വിലങ്ങാട് വനത്തിനുള്ളില്‍ കുടുങ്ങി വനംവകുപ്പ് അധികൃതര്‍ കഴിഞ്ഞ ദിവസം പുറത്തെത്തിച്ച യുവാക്കള്‍ക്കെതിരെ കേസെടുത്തു. വടകര കുരിക്കിലാട് സ്വദേശികളായ കരിപ്പാല്‍ ഫാസില്‍ (22) മൊട്ടേമ്മല്‍ ഫാസില്‍ (23), റഹ്മത്തില്‍ പി.പി. റാഹില്‍ (25) എന്നിവരാണ് വെള്ളിയാഴ്ച രാത്രി വിലങ്ങാട് വാളൂക്കിന് സമീപം വയനാടന്‍ മലനിരകളുടെ ഭാഗമായ കാട്ടില്‍ കുടുങ്ങിയത്.

ഇവര്‍ കാട്ടിലൂടെ കൂക്കിവിളിച്ചും മൊബൈലിന്റെ ഫ്‌ളാഷ്‌ലൈറ്റ് തെളിയിച്ചും നടന്നു. ഇത് പുറത്തുള്ള നാട്ടുകാര്‍ കേട്ടതോടെയാണ് ആരോ കാട്ടില്‍ കുടുങ്ങിയിട്ടുണ്ടെന്ന് വ്യക്തമായത്.

രാത്രി 10.45ഓടെ വനംവകുപ്പും നാട്ടുകാരും അഗ്‌നിരക്ഷാസേനയും ചേര്‍ന്ന് നടത്തിയ തിരച്ചിലിലാണ് ഇവരെ കണ്ടെത്തിയത്. വനത്തില്‍ അതിക്രമിച്ച് കയറിയതിനാണ് കേസ്. ആറുമാസം വരെ തടവ് ശിക്ഷ ലഭിക്കാവുന്ന കുറ്റമാണ് ഇവര്‍ക്കെതിരെ ചുമത്തിയിരിക്കുന്നത്. യുവാക്കളെ കുറ്റിയാടി വനംവകുപ്പ് ഓഫീസില്‍ എത്തിച്ച് ചോദ്യം ചെയ്യുകയാണ്.

അതിക്രമിച്ച് കയറിയതല്ല ദൃശ്യങ്ങളുംമറ്റും സോഷ്യല്‍ മീഡിയയില്‍ അടക്കം കണ്ടതിന്റെ അടിസ്ഥാനത്തിലാണ് ഇവിടെ എത്തിയതെന്നാണ് യുവാക്കള്‍ വനംവകുപ്പ് അധികൃതരോട് പറഞ്ഞത്. വന്യമൃഗങ്ങളടക്കം ഇറങ്ങുന്ന ചെങ്കുത്തായ പ്രദേശത്ത് കുടുങ്ങിയ യുവാക്കള്‍ തലനാരിഴയ്ക്കാണ് മറ്റ് അപകടങ്ങളിലൊന്നും പെടാതെ രക്ഷപ്പെട്ടത്.

തിരികക്കയം വെള്ളച്ചാട്ടം കണ്ടശേഷം വൈകീട്ട് അഞ്ചുമണിയോടെയാണ് കാട്ടില്‍ കയറിയതെന്ന് ഇവര്‍ പറഞ്ഞു. പുല്ലംപാറ വ്യൂപോയിന്റ് കാണുകയായിരുന്നു ലക്ഷ്യം. എന്നാല്‍, കരിപ്പാല്‍ ഫാസിലിന് വഴിതെറ്റി. ഇയാളെ കണ്ടെത്താന്‍ മറ്റു രണ്ടുപേരും കൂക്കിവിളിച്ചും മൊബൈലിന്റെ ഫ്‌ളാഷ്‌ലൈറ്റ് തെളിയിച്ചും നടന്നു. ഇത് പുറത്തുള്ള നാട്ടുകാര്‍ കേട്ടതോടെയാണ് ആരോ കാട്ടില്‍ കുടുങ്ങിയിട്ടുണ്ടെന്ന് വ്യക്തമായത്.

തുടര്‍ന്ന് നാട്ടുകാര്‍ വിവരമറിയിച്ചത് പ്രകാരമാണ് വനംവകുപ്പും അഗ്‌നിരക്ഷാസേനയും സ്ഥലത്തെത്തിയത്. നാട്ടുകാരും തിരച്ചിലില്‍ പങ്കുചേര്‍ന്നു. മൂന്നുമണിക്കൂറോളം തിരച്ചില്‍ നടത്തിയാണ് ഇവരെ കണ്ടെത്തിയത്. എട്ടുമണിവരെ ശബ്ദംകേട്ടെങ്കിലും പിന്നീട് ശബ്ദം കേള്‍ക്കാത്തതും വെളിച്ചംകാണാത്തതും ആശങ്ക ഉയര്‍ത്തിയിരുന്നു.

ഫാസിലിനെ കണ്ടതോടെയാണ് ഇവര്‍ കൂക്കിവിളിയും ഫ്‌ളാഷ് ലൈറ്റ് തെളിയിക്കുന്നതും നിര്‍ത്തിയത്. അപ്പോഴേക്കും നേരംവൈകിയതിനാല്‍ കുറേസമയം ഒരുസ്ഥലത്ത് ഇരുന്നു. ഇതിനിടെയാണ് തിരച്ചില്‍ നടത്തുന്ന വനംവകുപ്പ് ഉദ്യോഗസ്ഥരും നാട്ടുകാരും ഇവിടേക്കെത്തിയത്.