തന്ത്രിയും മന്ത്രിമാരും തമ്മിലുള്ള തര്‍ക്കം തുടരുകയാണ്. മന്ത്രി ശമ്പളക്കാരനാണെന്ന് മന്ത്രി എംഎം മണിയും ഹര്‍ത്താല്‍ പോലെ നടയടച്ചിട്ട് പോകാന്‍ പറ്റുമോയെന്ന് പരിഹസിച്ച് മന്ത്രി ജി. സുധാകരനും രംഗത്തെത്തിയിരിക്കുകയാണ്. അതേസമയം തന്ത്രിക്ക് ശബരിമലയില്‍ വലിയ അധികാരമുണ്ടെന്നാണ് വിലയിരുത്തല്‍. 

ഹിന്ദുമത ധര്‍മ സ്ഥാപന നിയമത്തിലെ വ്യവസ്ഥകള്‍ പ്രകാരം 1952 ല്‍ പ്രസിദ്ധീകരിച്ച ഗസറ്റ് വിജ്ഞാപന പ്രകാരമുള്ള അധികാരവും ചുമതലയും മാത്രമേ ശബരിമലയില്‍ തന്ത്രി കണ്ഠരര് രാജീവര് നിര്‍വഹിച്ചിട്ടുള്ളൂവമെന്നു തിരുവിതാംകൂര്‍ ദേവസ്വം എംപ്‌ളോയിസ് ഫ്രണ്ട് അഭിപ്രായപ്പെട്ടു.

1952 ലെ വ്യവസ്ഥ സുപ്രീം കോടതി ഇതുവരെ ഒരു വിധിയിലും അസ്ഥിരപ്പെടുത്തിയിട്ടില്ല. അവിശ്വാസികളും ആക്ടിവിസ്റ്റുകളും ചേര്‍ന്നു ക്ഷേത്രാചാരങ്ങളെയും അനുഷ്ഠാനങ്ങളെയും അട്ടിമറിക്കുവാന്‍ നടക്കുന്ന ശ്രമങ്ങള്‍ ശബരിമലയെ കലാപ കേന്ദ്രമാക്കുന്ന സ്ഥിതിയിലേക്ക് എത്തിച്ചപ്പോള്‍ തന്ത്രി സ്വീകരിച്ച നിലപാടിനെ ആര്‍ക്കും എതിര്‍ക്കാനാവില്ലെന്നും ചൂണ്ടിക്കാട്ടുന്നു.

ശബരിമലയിലെ സമീപ കാല സംഭവങ്ങളില്‍ ഭക്തജന സമൂഹം ദുഖിതരാണ്, തിരുവിതാംകൂര്‍ ദേവസ്വം ബോര്‍ഡിന്റെ ഉത്തരവാദപ്പെട്ട സ്ഥാനങ്ങളില്‍ ഇരിക്കുന്നവര്‍ തന്ത്രിക്ക് എതിരായും യുവതീപ്രവേശത്തിന് അനുകൂലമായും നടത്തുന്ന പരസ്യ പ്രസ്താവനകള്‍ ദേവസ്വം ബോര്‍ഡിന്റെ നിലനില്‍പ്പിനെ തന്നെ ബാധിക്കുമെന്നും അവര്‍ പറഞ്ഞു.

വിശ്വാസ സമൂഹത്തിന്റെ അസ്വസ്ഥതയും വേദനയും ഉണ്ടാക്കിയ യുവതീ പ്രവേശ വിധിയെ തുടര്‍ന്നുമുണ്ടായ അവസ്ഥാ വിശേഷം തരണം ചെയ്യാന്‍ കേന്ദ്ര സംസ്ഥാന സര്‍ക്കാരുകള്‍ ഓര്‍ഡിനന്‍സ് കൊണ്ടു വരണമെന്നും പറഞ്ഞു.