അന്താരാഷ്ട്ര ഹിന്ദു പരിഷത്ത് നേതാവ് പ്രവീണ്‍ തൊഗാഡിയ ശബരിമല രക്ഷാ മാര്‍ച്ചിന്റെ സമാപനത്തോട് അനുബന്ധിച്ച് 14ന് തലസ്ഥാനത്തെത്തും. ഇന്നലെ പന്തളത്ത് നിന്ന് അഞ്ച് ലക്ഷം ഭക്തരുമായാണ് അഖില ഹിന്ദു പരിഷത്ത് ശബരിമല രക്ഷായാത്ര തിരുവനന്തപുരത്തേക്ക് ആരംഭിച്ചത്. ഒരു സംഘടനയുടെയും ബാനര്‍ ഇല്ലാതെ ആബാലവൃദ്ധം അയ്യപ്പ ഭക്തന്മാരെയും പങ്കെടുപ്പിച്ചാണ് ശബരിമല രക്ഷാ മാര്‍ച്ച് എന്ന പേരില്‍ നാമജപ ഘോഷയാത്ര നടത്തുന്നത്. വിശ്വഹിന്ദു പരിഷത്തുമായുള്ള ഭിന്നതയെ തുടര്‍ന്നാണ് തൊഗാഡിയ അന്താരാഷ്ട്ര ഹിന്ദു പരിഷത്ത് ആരംഭിച്ചത്. ഇദ്ദേഹവുമായി ഏറെ അടുപ്പമുള്ള മലയാളിയായ പ്രതീഷ് വിശ്വനാഥിന് ഏറെ അടുപ്പമാണുള്ളത്. ശബരിമല വിഷയത്തില്‍ ബി.ജെ.പിയുടെയും ആര്‍.എസ്.എസിന്റെയും പൊള്ളത്തരം തുറന്ന് കാട്ടാന്‍ തൊഗാഡിയയെ കൊണ്ടുവരുന്നത് പ്രതീഷാണ്. 

വിശ്വഹിന്ദു പരിഷത്തിന്റെ മുന്‍ വര്‍ക്കിങ് പ്രസിഡണ്ടാണ് പ്രവീണ്‍ തൊഗാഡിയ. ശബരിമലയില്‍ സ്ത്രീകളെ പ്രവേശിപ്പിക്കണമെന്ന സുപ്രീംകോടതി വിധിക്കെതിരെ കേന്ദ്ര-സംസ്ഥാന സര്‍ക്കാരുകള്‍ ഓര്‍ഡിനന്‍സ് ഇറക്കും വരെ സെക്രട്ടറിയേറ്റ് നടയില്‍ സമരം തുടരുമെന്ന് ഹിന്ദു ഹെല്‍പ് ലൈന്‍ നേതാവ് കൂടിയായ പ്രതീഷ് വിശ്വനാഥന്‍ പറഞ്ഞു. ഞായറാഴ്ച നൂറുകണക്കിന് അമ്മമാരും സഹോദരിമാരും സെക്രട്ടേറിയറ്റ് നടയിലെത്തിച്ചേരുമെന്നും അദ്ദേഹം പറഞ്ഞു. വിശ്വഹിന്ദു പരിഷത്ത് നേതാവ് സാധ്വി ബാലിക സരസ്വതി മാര്‍ച്ചില്‍ പങ്കാളിയായിട്ടുണ്ട്. വിശ്വ ഹിന്ദു പരിഷത്തിന്റെ സ്വാധി പ്രാചിയും അടുത്ത ദിവസങ്ങളില്‍ എത്തിച്ചേരുമെന്ന് അറിയുന്നു. രാജ്യത്ത് നിന്ന് മുസ്്‌ലിംകളെ തുടച്ച് നീക്കണമെന്ന് ആവശ്യപ്പെട്ട് പ്രക്ഷോഭം നയിക്കുന്നയാളാണ് സ്വാധി പ്രാചി.

അന്തര്‍ രാഷ്ട്രീയ ഹിന്ദു പരിഷത്തിന്റെയും ഹിന്ദു ഹെല്‍പ് ലൈനിന്റെയും നേതാവായ പ്രതീഷ് വിശ്വനാഥന്‍ ലോങ് മാര്‍ച്ചിന്റെ പ്രധാന സംഘാടകരിലൊരാളാണ്. അന്തര്‍ രാഷ്ട്രീയ ഹിന്ദു പരിഷത്തേ് ദേശീയ ജനറല്‍ സെക്രട്ടറിയാണ് ഇദ്ദേഹം. ശബരിമലയില്‍ യുവതീ പ്രവേശനം നടപ്പാക്കണമെന്ന് വിധി പുറപ്പെടുവിച്ച സുപ്രീംകോടതി നടപടിയിലും അത് നടപ്പാക്കാനൊരുങ്ങുന്ന കേരള സര്‍ക്കാര്‍ നിലപാടിലും പ്രതിഷേധിച്ചാണ് സംഘപരിവാര്‍ സംഘടനകളുടെയും എന്‍എസ്എസ്സിന്റെയും നേതൃത്വത്തില്‍ നടക്കുന്ന ലോങ് മാര്‍ച്ചിനും ഇവര്‍ പിന്തുണ നല്‍കുന്നുണ്ട്. ബി.ജെ.പിയുമായും ആര്‍.എസ്.എസുമായും ഏറെക്കാലമായി അകന്ന് കഴിയുകയാണ് തൊഗാഡിയ. മോദി തന്നെ കൊല്ലാന്‍ ശ്രമിച്ചെന്ന് ഏതാനും മാസം മുമ്പ് തൊഗാഡിയ ആരോപിച്ചിരുന്നു. 

മാറാട് കലാപത്തെ തുടര്‍ന്ന് കോഴിക്കോടെത്തിയ പ്രവീണ്‍ തൊഗാഡിയ നടത്തിയ പ്രസംഗം വിവാദമായിരുന്നു. തുടര്‍ന്ന് കേസ് എടുത്തിരുന്നു. വര്‍ഗീയ വിദ്വേഷം പടര്‍ത്തുന്ന രീതിയില്‍ പ്രസംഗിച്ചു എന്നതിനായിരുന്നു കേസ് രജിസ്റ്റര്‍ ചെയ്തത്. ആ കേസില്‍ പ്രതി ചേര്‍ക്കപ്പെട്ടിരുന്ന കുമ്മനം രാജശേഖരന്റെ അപേക്ഷയെ തുടര്‍ന്ന് ഉമ്മന്‍ചാണ്ടി സര്‍ക്കാര്‍ കേസും പിന്‍വലിച്ചിരുന്നു.