ശബരിമല സ്ത്രീ പ്രവേശത്തെ അംഗീകരിച്ചുകൊണ്ടുള്ള സുപ്രീം കോടതി ഉത്തരവിനെ രൂക്ഷമായി വിമര്‍ശിച്ച്‌ കോണ്‍ഗ്രസ് നേതാവും കെപിസിസി വര്‍ക്കിങ് പ്രസിഡന്റുമായ കെ സുധാകരന്‍ രംഗത്ത്. വിശ്വാസങ്ങളില്‍ കോടതി ഇടപെടേണ്ട എന്നും ആര്‍ത്തവം ശാരീരിക അശുദ്ധി തന്നെയാണെന്നും ഇതൊന്നും തിരുത്താനാവുന്ന കാര്യമല്ലെന്നും സുധാകരന്‍ പറഞ്ഞു. വിശ്വാസത്തിന്റെ കാര്യത്തില്‍ കോടതിക്ക് എന്ത് കാര്യമെന്നും കെ സുധാകരന്‍ ചോദിച്ചു.

ഇന്ത്യന്‍ ഭരണഘടന രൂപംകൊള്ളുന്നതിന് മുമ്പ് നിലനിന്നിരുന്ന വിശ്വാസമാണ് ഇതെല്ലാം. അത്തരം വിശ്വാസങ്ങള്‍ തിരുത്താന്‍ കഴിയില്ല. അതിന് ആരും ശ്രമിക്കേണ്ടതില്ല. ഇതിലൊക്കെ നിയന്ത്രണം കൊണ്ടുവരാനും നിയന്ത്രണം ഇല്ലാതാക്കാനും കോടതിക്ക് എന്താണ് അധികാരം? മുത്തലാഖ് നിയന്ത്രിക്കേണ്ടത് കോടതി അല്ല. ശരിയും തെറ്റും തീരുമാനിക്കേണ്ടത് മുസ്‌ലീം സമുദായത്തിലെ മതമേലധ്യക്ഷന്‍മാരാണ്. ക്രിസ്ത്യന്‍ മതത്തിലായാലും ഹിന്ദുമതത്തിലായാലും അവരുടെ കാര്യങ്ങള്‍ നോക്കേണ്ടത് ആ മതത്തിലുള്ളവരാണ്. അല്ലാതെ കോടതിയല്ലെന്ന് സുധാകരന്‍ കുറ്റപ്പെടുത്തി. ശബരിമല വിഷയത്തില്‍ ഗവണ്‍മെന്റും കോടതിയും കൈകടത്തുന്നത് എന്തിനാണ്? അമ്പലത്തില്‍ പോകുമ്പോള്‍ കുളിക്കണം. ശുദ്ധി ഉണ്ടാകണം. വ്രതം വേണം. ഇതൊന്നും വേണ്ട എന്ന് പറയേണ്ടത് കോടതി അല്ല എന്നും അദ്ദേഹം രൂക്ഷ ഭാഷയിൽ വിമർശിച്ചു.