സംസ്ഥാനത്തിന്റെ വിവിധ ഭാഗങ്ങളില്‍ പ്രളയക്കെടുതിയില്‍പ്പെട്ട് ഒറ്റപ്പെട്ടവരെ രക്ഷപ്പെടുത്തുന്നതിനായുള്ള രക്ഷാപ്രവര്‍ത്തനങ്ങള്‍ക്ക് തടസം സൃഷ്ടിച്ച് വീണ്ടും മഴ ശക്തമാകുന്നു. തിരുവനന്തപുരം, ചെങ്ങന്നൂര്‍, തിരുവല്ല, ആലപ്പുഴ ജില്ലയുടെ വിവിധ പ്രദേശങ്ങള്‍, എറണാകുളം ജില്ലയുടെ ചില പ്രദേശങ്ങള്‍, കോട്ടയം തുടങ്ങിയ ഇടങ്ങളിലാണ് പുലര്‍ച്ചെ മുതല്‍ വീണ്ടും മഴ കനത്തത്.
്. രാവിലെ വിവിധയിടങ്ങളില്‍ രക്ഷാപ്രവര്‍ത്തനങ്ങള്‍ പുനഃരാരംഭിച്ചങ്കിലും കാലാവസ്ഥ വീണ്ടും പ്രതികൂലമായതോടെ പ്രവര്‍ത്തനങ്ങള്‍ കൂടുതല്‍ ദുഷ്‌കരമാവുയാണ്. എറണാകുളം ജില്ലയില്‍ ആലുവ യുസി കോളജില്‍ പ്രവര്‍ത്തിച്ചിരുന്ന ദുരിതാശ്വാസ ക്യാമ്പ് വെള്ളം കയറിയതിനേത്തുടര്‍ന്ന് ഇവിടെ നിന്നും മാറ്റി. ആലുവയുടെ രണ്ട് കിലോമീറ്റര്‍ ചുറ്റളവിലാണ് ഇവിടെ രക്ഷാപ്രവര്‍ത്തനങ്ങള്‍ നടക്കുന്നത്. അതിനിടെ പ്രളയ ബാധിത പ്രദേശങ്ങള്‍ സന്ദര്‍ശിക്കുന്നതിന് പ്രധാനമന്ത്രി നരേന്ദ്രമോദി തിരുവനന്തപുരത്തു നിന്നും പുറപ്പെട്ടു. മുഖ്യമന്ത്രി പിണറായി വിജയനും അദ്ദേഹത്തെ അനുഗമിക്കുന്നുണ്ട്. പ്രളയബാധിത പ്രദേശങ്ങള്‍ സന്ദര്‍ശിച്ച ശേഷം അദ്ദേഹം മുഖ്യമന്ത്രിയുടെ അധ്യക്ഷതയില്‍ ചേരുന്ന അവലോകന യോഗത്തിലും പങ്കെടുക്കും.

രാവിലെ രക്ഷാപ്രവര്‍ത്തനത്തിനായി കരസേനയുടെ 25 ബോട്ടുകള്‍ എത്തുമെന്നാണ് വിവരം. ജോധ്പൂരില്‍ നിന്നാണ് ബോട്ടുകള്‍ എത്തിക്കുക. ഇതില്‍ 15 എണ്ണം ചെങ്ങന്നൂരിലേക്കും 10 എണ്ണം തിരുവല്ലയിലേക്കുമാണ് എത്തിക്കുക. രാവിലെ ആറിന് ബോട്ടുകള്‍ എത്തുമെന്നാണ് പറഞ്ഞിരുന്നതെങ്കിലും എട്ടിനു ശേഷമേ ബോട്ടുകള്‍ എത്തുകയുള്ളുവെന്നാണ് ഇപ്പോള്‍ ലഭിക്കുന്ന സൂചന.