നമ്മുടെ നാട് ഇതെങ്ങോട്ടാണ് പോകുന്നത്? ഇത്രയും മനുഷ്യത്വമില്ലാത്ത പെരുമാറാൻ നമുക്കെങ്ങനെ കഴിയുന്നു? പഞ്ചാബിലെ അമൃത്‌സറില്‍ വെള്ളിയാഴ്ച വൈകുന്നേരം നടന്ന ട്രെയിൻ അപകടത്തിൽ 61 പേര്‍ മരിക്കുകയും 143 പേര്‍ക്ക് പരിക്കേല്‍ക്കുകയും ചെയ്തു.

എന്നാൽ അപകടത്തെക്കാൾ നടുക്കുന്നതായിരുന്നു അപകടമറിഞ്ഞു അവിടെ എത്തിയവരുടെ പെരുമാറ്റം .അപകടത്തില്‍ മരണപ്പെട്ടവരുടെ മൃതദേഹം തിരികെ ലഭിക്കുമ്പോള്‍ അവരുടെ പക്കലുണ്ടായിരുന്ന സ്വര്‍ണവും പണവും മൊബൈല്‍ഫോണുകളും എല്ലാം നഷ്ടമായിരുന്നു . സഹായത്തിനായി കൈ നീട്ടിക്കരയുന്നവരിൽ നിന്നും മൊബൈൽ ഫോണുകളും സ്വർണവും തട്ടിപ്പറിക്കുന്നു.

17 കാരനായ ജ്യോതി കുമാര്‍ എന്ന യുവാവ് അപകടത്തില്‍ മരണപ്പെട്ടിരുന്നു. ‘സിവിക് ആശുപത്രിയില്‍ വെച്ചാണ് അവന്റെ മൃതദേഹം തങ്ങള്‍ ആദ്യം കാണുന്നത്. അവന്റെ കൈവശമുണ്ടായിരുന്ന പേഴ്‌സും മൊബൈലും സ്വര്‍ണവും എല്ലാം നഷ്ടപ്പെട്ട നിലയിലായിരുന്നു. – പിതാവ് വാസു പറയുന്നു.

‘ മകന് പകരം മറ്റൊന്ന് കിട്ടിയിട്ടും കാര്യമില്ല. തിരിച്ചുകിട്ടാന്‍ വേണ്ടിയുമല്ല ഇത് പറയുന്നത്. പക്ഷേ ഇത്തരം ദുരന്തങ്ങള്‍ക്കിടയിലും മനുഷ്യത്വരഹിതമായി പെരുമാറുന്ന ഒരു പറ്റം ആളുകളെ തുറന്നുകാണിക്കാന്‍ വേണ്ടി മാത്രമാണ് ഇത് – അദ്ദേഹം പറയുന്നു

ഭീകരമായ അപകടം നടന്നതിനു ശേഷം നിരവധിയാളുകള്‍ വീഡിയോ എടുക്കുന്നതിന്റെയും സെല്‍ഫി എടുക്കുന്നതിന്റെയും തിരക്കിലായിരുന്നുവത്രേ .. അപകടത്തിന്റെ വീഡിയോകളും അപകടസ്ഥലത്തു നിന്നുള്ള സെല്‍ഫികളും സമൂഹമാധ്യമങ്ങളിലും മറ്റും ഷെയര്‍ ചെയ്ത് ലൈക്കുകളും കമന്റുകളും വാരിക്കൂട്ടുന്നതിലായിരുന്നു പലരുടെയും ശ്രദ്ധ .

ഇത്തരക്കാരെ വിമര്‍ശിച്ച് പ്രമുഖ നേതാക്കള്‍ രംഗത്തെത്തുകയും ചെയ്തിരുന്നു. ആളുകള്‍ക്കിടയിലേക്ക് ട്രെയിന്‍ പാഞ്ഞുകയറിയിട്ടും ശാന്തരായി എങ്ങനെയാണ് ഫോട്ടോകളും വീഡിയോയും പകര്‍ത്താന്‍ കഴിയുക എന്നതാണ് എല്ലാവരെയും അമ്പരപ്പിക്കുന്നത്