വൃശ്ചിക മാസ പൂജകള്ക്ക് നട തുറക്കാനിരിക്കെ എല്ലാ കണ്ണുകളും ഇനി സുപ്രീം കോടതിയിലേക്ക്... ആദ്യത്തെ 13 റിട്ട് ഹര്ജികളും മാറ്റിവച്ച ചീഫ് ജസ്റ്റിസ് അനുവദിച്ചത് ശബരിമല റിട്ട് ഹര്ജികള് മാത്രം; ചീഫ് ജസ്റ്റിന് രഞ്ജന് ഗഗോയില് ശബരിമല ഭക്തര്ക്ക് പ്രതീക്ഷ
യുവതീ പ്രവേശം അനുവദിക്കാതെ പ്രശ്നങ്ങളൊന്നുമില്ലാതെ ശബരിമല നടയടച്ചപ്പോള് വലിയ ആശ്വാസം. എന്നാല് ഇനി വരാനിരിക്കുന്നത് വൃശ്ചിക കാലമാണ്. അതിന് മുമ്പ് ഒരു തീരുമാനമായില്ലെങ്കില് വലിയ പ്രതിസന്ധിയുണ്ടാകും. ഈയവസരത്തിലാണ് എല്ലാ കണ്ണുകളും സുപ്രീം കോടതിയെ കേന്ദ്രീകരിക്കുന്നത്.
ശബരിമലയിലെ യുവതികളുടെ പ്രവേശനവുമായി ബന്ധപ്പെട്ട വിധിയില് സുപ്രീം കോടതിയില് ഫയല് ചെയ്തിട്ടുള്ള റിട്ട് ഹര്ജികള് പരിഗണിക്കവേ ചീഫ് ജസ്റ്റിസ് രഞ്ജന് ഗഗോയ് അനുവദിച്ചത് ശബരിമല മെന്ഷന് റിട്ട് ഹര്ജികള് മാത്രം. കഴിഞ്ഞ ദിവസം സുപ്രീം കോടതിയില് നടന്നത് വളരെ നിര്ണായകമായ നിമിഷങ്ങളായിരുന്നു.
കോടതി കൂടിയപ്പോള് ആദ്യ മെന്ഷനിങ് അഭിഭാഷകന് മനോഹര് ലാല് ശര്മ്മയുടെ വകയായിരുന്നു. ഇത് വരെ 19 റിവ്യൂ ഹര്ജികള് ആണ് സുപ്രീം കോടതിയില് ഈ കേസുമായി ബന്ധപ്പെട്ട് ഫയല് ചെയ്തിട്ടുള്ളത്. ചീഫ് ജസ്റ്റിസ് ഇന്ന് അടിയന്തിരമായി കേള്ക്കാം എന്ന് സമ്മതിച്ച ഏക ഹര്ജി ശബരിമലയും ആയി ബന്ധപ്പെട്ട ഈ രണ്ട് റിട്ട് ഹര്ജികള് ആണ്.
ശൈലജ വിജയന്റെ റിട്ട് ഹര്ജിയിലെ ആവശ്യം ഇതായിരുന്നു. സുപ്രീം കോടതി ഭരണഘടനാ ബഞ്ച് പുറപ്പെടുവിച്ച വിധിക്ക് പ്രഖ്യാപിത സ്വഭാവം ആണ് ഉള്ളത്. നിര്ദേശക സ്വഭാവം ഇല്ലാത്തതിനാല് സര്ക്കാര് തിരക്ക് പിടിച്ച് നടപ്പിലാക്കേണ്ട കാര്യമില്ല. ശബരിമല യുവതി പ്രവേശനത്തിന് ആയി സുപ്രീം കോടതിയെ സമീപിച്ചവരുടെ ഒരു മൗലിക അവകാശവും ലംഘിക്കപെട്ടിട്ടില്ല. എന്നാല് ഭരണഘടന ബെഞ്ച് കേള്ക്കാത്ത തന്നെപോലുള്ളവരുടെ മൗലിക അവകാശം ആയ ആരാധന സ്വാതന്ത്ര്യം ലംഘിക്കപ്പെട്ടു. അതിനാല് പുതിയ റിട്ട് ഹര്ജിയിലൂടെ കോടതി തങ്ങളുടെ വാദം കേള്ക്കണം.
എസ്. ജയ രാജ്കുമാറിന്റെ റിട്ട് ഹര്ജിയിലെ ആവശ്യം. കേന്ദ്ര സംസ്ഥാന സര്ക്കാരുകള് ആണ് ജയ രാജ് കുമാറിന്റെ റിട്ട് ഹര്ജിയിലെ പ്രധാന എതിര് കക്ഷികള്. ശബരിമലയിലെ ആചാരങ്ങള് സംരക്ഷിക്കാന് ആവശ്യമായ നിര്ദേശങ്ങള് നല്കണം എന്നാണ് ഹര്ജിയിലെ പ്രധാന ആവശ്യം.
ഇതിന് പുറമെ ശബരിമല കേസുമായി ബന്ധപ്പെട്ട് തമിഴ് നാട്ടില് നിന്നുള്ള രണ്ട് അഭിഭാഷകര് സുപ്രീം കോടതിയില് റിട്ട് ഹര്ജികള് ഫയല് ചെയ്തിട്ടുണ്ട്. അത് ഈ ഹര്ജികള്ക്ക് ഒപ്പം ലിസ്റ്റ് ചെയ്യുമോ എന്ന് അറിയില്ല.
ഇന്നലെ കോടതിയില് നടന്ന നടപടികള് ഏതെങ്കിലും നിലപാടുകളുടെ വിജയമോ പരാജയമോ ആയി വ്യാഖ്യാനിക്കാന് ആകില്ല. കേസിന്റെ അടിയന്തര പ്രധാന്യം കണക്കില് എടുത്ത് വേഗത്തില് കേള്ക്കാന് കോടതി തീരുമാനിച്ചു എന്ന് മാത്രമേ ഉള്ളു. എന്നാല് അടിയന്തിര പ്രാധാന്യം കോടതിക്ക് ബോധ്യമാകാന് കഴിഞ്ഞ ദിവസങ്ങളില് ഉണ്ടായ സംഭവങ്ങള് കാരണമായി എന്നും വിലയിരുത്താം. ശബരിമലയില് ഉണ്ടായ ഭക്തരുടെ വികാരം കൂടി പരിഗണിക്കുമെന്നാണ് കണക്കാക്കുന്നത്.
"
https://www.facebook.com/Malayalivartha
