​ പൂർണ്ണ​ പിന്തുണ അറിയിച്ചു. കേരളത്തിലെ പ്രളയക്കെടുതി അതീവ ഗുരുതരമാണെന്നും സർക്കാർ മികച്ച രീതിയിലാണ്​ സാഹചര്യത്തെ നേരിടുന്നതെന്നും അദ്ദേഹം വ്യക്​തമാക്കി.

കേന്ദ്രത്തിന്റെ എല്ലാ സഹായവും കേരളത്തിനുണ്ടാകുമെന്നും മഴക്കെടുതിയെ കേന്ദ്ര-കേരള സർക്കാരുകൾ ഒറ്റക്കെട്ടായി നേരിടുമെന്നും അദ്ദേഹം പറഞ്ഞു. കൊച്ചി എളന്തിക്കര എൽ.പി സ്​കൂളിലെ ദുരിതാശ്വാസ ക്യാമ്പിലുള്ളവരെ അഭിസംബോധന ചെയ്ത് സംസാരിക്കുകയായിരുന്നു മന്ത്രി.

കൊച്ചി രാജ്യാന്തര വിമാനത്താവളത്തിൽ ഇറങ്ങിയ കേന്ദ്ര മന്ത്രി ഇടുക്കി, ചെറുതോണി, ഡാമുകളും മറ്റ്​ ദുരിത ബാധിത പ്രദേശങ്ങളും ഹെലിക്കോപ്​റ്ററിലൂടെ വീക്ഷിച്ചു. ദുരിതാശ്വാസ ക്യാമ്പുകളിലും സന്ദർശനം നടത്തി. കേന്ദ്ര ടൂറിസം മന്ത്രി അൽഫോൻസ്​ കണ്ണന്താനവും മുഖ്യമന്ത്രി പിണറായി വിജയനും രാജ്​നാഥ്​ സിങ്ങിനൊപ്പമുണ്ടായിരുന്നു.

ദുരിത ബാധിതർക്കൊപ്പം സർക്കാരുണ്ടെന്ന്​ മുഖ്യമന്ത്രി പിണറായി വിജയൻ പറഞ്ഞു. കാലവർഷക്കെടുതിയിൽ 8316 കോടിയുടെ നാശനഷ്​​ടമാണ്​ ഉണ്ടായതെന്നും അടിയന്തിര സഹായമായി 1220 കോടി ധനസഹായവും കേരളം കേന്ദ്രത്തോട്​ ആവശ്യപ്പെട്ടു. ഇതുമായി ബന്ധപ്പെട്ട്​ മുഖ്യമ​ന്ത്രി രാജ്​നാഥ്​ സിങ്ങിന്​ നിവേദനം നൽകിയിട്ടുണ്ട്​. വെള്ളക്കെട്ടുള്ള സമയത്തെ പ്രശ്​നങ്ങൾ നേരിട്ടതുപോലെ വെള്ളം ഇറങ്ങിയതിന്​ ശേഷമുള്ള ദുരിതങ്ങളും പരിഹരിക്കുമെന്നും അദ്ദേഹം ഉറപ്പ് നൽകി.