അയ്യപ്പാ ശരണം പൊന്നയ്യപ്പാ ശരണം കുമ്മനം വരണേ ശരണം പൊന്നയ്യപ്പാ... ആറന്മുള സമരം വിജയിപ്പിച്ച അയ്യപ്പസേവസംഘം നേതാവ് കൂടിയായ മിസോറാം ഗവര്ണര് കുമ്മനം രാജശേഖരന് വേണ്ടിയും ശരണം വിളി മുഴങ്ങുന്നു; ഗവര്ണര് സ്ഥാനം രാജിവച്ച് കുമ്മനം തിരിച്ചുവരുമെന്ന് സൂചന; ലോക്സഭാ തെരഞ്ഞെടുപ്പിന് മുമ്പ് കളം നിറയാന് കുമ്മനം
അയ്യപ്പ സേവാ സംഘത്തിന്റെ തലമുതിര്ന്ന നേതാവാണ് സാക്ഷാല് കുമ്മനം രാജശേഖരന്. അയ്യപ്പന് ഒരാപത്തു വന്നപ്പോള് കുമ്മനം രാജശേഖരന് ഉണ്ടായിരുന്നെങ്കില് കേരളം ആത്മാര്ത്ഥമായി ആഗ്രഹിക്കുന്നു. ഹിന്ദുക്കളെക്കാളുപരി എല്ലാവരും ആഗ്രഹിക്കുന്നതാണ് കുമ്മനത്തിന്റെ തിരിച്ചു വരവ്. കോടതി വിധിയെ മാനിക്കുമ്പോള് തന്നെ ഇന്ന് അമ്പലമെങ്കില് നാളെ പള്ളിയാകാമെന്ന വികാരമാണ് എവിടേയും വരുന്നത്. ഈ സമയത്താണ് നല്ലൊരു നേതാവായ കുമ്മനത്തിനായി ശരണം വിളി മുഴങ്ങുന്നത്.
മുഖ്യമന്ത്രി പിണറായി വിജയന് ശബരിമല വിഷയത്തില് സര്ക്കാരിന്റെ അഭിപ്രായം തുറന്ന് പറഞ്ഞതോടെയാണ് കുമ്മനത്തിനായി മുറവിളി ഉണ്ടായത്. ശബരിമലയില് പ്രായഭേദമന്യേ സ്ത്രീകളെ പ്രവേശിപ്പിക്കാനുള്ള സുപ്രീം കോടതി വിധിക്കെതിരേ സര്ക്കാരും തിരുവിതാംകൂര് ദേവസ്വം ബോര്ഡും പുനഃപരിശോധനാഹര്ജി നല്കില്ല എന്നാണ് സര്ക്കാര് പറയുന്നത്. വിശ്വാസികളുടെ വികാരം കണക്കിലെടുത്ത്, പുനഃപരിശോധനാഹര്ജി നല്കുന്ന കാര്യം ആലോചിക്കുമെന്നായിരുന്നു ദേവസ്വം ബോര്ഡ് പ്രസിഡന്റ് എ. പത്മകുമാറിന്റെ ആദ്യനിലപാട്. എന്നാല്, വിധി നടപ്പാക്കുന്നതു സംബന്ധിച്ച് കഴിഞ്ഞദിവസം ചേര്ന്ന ഉന്നതതലയോഗത്തില് പത്മകുമാറിനെ മുഖ്യമന്ത്രി പിണറായി വിജയന് രൂക്ഷമായി വിമര്ശിച്ചു. ഇന്നലത്തെ പത്രസമ്മേളനത്തില് പത്മകുമാറിനെ പരസ്യമായി തള്ളിപ്പറയുകയും ചെയ്ത മുഖ്യമന്ത്രി, കോടതിവിധി നടപ്പാക്കുകതന്നെ ചെയ്യുമെന്നു വ്യക്തമാക്കി.
