വരാപ്പുഴയില്‍ ഞായറാഴ്ച ഉച്ച കഴിഞ്ഞാണ് സംഭവം. പെരുമ്ബാവൂര്‍ വാഴക്കുളം കോഴിക്കോടന്‍ വീട്ടില്‍ ജയന്റെ മകന്‍ വിഷ്ണു(26) ആണ് മരിച്ചത്. ഞായറാഴ്ച വൈകീട്ട് കൂട്ടുകാര്‍ക്കൊപ്പം കടമക്കുടി പുഴയില്‍ ചൂണ്ടയിടാന്‍ എത്തിയതാണ് യുവാവ്. നീന്തുന്നതിനിടെ പുഴയില്‍ മുങ്ങിത്താണ വിഷ്ണുവിനു വേണ്ടി കൂട്ടുകാര്‍ തിരച്ചില്‍ നടത്തിയെങ്കിലും കണ്ടെത്താനായിരുന്നില്ല. സെല്‍ഫി എടുക്കാന്‍ വേണ്ടി സാഹസികമായി ഫോണ്‍ കടിച്ച്‌ പിടിച്ച്‌ നീന്തിയ യുവാവ് മുങ്ങി മരിക്കുകയായിരുന്നു. വിഷ്ണു ചീനവലയില്‍ നിന്ന് സെല്‍ഫി എടുക്കാന്‍ പോകുകയായിരുന്നുവെന്ന് വിഷ്ണുവിന്റെ കൂട്ടുകാരാണ് പൊലീസിനോടു പറഞ്ഞത്.

പുഴയുടെ മധ്യത്തിലുള്ള ചീനവലയില്‍ നിന്നും സെല്‍ഫി എടുക്കാനുള്ള ശ്രമത്തിനിടെയാണ് ദാരുണസംഭവമുണ്ടായത്. തിങ്കളാഴ്ച ഉച്ചയോടെയാണ് മുങ്ങല്‍ വിദഗ്ദ്ധരും അഗ്‌നിശമന സേനാംഗങ്ങളും നാട്ടുകാരും ചേര്‍ന്ന് നടത്തിയ തിരച്ചിലില്‍ മൃതദേഹം കണ്ടുകിട്ടിയത്.