കാനഡയിലേക്ക് പോയ എയര് ഇന്ത്യ വിമാനം തിരികെ വിളിച്ചു
കാനഡയിലേക്ക് പ്രവേശിക്കാന് അനുമതിയില്ലാത്ത വിമാനത്തെ അബദ്ധത്തില് കാനഡയിലെ വാന്കൂവറിലേക്ക് അയച്ച് എയര് ഇന്ത്യ. മണിക്കൂറുകളോളം പറന്ന ശേഷമാണ് വിമാനം ഡല്ഹിയിലേക്ക് മടങ്ങിയത്. ചൈനീസ് വ്യോമാതിര്ത്തിയില് നിന്നാണ് വിമാനം ഡല്ഹിയിലേക്ക് തിരികെ എത്തിയത്. വിദേശ വിമാനക്കമ്പനികള്ക്ക് ഓരോ രാജ്യത്തും വ്യത്യസ്തമായ പ്രോട്ടോക്കോളുകളാണുള്ളത്. ചില രാജ്യങ്ങള് പ്രത്യേക എയര്ലൈനുകള്ക്കോ പ്രത്യേക തരം വിമാനങ്ങള്ക്കോ മാത്രമാണ് അനുമതി നല്കുന്നത്. എയര് ഇന്ത്യയുടെ ബി 777 ഇആര് പതിപ്പിന് മാത്രമാണ് കാനഡ അനുമതി നല്കിയിട്ടുള്ളത്.
പശ്ചിമേഷ്യയിലെ യുദ്ധമേഖല ഒഴിവാക്കി കിഴക്കന് ദിശയിലൂടെയാണ് വിമാനം കാനഡയിലെ വാന്കൂവറിലേക്ക് പോയത്. കാനഡയിലേക്ക് സര്വീസ് നടത്താന് എയര് ഇന്ത്യയുടെ ബോയിംഗ് 777300 ഇആര് വിമാനങ്ങള്ക്ക് മാത്രമാണ് അനുമതിയുള്ളത്. അനുമതിയില്ലാത്ത ബി 777 എല്ആര് വിമാനത്തെയാണ് വ്യാഴാഴ്ച എയര് ഇന്ത്യ യാത്രക്കാരുമായി വാന്കൂവറിലേക്ക് അയച്ചത്.
വിമാനം നാല് മണിക്കൂറിലധികം പറന്ന് ചൈനീസ് വ്യോമാതിര്ത്തിയിലെ കുന്മിങിന് അടുത്തെത്തിയപ്പോഴാണ് തങ്ങള്ക്ക് പറ്റിയ അബദ്ധം വിമാനക്കമ്പനി അധികൃതര് തിരിച്ചറിഞ്ഞത്. ഫ്ലൈറ്റ് ട്രാക്കിങ് സൈറ്റുകളുടെ റിപ്പോര്ട്ടുകള് അനുസരിച്ച് വ്യാഴാഴ്ച രാവിലെ 11:34ന് ഡല്ഹിയില്നിന്ന് പുറപ്പെട്ട വിമാനം വൈകുന്നേരം 7:19നാണ് തിരികെ ലാന്ഡ് ചെയ്തത്.
ഗുരുതരമായ പിഴവിനെ അതീവ ഗൗരവത്തോടെയാണ് കാണുന്നതെന്ന് എയര്ഇന്ത്യ പറഞ്ഞു. ഉത്തരവാദികളായവര്ക്കെതിരെ നടപടിയുണ്ടാകും. യാത്രക്കാര്ക്കും ജീവനക്കാര്ക്കും ഉണ്ടായ ബുദ്ധിമുട്ടില് കമ്പനി ഖേദം പ്രകടിപ്പിച്ചു. യാത്രക്കാര്ക്ക് ഹോട്ടലില് താമസസൗകര്യം ഏര്പ്പെടുത്തുകയും ഇന്ന് രാവിലെ മറ്റൊരു വിമാനത്തില് വാന്കൂവറിലേക്ക് അയയ്ക്കുകയും ചെയ്തതായി എയര് ഇന്ത്യ അറിയിച്ചു.
https://www.facebook.com/Malayalivartha