വിധി നടപ്പാക്കാന് സര്ക്കാരും ദേവസ്വം ബോര്ഡും തീരുമാനിച്ചതോടെ നിലയ്ക്കല് മോഡല് സമരത്തിനാണു തയാറെടുക്കുന്നത്. ആവശ്യമെങ്കില്, മിസോറം ഗവര്ണര് സ്ഥാനം രാജിവയ്പ്പിച്ച് കുമ്മനം രാജശേഖരനെ സമരനായകനാക്കാനും നീക്കമുണ്ട്. ആറന്മുള സമരം, നിലയ്ക്കല് പ്രക്ഷോഭം നയിച്ചവരില് പ്രധാനി കുമ്മനമാണ്. ബി.ജെ.പി. നേതാക്കളായ കെ. സുരേന്ദ്രന്, ശോഭാ സുരേന്ദ്രന്, ഹിന്ദു ഐക്യവേദി നേതാവ് കെ.പി. ശശികല എന്നിവരെയും പ്രക്ഷോഭത്തില് മുന്നില്നിര്ത്തും. ആര്.എസ്.എസിന്റെ പങ്ക് അണിയറയിലാകും. സുപ്രീം കോടതി വിധിക്കെതിരേ ഹര്ത്താല് പ്രഖ്യാപിച്ചശേഷം പിന്വാങ്ങേണ്ടിവന്ന ശിവസേനയേയും ഒപ്പംകൂട്ടാന് നീക്കമാരംഭിച്ചു. മഹിളാമോര്ച്ച പ്രവര്ത്തകര് ഗൃഹസന്ദര്ശനങ്ങളിലൂടെ വിധിക്കെതിരേ പ്രചാരണം നടത്തും. പന്തളം, തിരുവിതാംകൂര് രാജകുടുംബാംഗങ്ങളുടെ പിന്തുണയും തേടും. വിധിയില് പ്രതിഷേധമുള്ള എന്.എസ്.എസ്, എസ്.എന്.ഡി.പി. യോഗം പ്രവര്ത്തകരെയും ഒരു കുടക്കീഴില് അണിനിരത്താന് ശ്രമിക്കും.
വിധി നടപ്പാക്കാനുള്ള സര്ക്കാര് നീക്കത്തിനെതിരേ സംസ്ഥാനവ്യാപകമായി ശക്തമായപ്രക്ഷോഭം നടത്താന് സംഘപരിവാറും തീരുമാനിച്ചു. ആദ്യം വിധിയെ സ്വാഗതം ചെയ്ത ആര്.എസ്.എസ്. നേതൃത്വം പിന്നീടു നിലപാട് മാറ്റിയിരുന്നു. വിധിക്കെതിരേ, വിശ്വാസികള് സ്വമേധയാ തെരുവിലിറങ്ങുകയും ചെയ്തതോടെയാണ് അപകടം മണത്ത സംഘപരിവാറും ബി.ജെ.പിയും പ്രക്ഷോഭം ശക്തമാക്കാന് തീരുമാനിച്ചത്.
ശബരിമല വിഷയത്തില് പുനഃപരിശോധനാ ഹര്ജി നല്കുമെന്നു ദേവസ്വം ബോര്ഡ് പ്രസിഡന്റ് പറഞ്ഞത് അദ്ദേഹത്തിന്റെ വ്യക്തിപരമായ തീരുമാനമായിരിക്കുമെന്നു മന്ത്രിസഭാ തീരുമാനങ്ങള് വിശദീകരിക്കവേ മുഖ്യമന്ത്രി പറഞ്ഞു. സുപ്രീം കോടതി വിധി നടപ്പാക്കാന് സര്ക്കാര് ബാധ്യസ്ഥമാണ്. ശബരിമല വിഷയത്തില് വിശ്വാസികള്ക്കിടയില് രണ്ടഭിപ്രായമുണ്ട്. അതെല്ലാം പരിശോധിച്ചാണു സുപ്രീം കോടതി അന്തിമവിധി പ്രഖ്യാപിച്ചത്. പുനഃപരിശോധനാ ഹര്ജി നല്കാന് ദേവസ്വം ബോര്ഡ് തീരുമാനിച്ചിട്ടില്ല. ബോര്ഡ് പ്രസിഡന്റിന്റേത് അദ്ദേഹത്തിന്റെ മാത്രം അഭിപ്രായമാണ്. വിധി വന്നശേഷം താന്തന്നെ ഉന്നതതലയോഗം വിളിച്ചിരുന്നു. വിധി നടപ്പാക്കാന് എല്ലാ സൗകര്യവും ഒരുക്കുന്നതിനെക്കുറിച്ചു സംസാരിച്ചിട്ട്, പുറത്തിറങ്ങി മറിച്ചൊരഭിപ്രായം പ്രകടിപ്പിച്ചാല് സര്ക്കാരും സംശയനിഴലിലാകും. സ്ത്രീകള്ക്കു ശബരിമലയില് പോകാന് സുപ്രീം കോടതി അനുമതി നല്കി. മറ്റൊരു നിയമം വരുന്നതുവരെ അതാണു നിയമം. അതു പാലിക്കാന് എല്ലാവരും ബാധ്യസ്ഥരാണ്. ബി.ജെ.പിയുടെ നിലപാട് എന്താണെന്നറിയില്ല. ആര്.എസ്.എസ്. സ്ത്രീപ്രവേശനം വേണമെന്ന നിലപാടാണു സ്വീകരിച്ചിരുന്നത്. അമ്പലത്തിലേക്കു പോകാന് തയാറായി ആരെങ്കില് വന്നാല് തടയാനാകുമോ? ശബരിമലയില് ഇതരസംസ്ഥാനങ്ങളില്നിന്ന് ഉള്പ്പെടെ കൂടുതല് വനിതാ പോലീസിനെ വിന്യസിക്കുമെന്നും മുഖ്യമന്ത്രി പറഞ്ഞു.
