വീട്ടാവശ്യത്തിനുള്ള സിലിണ്ടറുകള്‍ ബുക്ക് ചെയ്ത് 5 ദിവസമായിട്ടും സിലിണ്ടര്‍ ലഭിച്ചെങ്കില്‍ ബുക്കിങ് റദ്ദാകുന്നു. ഉപഭോക്താവ് 5 ദിവസം കഴിഞ്ഞാല്‍ വീണ്ടും ബുക്ക് ചെയ്യണം. നേരത്തേ ഇത് ഒരാഴ്ച ആയിരുന്നു. ജീവനക്കാര്‍ അവധിയോ അസുഖം കാരണമോ ഏതെങ്കിലും ഭാഗത്തെ വിതരണം വൈകിയാല്‍ പലര്‍ക്കും സിലിണ്ടര്‍ കിട്ടാത്ത അവസ്ഥയുണ്ടെന്നാണ് ആരോപണം. അതുപോലെ ഒരു സിലിണ്ടര്‍ ലഭിച്ച് അടുത്തത് ബുക്ക് ചെയ്യാനുള്ള ഇടവേളയിലെ നിയന്ത്രണവും തുടരുകയാണ്.

ഒരു മാസമായി കാര്യമായ നിയന്ത്രണമില്ലാത്ത വിധത്തില്‍ സിലിണ്ടറുകള്‍ വിതരണം ചെയ്തിരുന്നെന്നും ഇപ്പോള്‍ രേഖാമൂലം അറിയിപ്പു വന്നതേയുള്ളൂവെന്നും ഏജന്‍സികള്‍ പറയുന്നു. അതേസമയം സിലിണ്ടര്‍ ക്ഷാമം തീര്‍ന്നെങ്കിലും പശ്ചിമേഷ്യന്‍ സംഘര്‍ഷം ആരംഭിക്കുന്നതിനു മുന്‍പത്തെ അപേക്ഷിച്ച് 75% വില അധികമായി ഇപ്പോള്‍ നല്‍കുന്നതിനാല്‍ ഭക്ഷണ വിതരണ മേഖലയില്‍ പ്രതിസന്ധി തുടരുകയാണെന്ന് ഹോട്ടലുടമകളും പറയുന്നു. ഭക്ഷണസാധനങ്ങളുടെ വില കുറയാത്തതിനാല്‍ ഉപഭോക്താക്കള്‍ക്കും നേട്ടമാകില്ല.

വാണിജ്യ സിലിണ്ടറുകള്‍ നിശ്ചിത ശതമാനം മാത്രമേ നല്‍കാവൂവെന്ന നിയന്ത്രണം ഏതാണ്ട് പൂര്‍ണമായും നീങ്ങിയിട്ട് ഒരു മാസത്തോളമായെന്നാണ് വിവരം. ഒടിപി നിബന്ധനയിലും കടുംപിടിത്തം നീങ്ങിയിരുന്നു. ഇതോടെ ആവശ്യക്കാര്‍ക്കെല്ലാം സിലിണ്ടര്‍ നല്‍കാനായിരുന്നു. ഇപ്പോള്‍ ഔദ്യോഗിക അറിയിപ്പ് വന്നതോടെ കടലാസിലും ആശ്വാസം വന്നു എന്നു മാത്രം.

വാണിജ്യ സിലിണ്ടര്‍ ക്ഷാമം കാരണം ജില്ലയില്‍ 30% ഹോട്ടലുകള്‍ പൂട്ടിപ്പോയിരുന്നുവെന്നു ഹോട്ടലുടമകള്‍ പറയുന്നു. പാചകവാതകത്തിന് ബദല്‍ സംവിധാനങ്ങളായി ആധുനിക അടുപ്പുകളും മറ്റും വ്യാപകമാകുകയും ചെയ്തു. സിലിണ്ടര്‍ വിതരണത്തില്‍ ഇളവ് വന്നതനുസരിച്ച് പൂട്ടിപ്പോയ സ്ഥാപനങ്ങള്‍ പലതും തുറന്നു തുടങ്ങി. വോട്ട് ചെയ്യാന്‍ നാട്ടില്‍ പോയ ഇതര സംസ്ഥാന തൊഴിലാളികളും എത്തിയതോടെ കൂടുതല്‍ സ്ഥാപനങ്ങള്‍ പുനരാരംഭിച്ചു. വാണിജ്യ സിലിണ്ടര്‍ കണക്ഷന്‍ ഉള്ളവര്‍ക്ക് മാത്രമേ ഒടിപി ഉപയോഗിച്ച് സിലിണ്ടര്‍ ലഭിക്കൂവെന്ന സ്ഥിതി താല്‍ക്കാലിക തട്ടുകടകളെയും മറ്റും ബാധിച്ചിരുന്നു. ഇതെല്ലാം നിലവില്‍ ഒഴിവായി. സ്വകാര്യ കമ്പനികളുടെ സിലിണ്ടറിന് 4000 മുതല്‍ 6000 രൂപ വരെ നല്‍കേണ്ടിയിരുന്ന സ്ഥിതിയും ഇപ്പോള്‍ മാറിയെന്ന് ഹോട്ടലുടമകള്‍ പറയുന്നു. അതേസമയം സംഘര്‍ഷത്തിന് മുന്‍പത്തെ അവസ്ഥയിലേക്ക് സിലിണ്ടറിന്റെ വിലയും കുറയ്ക്കണമെന്നും അവര്‍ ആവശ്യപ്പെടുന്നു.