ഇതെന്റെ ജീവിതമാണ്; നിങ്ങളുടെ രാഷ്ട്രീയ മുതലെടുപ്പിനുള്ളതല്ല; 'മീടൂ' ക്യാംപെയ്നിലൂടെ നടന് മുകേഷിനെതിരെ ആരോപണങ്ങളുന്നയിച്ച മലയാളി കാസ്റ്റിങ് ഡയറക്ടര് ടെസ് ജോസഫ് വിശദീകരണവുമായി രംഗത്ത്
'മീടൂ' ക്യാംപെയ്നിലൂടെ നടന് മുകേഷിനെതിരെ ആരോപണങ്ങളുന്നയിച്ച മലയാളി കാസ്റ്റിങ് ഡയറക്ടര് ടെസ് ജോസഫ് വിശദീകരണവുമായി രംഗത്ത്. താന് നടത്തിയ വെളിപ്പെടുത്തല് രാഷ്ട്രീയവല്ക്കരിച്ചതിനെ ടെസ് രൂക്ഷ ഭാഷയിലാണ് വിമര്ശിച്ചത്. 'ഞാന് പറഞ്ഞ കാര്യങ്ങള് രാഷ്ട്രീയവല്ക്കരിക്കപ്പെട്ടതായി കാണുന്നു. പലരും അക്കാര്യം പറഞ്ഞു. ഒരുകാര്യം വ്യക്തമാക്കട്ടെ. ഇതെന്റെ ജീവിതമാണ്. നിങ്ങളുടെ രാഷ്ട്രീയ മുതലെടുപ്പിനുള്ളതല്ല. മുകേഷിന്റെ വീട്ടിലേക്കു മാര്ച്ച് നടത്തിയതും വിഷയം രാഷ്ട്രീയമായി ഏറ്റെടുത്തതും തെറ്റാണ്. രാഷ്ട്രീയപാര്ട്ടികള് എന്റെ കാര്യങ്ങളെ സ്വന്തം അജണ്ടകള്ക്കായി ഉപയോഗിക്കരുത്'- ടെസ് ട്വിറ്ററിലെ കുറിപ്പില് വ്യക്തമാക്കി.
സ്ത്രീകള്ക്കെതിരെ നടക്കുന്ന ചില പ്രശ്നങ്ങള്ക്കെതിരെ നിലപാടെടുക്കുകയായിരുന്നു ലക്ഷ്യം. സ്ത്രീകള്ക്കു പിന്തുണയും സുരക്ഷിതവുമായ സാഹചര്യം തൊഴിലിടങ്ങളില് വേണം. എന്താണ് 19 വര്ഷം കാത്തിരുന്നത് എന്ന് ഒരു മാധ്യമപ്രവര്ത്തകന് ചോദിച്ചു. കഴിഞ്ഞ മൂന്നുദിവസങ്ങളിലേക്കു നോക്കൂ. ഭയമില്ലാതെ, ആത്മവിശ്വാസത്തോടെ സ്ത്രീകള് അവരുടെ കഥകള് പറയുന്ന സാഹചര്യം കാണുന്നില്ലേ? വീട്ടുകാരുള്പ്പെടെ ഞാനുമായി അടുപ്പമുള്ളവര്ക്കെല്ലാം ഇക്കാര്യങ്ങള് വര്ഷങ്ങളായി അറിയാമായിരുന്നു. വിശ്വാസത്തോടെ പറയാന് വേദിയില്ലാതിരുന്നതുകൊണ്ടാണ് ഇതുവരെ മൗനം പാലിച്ചത്- ടെസ് പറഞ്ഞു.
കോടീശ്വരന് പരിപാടിയുടെ നടത്തിപ്പുകാരായിരുന്ന കമ്പനിയുടമയും പാര്ലമെന്റംഗവുമായ ഡെറക് ഒബ്രയാന് നല്ല രീതിയില് പിന്തുണച്ചതായും അവര് പറഞ്ഞു. ബോളിവുഡിനേയും മാധ്യമരംഗത്തേയും പിടിച്ചുലച്ച 'മീടൂ' ക്യാംപെയിനില് കുടുങ്ങുന്ന ആദ്യ മലയാള സിനിമാപ്രവര്ത്തകനാണു മുകേഷ്. ടെലിവിഷന് പരിപാടിയുടെ ചിത്രീകരണത്തിനിടെ ഹോട്ടലില് വച്ച് മുകേഷ് അതിരുവിട്ട് പ്രവര്ത്തിച്ചു എന്നാണു ടെസ് ജോസഫ് വെളിപ്പെടുത്തിയത്. മുറിയിലേക്ക് ഇടതടവില്ലാതെ ഫോണ് ചെയ്യുകയും പിന്നീട് ഹോട്ടലില് സ്വാധീനം ചെലുത്തി സ്വന്തം മുറിയ്ക്കടുത്തേക്ക് മാറ്റിച്ചുവെന്നുമാണു ടെസിന്റെ ആരോപണം. എന്നാല് ടെസിനെ അറിയില്ലെന്നാണു മുകേഷിന്റെ നിലപാട്. ആര്ക്കും ആരെയും തേജോവധം ചെയ്യാവുന്ന സ്ഥിതിയാണ് ഇപ്പോഴെന്നും മുകേഷ് പ്രതികരിച്ചു.
'മീ ടൂ' വെളിപ്പെടുത്തലിനു പിന്നാലെ മുകേഷിനെതിരെ കൊല്ലത്ത് വന് പ്രതിഷേധമുയര്ന്നു. എംഎല്എയുടെ ഓഫിസിലേക്കു കോണ്ഗ്രസ്, ബിജെപി പ്രവര്ത്തകര് മാര്ച്ച് നടത്തി. ആരോപണം ഗൗരവമുള്ളതാണെന്നു പ്രതിപക്ഷ നേതാവ് രമേശ് ചെന്നിത്തല പറഞ്ഞു. കൊല്ലത്തെ മുകേഷിന്റെ ഓഫിസിലേക്കു പ്രകടനം നടത്തിയ യൂത്ത് കോണ്ഗ്രസ് പ്രവര്ത്തകര് അര മണിക്കൂറോളം ദേശീയപാതയില് കുത്തിയിരുന്നു. എംഎല്എയുടെ കോലവും കത്തിച്ചു.
മഹിളാമോര്ച്ച പ്രവര്ത്തകര് എംഎല്എയുടെ ഓഫിസിലേക്കു മാര്ച്ച് നടത്തി. പരിസരത്തുണ്ടായിരുന്ന മുകേഷിന്റെ ചിത്രമുള്ള ഫ്ലെക്സ് ബോര്ഡുകള് കീറിക്കളഞ്ഞു. പ്രതിഷേധ സാധ്യത കണക്കിലെടുത്തു വീടിനും ഓഫിസിനും പൊലീസ് കാവല് ഏര്പ്പെടുത്തി. മുകേഷിനെതിരെയുള്ള ആരോപണത്തില് നടപടികള് നിയമപരമായി പോകട്ടെയെന്നു സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന് പറഞ്ഞു.
https://www.facebook.com/Malayalivartha