വിധിക്കെതിരേ പുനഃപരിശോധനാഹര്ജി നല്കില്ലെന്നു ദേവസ്വം ബോര്ഡ് പ്രസിഡന്റ് പത്മകുമാറും വ്യക്തമാക്കി. ഇന്നലെ ചേര്ന്ന ബോര്ഡ് യോഗത്തിലാണു തീരുമാനം. സ്ത്രീകള്ക്കായി നിലയ്ക്കലിലും പമ്പയിലും സന്നിധാനത്തും പ്രത്യേകസൗകര്യമൊരുക്കും. നിലയ്ക്കലിലെ നിര്മാണപ്രവര്ത്തനങ്ങള്ക്കായി കിഫ്ബിയില്നിന്നു 150 കോടി രൂപ വാങ്ങാന് ധാരണാപത്രം ഒപ്പുവച്ചു. 25 കോടി രൂപ ചെലവില് പമ്പയില് പുതിയ പാലം നിര്മിക്കും. മകരവിളക്കിനുശേഷം നിര്മാണമാരംഭിക്കും. ഹില് ടോപ്പില്നിന്നു പമ്പാഗണപതി ക്ഷേത്രത്തിലേക്കാണു പാലം. സുപ്രീം കോടതി വിധി നടപ്പാക്കാന് എന്തെല്ലാം ക്രമീകരണങ്ങള് ഒരുക്കിയെന്നു ഹൈക്കോടതി ദേവസ്വം ബോര്ഡിനോട് ആരാഞ്ഞിരുന്നു.
ഇതേത്തുടര്ന്നാണു പുനഃപരിശോധനാഹര്ജി വേണ്ടെന്നുവച്ചത്. വിശ്വാസികളായ സ്ത്രീകള്ക്കു ശബരിമലയിലെ ആചാരങ്ങളെക്കുറിച്ച് അറിവുണ്ടാകും. സുപ്രീം കോടതി വിധിയെക്കുറിച്ചു ബോര്ഡ് നിയമോപദേശം തേടിയിരുന്നു. നിയമോപദേശത്തിന്റെ അടിസ്ഥാനത്തിലേ പുനഃപരിശോധനാ ഹര്ജി നല്കുന്ന കാര്യം തീരുമാനിക്കൂവെന്നാണു താന് നേരത്തേ പറഞ്ഞതെന്നും പത്മകുമാര് വിശദീകരിച്ചു.
വിധിക്കെതിരായ വികാരം തിരിച്ചറിഞ്ഞ കോണ്ഗ്രസും പ്രത്യക്ഷ സമരത്തിനൊരുങ്ങുകയാണ്. ഇതിന്റെ ഭാഗമാണു സര്ക്കാരിനും ദേവസ്വം ബോര്ഡിനുമെതിരേ കടുത്തപ്രതികരണവുമായി പ്രതിപക്ഷനേതാവ് രമേശ് ചെന്നിത്തലയും കെ.പി.സി.സി. അധ്യക്ഷന് മുല്ലപ്പള്ളി രാമചന്ദ്രനും രംഗത്തെത്തിയത്. വിധിക്കെതിരേ തമിഴ്നാട്, ആന്ധ്രാപ്രദേശ്, കര്ണാടക സംസ്ഥാനങ്ങളിലും പ്രതിഷേധം ശക്തമായതോടെ ശബരിമല വിഷയം ദേശീയശ്രദ്ധയാകര്ഷിച്ചു. സാമൂഹികമാധ്യമങ്ങളിലും പ്രതിഷേധം ശക്തമാണ്.
https://www.facebook.com/Malayalivartha
