പ്രളയം വരുമ്പോള് പിരീഡ്സ് ആവുന്നത് പോലെ ബുദ്ധിമുട്ടേറിയ അവസ്ഥ ഒന്ന് വേറെയില്ല; ദുരിതാശ്വാസ ക്യാമ്പുകളിലേക്ക് സാധനങ്ങള് കൊടുക്കുന്നവര് ആവുന്നത്ര സാനിട്ടറി നാപ്കിനുകള് കൂടി ഉള്പ്പെടുത്തുക; ആര്ത്തവവും പ്രളയദുരിതവും കുറുപ്പ് വൈറലാകുന്നു
ദുരിതപ്പേമാരിയെ അണമുറിയാത്ത സഹായ പ്രവാഹം കൊണ്ട് അതിജീവിക്കുകയാണ് മലയാളക്കര. ദുരിതാശ്വാസ ക്യാമ്പുകളില് വേദന തിന്ന് ജീവിക്കുന്ന ആയിരക്കണക്കിന് പേര്ക്ക് കൈത്താങ്ങാകാന് കൈ മെയ് മറന്നിറങ്ങുകയാണ് ഏവരും. വസ്ത്രം, ഭക്ഷണം, മരുന്നുകള് എന്നു വേണ്ട സര്വ്വ വിധത്തിലും ക്യാമ്പുകളിലേക്ക് സഹായ പ്രവാഹം ഒഴുകുകയാണ്.
എന്നാല് ദുരിതാശ്വാസ പ്രവര്ത്തനങ്ങള്ക്ക് ചുക്കാന് പിടിക്കുന്നവര് ആര്ത്തവ കാലത്തെ പെണ്ണുങ്ങളുടെ കാര്യം മറന്നു പോകരുതെന്ന് ഓര്മ്മിപ്പിക്കുകയാണ് സോഷ്യല് മീഡിയയില് പ്രചരിക്കുന്ന ഒരു കുറിപ്പ്. പ്രളയം വരുമ്പോള് പിരീഡ്സ് ആവുന്നത് പോലെ ബുദ്ധിമുട്ടേറിയ അവസ്ഥ ഒന്ന് വേറെയില്ല എന്ന ആമുഖത്തോടെയാണ് കുറിപ്പ് തുടങ്ങുന്നത്. അതൊകൊണ്ട് തന്നെ ദുരിതാശ്വാസ ക്യാമ്പുകളിലേക്ക് സാധനങ്ങള് കൊടുക്കുന്നവര് ആവുന്നത്ര സാനിട്ടറി നാപ്കിനുകള് കൂടി ഉള്പ്പെടുത്തുക എന്നും കുറിപ്പില് ഓര്മ്മിപ്പിക്കുന്നു. ആര്ത്തവവും ഈ പ്രളയദുരിതത്തിലൊന്നാണെന്നും കുറിപ്പില് അടിവരയിടുന്നു.
ഫെയ്സ്ബുക്ക് കുറിപ്പ് വായിക്കാം;
പ്രളയം വരുമ്പോള് പിരീഡ്സ് ആവുന്നത് പോലെ ബുദ്ധിമുട്ടേറിയ അവസ്ഥ ഒന്ന് വേറെയില്ല. ഇപ്പോള് പലരും അനുഭവിച്ചു കൊണ്ടിരിക്കുന്നു. പിരീഡ്സ് സമയത്ത് ആവശ്യമായ ഇടവേളകളില് മാറാന് വൃത്തിയുള്ള പാഡ് കിട്ടിയില്ലെങ്കില് ഗുരുതരമായ, ദീര്ഘകാലം ബാധിക്കുന്ന ആരോഗ്യപ്രശ്നങ്ങള് ഉണ്ടാകും. ദയവ് ചെയ്ത് ദുരിതാശ്വാസ ക്യാമ്പുകളിലേക്ക് സാധനങ്ങള് കൊടുക്കുന്നവര് ആവുന്നത്ര സാനിട്ടറി നാപ്കിനുകള് കൂടി ഉള്പ്പെടുത്തുക. ആര്ത്തവവും ഈ പ്രളയദുരിതത്തിലൊന്നാണ് :( എല്ലാ പെണ്ണുങ്ങളെയും അവരുടെ ഗര്ഭപാത്രങ്ങളെയും പരിഗണിക്കുക.
സകലമാന അഴുക്കു ചാലുകളും നാം തന്നെ അഴുക്കാക്കിയ ഇടങ്ങളും മാലിന്യ കുന്നുകളും, ചാണക കുഴികളും, അറവ് മാലിന്യം, ഓരോ വീടിനുമുള്ള കക്കൂസ് മലിന്യവുമെല്ലാം പൊട്ടിയൊലിച്ചു കലങ്ങിയും, ആദ്യഘട്ടത്തിലും ഇപ്പോഴുമായി കൊല്ലപ്പെട്ട മൃഗങ്ങളുടെയും എലി, പെരുച്ചാഴി തുടങ്ങിയ ചെറു ജീവികളുടെയും അവശിഷ്ടങ്ങള്, ബാക്ട്ടീരിയകളും, ഫംഗസുകളും ഇടകലര്ന്ന മലിന ജലമാണ് മിക്കയിടത്തും. ഒഴുകി പോകുന്നു എന്നത് കൊണ്ട് മാത്രം അവയൊന്നും ക്ളീന് ആയിട്ടുണ്ടാവില്ല. അതെല്ലാം കൂടുതല് ബാധിക്കുക സ്ത്രീകളെയാണ്. പ്രളയകാലം കഴിഞ്ഞൊരു ദുരിതകാലം അല്പദിവസത്തേക്കെങ്കിലും ഉണ്ടാവും. സ്ഥിതിഗതികള് സാധാരണ നിലയിലാവാന് എടുക്കുന്ന സമയം വരെ. അതുവരെ ആരോഗ്യത്തോടെ നിലനില്ക്കാന് ശ്രമിക്കുക. സ്ത്രീകളുടെ ആര്ത്തവ കാലം ഇതിന്റെയിടയില് വരുമ്പോള് ബുദ്ധിമുട്ട് ഉണ്ടായേക്കാം. മുന്കൂട്ടി തയാറെടുപ്പുകള് എടുക്കുവാന് സാധിക്കാത്തവര് ഒരുപാട് ഉണ്ടാവാം. അവരെ സഹായിക്കാന് അയക്കുന്ന സാധനസാമഗ്രികളില് സാനിട്ടറി നാപ്കിനുകള് കൂടി ഉള്പ്പെടുത്താന് ശ്രമിക്കുക, ശ്രദ്ധിക്കുക...
https://www.facebook.com/Malayalivartha
