പ്രളയക്കെടുതിയില്‍ ദുരിതം അനുഭവിക്കുന്നവര്‍ക്കായി ടാറ്റാ ട്രസ്റ്റ്‌സ് പത്ത് കോടിരൂപ നല്‍കും. ട്രസ്റ്റി ആര്‍കെ കൃഷ്ണകുമാര്‍ മുഖ്യമന്ത്രി പിണറായി വിജയനെ ഫോണില്‍ വിളിച്ച്‌ അറിയിച്ചതാണിത്. പ്രളയത്തില്‍ സംസ്ഥാനത്തിന് 8316 കോടിയുടെ നാശനഷ്‌ടം ഉണ്ടായതായാണ് പ്രാഥമിക വിലയിരുത്തല്‍. 38 പേര്‍ മരിക്കുകയും നാലുപേരെ കാണാതാവുകയും ചെയ്തു. 20,000 വീടുകള്‍ നശിച്ചു. 215 ഇടത്ത് ഉരുള്‍പൊട്ടല്‍ ഉണ്ടായി. 10,000 കിലോമീറ്റര്‍ റോഡുനശിച്ചു. 60,000 പേര്‍ ക്യാംപിലെത്തി. 30,000 പേര്‍ ക്യാംപില്‍ തുടരുകയാണ്.

അതേസമയം നടന്‍മാരായ മമ്മൂട്ടിയും ദുല്‍ഖര്‍ സല്‍മാനും 25 ലക്ഷം രൂപ മുഖ്യമന്ത്രിയുടെ ദുരിതാശ്വാസ നിധിയിലേയ്ക്ക് സംഭാവന നല്‍കിയതിന് പിന്നാലെ പ്രളയക്കെടുതിയില്‍ ദുരിതം അനുഭവിക്കുന്നവര്‍ക്കായി മുഖ്യമന്ത്രിയുടെ ദുരിതാശ്വാസ നിധിയിലേക്ക് നടന്‍ മോഹന്‍ലാല്‍ 25 ലക്ഷം രൂപ കൈമാറി.

തിരുവനന്തപുരത്ത് മുഖ്യമന്ത്രിയുടെ വാര്‍ത്താ സമ്മേളനം നടക്കുന്നതിനിടെ നേരിട്ടെത്തിയായിരുന്നു മോഹന്‍ലാല്‍ മുഖ്യമന്ത്രിക്ക് പണം കൈമാറിയത്. മറ്റ് സിനിമാ മേഖലയില്‍ നിന്നും നിരവധി പേരാണ് ദുരന്തബാധിതര്‍ക്ക് സഹായവുമായി എത്തിയിരിക്കുന്നത്.