വിശ്വാസികള്‍ക്ക് ശബരിമലയിലെത്താന്‍ എല്ലാ വിധ സംരക്ഷണം നല്‍കുമെന്നും എന്നാല്‍ ആക്ടിവിസ്റ്റുകള്‍ക്ക് ശക്തി തെളിയിക്കാനുള്ള ഇടമായി ശബരിമലയിലെ പുണ്യഭൂമിയെ മാറ്റില്ലെന്നും ദേവസ്വംമന്ത്രി കടകംപള്ളി സുരേന്ദ്രന്‍ വ്യക്തമാക്കി. യുവതികളെ സന്നിധാനത്തേക്ക് എത്തിക്കുന്നതിന് മുമ്പ് യുവതികളുടെ പശ്ചാത്തലം പൊലീസ് അന്വേഷിക്കേണ്ടതായിരുന്നു. ശബരിമലയെ സംഘര്‍ഷ ഭൂമിയാക്കാന്‍ അനുവദിക്കില്ലെന്നും അദ്ദേഹം വ്യക്തമാക്കി. പൊലീസ് സംരക്ഷണയില്‍ സന്നിധാനത്തെത്തിയ യുവതികളെ തിരിച്ചയയ്ച്ച ശേഷം മാദ്ധ്യമങ്ങളോട് സംസാരിക്കുകയായിരുന്നു അദ്ദേഹം.

സന്നിധാനത്ത് ആരാധനയ്ക്കു വേണ്ടി ഭക്തരായിട്ടുള്ളവര്‍ വരുന്നുവെന്നാണ് കരുതിയത്. ഭക്തര്‍ വന്നാല്‍ അവര്‍ക്ക് സംരക്ഷണം നല്‍കാനുള്ള ഉത്തരവാദിത്വം സര്‍ക്കാരിനുണ്ട്. എന്നാല്‍ വന്നത് ഭക്തരല്ല ആക്ടിവിസ്റ്റുകളെന്ന് ദേവസ്വം മന്ത്രി. ആക്ടിവിസ്റ്റുകള്‍ സന്നിധാനത്തേക്ക് വന്നത് ബോധപൂര്‍വ്വം പ്രശ്‌നങ്ങളുണ്ടാക്കാനാണ്. ആക്ടിവിസ്റ്റുകള്‍ക്ക് പോകേണ്ട ഇടമല്ല ശബരിമലയെന്നും അദ്ദേഹം പറഞ്ഞു.

ആക്ടിവിസ്റ്റുകളുടെ ശക്തി തെളിയിക്കാനുളള ഇടമായും  അവരുടെ ചില നിലപാടുകള്‍ സാധിച്ചെടുക്കാനുള്ള സ്ഥലമായി പുണ്യഭൂമിയെ മാറ്റരുതെന്നുമാണ്  അവരോട് പറയാനുള്ളതെന്നും മന്ത്രി.