ഹൈന്ദവ വിശ്വാസി അല്ലാത്ത കഴക്കൂട്ടംകാരി മേരി സ്വീറ്റിയെ കളത്തിലിറക്കിയതാര്? വിവാദം പുകയുന്നു. രഹനയും കവിതയും പരാജയപ്പെട്ടാല്‍ തൊട്ടു പിറകെ മേരി സ്വീറ്റിയെ കൂടി തയാറെടുത്തു നിര്‍ത്തിയത് ആസൂത്രിതമാണെന്നാണ് റിപ്പോര്‍ട്ടുകള്‍.

ദേവസ്വം മന്ത്രി കടകംപള്ളി സുരേന്ദ്രന്റെ മണ്ഡലമാണ് കഴക്കൂട്ടം. കഴക്കൂട്ടത്ത് കടകംപള്ളിയോട് വിരോധമുള്ളവര്‍ ഏറെ. മേരി സ്വീറ്റിയ്ക്കു പിന്നില്‍ ബി ജെ പി ക്കാരെന്നു സി പി എം ആരോപിയ്ക്കുമ്പോള്‍ തിരിച്ചു ഇത് കടകംപള്ളിയുടെ ഓപ്പറേഷനാണെന്ന് ബി ജെ പി യും പറയുന്നു.

നാളിതു വരെ ഒരുവിധ അയ്യപ്പ വിശ്വാസവും കാണിച്ചിട്ടില്ലാത്ത മേരിയെ ശബരിമലയില്‍ എത്തിച്ചവരെ ചൊല്ലിയാണ് ഇപ്പോള്‍ തര്‍ക്കം. എന്നാല്‍ താനിനിയും വരുമെന്നും മല ചവിട്ടുമെന്നും മേരി പറയുന്നു.

ശബരിമല പ്രവേശനത്തിന് രണ്ട് യുവതികള്‍ എത്തിയതിന്റെ പ്രതിഷേധം കെട്ടടങ്ങുന്നതിനു മുന്‍പായിരുന്നു പ്രായപരിധി കഴിയാത്ത മറ്റൊരു സ്ത്രീ കൂടി ഇന്ന് ശബരിമല കയറാനെത്തിയത്. കഴക്കൂട്ടം സ്വദേശിയും ഗള്‍ഫ് പ്രവാസിയുമായ മേരി സ്വീറ്റി സ്വാമി അയ്യപ്പന്‍ റോഡ് വരെ എത്തി. ഇവരുടെ സാന്നിധ്യം അറിഞ്ഞ പോലീസ് സുരക്ഷാപ്രശ്‌നമുണ്ടെന്ന് അറിയിക്കുകയും താല്‍പര്യമുണ്ടെങ്കില്‍ പോകാമെന്നും അറിയിച്ചു. ഭക്തര്‍ ശരണം വിളി തുടങ്ങിയതോടെ പോലീസ് ഇവരെ പമ്പയിലേക്ക് മടക്കി കൊണ്ടുപോകുകയായിരുന്നു.

മേരി സ്വീറ്റി ശബരിമല സന്ദര്‍ശനത്തിന് എത്തിയ വിവരം അറിഞ്ഞ് അവരുടെ തിരുവനന്തപുരം കഴക്കൂട്ടത്തെ വീട്ടിലേക്ക് പ്രതിഷേധ മാര്‍ച്ച് നടന്നു. ബി.ജെ.പി, കോണ്‍ഗ്രസ് പ്രവര്‍ത്തകരാണ് കഴക്കൂട്ടത്തെ വീട്ടിലേക്ക് മാര്‍ച്ച് നടത്തിയത്.

താനും അയ്യപ്പന്റെ ഭക്തയാണെന്നും 46 വയസ്സ് പിന്നിട്ടയാളാണെന്നും മേരി സ്വീറ്റി പറഞ്ഞു. അയ്യപ്പന്റെ അനുഗ്രഹമുണ്ടെങ്കില്‍ താന്‍ ദര്‍ശനം നടത്തും. തന്നിലുള്ള ബാഹ്യശക്തിയാണ് ഇവിടെ എത്തിച്ചത്. വിദ്യാരംഭ ദിവസമായ ഇന്നുതന്നെ അയ്യപ്പനെ കാണണമെന്നാണ് ആഗ്രഹമെന്നും അവര്‍ പറഞ്ഞു. പ്രതിഷേധമുണ്ടെങ്കിലും പരമാവധി മല കയറുമെന്നും അവര്‍ പറഞ്ഞു.