ഒരു പ്രളയത്തില് നിന്നും കേരളം കരകയറിയിട്ടില്ല അതിനും മുമ്പേ പേടിപ്പെടുത്തി ന്യൂനമര്ദം; നേരത്തെ അറിയിപ്പ് നല്കിയില്ലെന്ന ആക്ഷേപത്തിന് വിരാമമിട്ട് സംസ്ഥാന സര്ക്കാരും ദുരന്തനിവാരണ അതോറിറ്റിയും; കനത്ത മഴയ്ക്കും കാറ്റിനും സാധ്യത മുന്നില് കണ്ട് ഒരുക്കങ്ങള് തകൃതി; യുദ്ധകാലാടിസ്ഥാനത്തില് മുന്നൊരുക്കങ്ങള് സ്വീകരിക്കാന് കലക്ടര്മാര്ക്ക് നിര്ദേശം
ഒരു പ്രളയത്തില് നിന്നും കേരളം കരകയറിയിട്ടില്ല പുനരുദ്ധാരണ പ്രവര്ത്തനങ്ങള് എങ്ങുമെങ്ങും എത്തിയിട്ടുമില്ല. അതിനും മുമ്പേ പേടിപ്പെടുത്തി കാലാവസ്ഥാ പ്രവചനവും മുഖ്യമന്ത്രിയുടെ മുന്കരുതല് പ്രഖ്യാപനവും. കഴിഞ്ഞ പ്രളയ സമയത്ത് ഏറെ വിമര്ശിക്കപ്പെട്ടതാണ് നേരത്തെ അറിയിപ്പ് കിട്ടിയില്ല എന്നത്. ഈയൊരു ആക്ഷേപത്തിന് വിരാമമിട്ട് സംസ്ഥാന സര്ക്കാരും ദുരന്തനിവാരണ അതോറിറ്റിയും രംഗത്തെത്തി. കനത്ത മഴയ്ക്കും കാറ്റിനും സാധ്യത മുന്നില് കണ്ട് ഒരുക്കങ്ങളാണ് നടക്കുന്നത്.
സംസ്ഥാനത്ത് ഇന്ന് മുതല് കനത്ത മഴയ്ക്കും കാറ്റിനും സാധ്യതയുള്ളതിനാല് കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നല്കിയിരിക്കുന്നത്. ലക്ഷദ്വീപിന് സമീപം ഞായറാഴ്ച ന്യൂനമര്ദം ശക്തമാകുന്നതോടെ കനത്ത മഴയ്ക്കും കാറ്റിനും സാധ്യതയുണ്ടെന്നാണ് അറിയിപ്പ്. മുഖ്യമന്ത്രി പിണറായി വിജയന്റെ അധ്യക്ഷതയില് ചേര്ന്ന ദുരന്ത നിവാരണ യോഗത്തില് നിര്ദേശങ്ങള് നല്കി.
ചുഴലിക്കാറ്റിനു സാധ്യതയുള്ളതിനാല് യുദ്ധകാലാടിസ്ഥാനത്തില് മുന്നൊരുക്കങ്ങള് സ്വീകരിക്കാന് കലക്ടര്മാര്ക്കു നിര്ദേശം നല്കിയതായി മുഖ്യമന്ത്രി പറഞ്ഞു. മലയോര മേഖലകളില് ഉരുള്പൊട്ടലിനും മണ്ണിടിച്ചിലിനും സാധ്യതയുള്ളതിനാല് ഇവിടങ്ങളില് താമസിക്കുന്നവര് കൂടുതല് ജാഗ്രത പാലിക്കണം. രാത്രി സഞ്ചാരം ഒഴിവാക്കണം. ക്യാംപുകള് തുറക്കുന്നതിന് കലക്ടര്മാര്ക്ക് നിര്ദേശം നല്കി.
ഏഴിന് കനത്ത മഴയ്ക്കു സാധ്യതയുള്ളതിനാല് ഇടുക്കി, പാലക്കാട്, തൃശൂര് ജില്ലകളില് റെഡ് അലര്ട്ട് പ്രഖ്യാപിച്ചു. സംസ്ഥാനത്താകെ ജാഗ്രതാ നിര്ദേശവുമുണ്ട്. മിക്ക ജില്ലകളിലും അഞ്ചു മുതല് ഏഴു വരെ യെല്ലോ അലര്ട്ട് പ്രഖ്യാപിച്ചു. ചില ജില്ലകളില് നാലിന് ഒറ്റപ്പെട്ട സ്ഥലങ്ങളില് കനത്ത മഴയുണ്ടാകും. ഇടുക്കിയില് നാലു മുതല് ആറു വരെ തീയതികളിലും തൃശൂരും പാലക്കാടും ആറിനും പത്തനംതിട്ടയില് ഏഴിനും ഓറഞ്ച് അലര്ട്ട് പ്രഖ്യാപിച്ചു.
https://www.facebook.com/Malayalivartha
