കെ സി വേണുഗോപാലിനെതിരെയുള്ള സോളാർ കേസിന് പിന്നിൽ സംസ്ഥാനത്തെ കോൺഗ്രസ് നേതാക്കൾ? സരിത തനിക്കെതിരെ മൊഴി നൽകില്ലെന്ന വിശ്വാസത്തിലാണ് വേണുഗോപാൽ. അപ്പോൾ ചില കോൺഗ്രസ്
നേതാക്കൾ ഇടതൻമാരുടെ സഹായത്തോടെ സരിതയെ സ്വാധീനിച്ച് തനിക്കെതിരെ നീങ്ങിയതായി കെ.സി. കരുതുന്നു.

സംസ്ഥാന രാഷ്ട്രീയത്തിലേക്ക് കെ സി. കടന്നുവരുന്നു എന്ന വാർത്തകൾക്കിടയിലാണ് സോളാർ ആരോപണം ചൂടുപിടിച്ചത്. ഇതുവരെയും സോളാറിൽ കത്തിയമരാത്ത ആളാണ് കെ.സി. രാഹുൽ ഗാന്ധിയുമായുള്ള വേണുഗോപാലിന്റെ അടുപ്പം പണ്ടേ പ്രസിദ്ധമാണ്. കർണാടകത്തിൽ കുമാരസ്വാമി സർക്കാരിന്റെ രൂപീകരണത്തിലേക്ക് വഴിതെളിച്ചത് വേണുഗോപാലിന്റെ ഇടപെടലുകളാണ്. കേരളത്തിലും വേണുവിനെ ഇറക്കാൻ രാഹുൽ ആലോചിച്ചതിനു പിന്നിലെ കാരണവും ഇതു തന്നെയായിരുന്നു. കെ സി വേണുഗോപാൽ അടുത്ത മുഖ്യമന്ത്രിയാണെന്ന് വരെ കേരളത്തിൽ പ്രചരണമുണ്ട്. കേരളത്തിലെ പത്രങ്ങളിൽ ഇപ്പോൾ പ്രസിദ്ധീകരിക്കുന്ന സോളാർ വാർത്തകൾ കോൺഗ്രസ് നേതാക്കളുടെ സഹായത്തോടെ രാഹുൽ അറിയുന്നുണ്ടെന്നാണ് വിവരം.

കോൺഗ്രസ് നേതാക്കൾ ശരിക്കും പേടിക്കുന്നത് വേണുഗോപാലിനെയാണ്. വേണുവിന്റെ നീക്കങ്ങളെ ശ്രദ്ധയോടെയാണ് ഉമ്മൻ ചാണ്ടിയും ചെന്നിത്തലയും അടക്കമുള്ള നേതാക്കൾ നോക്കി കാണുന്നത്. ചെന്നിത്തലയാണ് വേണുവിനെ ഏറെ ഭയപ്പെടുന്നത്. കാരണം അടുത്ത മുഖ്യമന്ത്രിയാവാൻ കോട്ട് തയ്ച്ചയാളാണ് ചെന്നിത്തല. അതിനിടയിലാണ് ആലപ്പുഴ സീറ്റിൽ നിന്ന് രമേശ് ചെന്നിത്തല പാർലെമെന്റിലേക്ക് മതസരിക്കുമെന്ന വാർത്ത പുറത്തു വരുന്നത്. ഉമ്മൻ ചാണ്ടിയെയും ചെന്നിത്തലയെയും പാർലെമെന്റിലേക്കയക്കുമെന്ന വാർത്ത കേരളത്തിൽ സജീവമാണ്. രമേശ് ചെന്നിത്തല രാജിവയ്ക്കുന്ന ഒഴിവിൽ ഹരിപ്പാട് നിന്നും വേണുഗോപാൽ നിയമസഭയിലേക്ക് മത്സരിക്കുമെന്നും വാർത്ത വന്നിരുന്നു. പെട്ടെന്നാണ് ഉമ്മൻചാണ്ടിക്കും കെ സിക്കുമെതിരെ സോളാർ ആരോപണം ഉയർന്നത്.

എൻ എസ് എസുമായി ഏറെ അടുപ്പം പുലർത്തുന്ന നേതാവാണ് കെ സി വേണുഗോപാൽ. അദ്ദേഹത്തെ കേരളത്തിന്റെ മുഖ്യമന്ത്രിയാക്കിയാൽ അതിന് എൻ എസ് എസിന്റെ പിന്തുണമുണ്ടാവും. ക്രൈസ്തവ സഭകളുമായും വേണുവിന് ഏറെ അടുപ്പമുണ്ട്. യുഡി എഫിലെ ഘടക കക്ഷികൾക്കും അദ്ദേഹം പ്രിയങ്കരനാണ് . വ്യക്തിപരമായ ചില ആരോപണങ്ങൾ ഒഴിച്ചു നിർത്തിയാൽ അദ്ദേഹത്തിനുള്ളത് ക്ലീൻ ഇമേജാണ്. നിരവധി തവണ ജന പ്രതിനിധിയായെങ്കിലും അദ്ദേഹത്തിന്റെ പേരിൽ അഴിമതി ആരോപണങ്ങൾ ഉണ്ടായിട്ടില്ല. കേന്ദ്രത്തിൽ മന്ത്രിയായപ്പോഴും ഇതുതന്നെയായിരുന്നു അവസ്ഥ. എല്ലാവരോടും പ്രസാദാതമകമായി സംസാരിക്കുന്നയാളാണ് വേണുഗോപാൽ.

ഇടതുപക്ഷത്തിനും കണ്ണിലെ കരടായി മാറിയിരിക്കുകയാണ് വേണുഗോപാൽ. ഇടതുപക്ഷം കഴിയുന്നതെല്ലാം ശ്രമിച്ചു വേണുവിനെ കേസിൽ കുരുക്കാൻ നീക്കം നടത്തും . ഒന്നിച്ചു നിൽക്കുന്ന ഹൈന്ദവരെ ഒരുമിച്ച് ചേർക്കാൻ കോൺഗ്രസിനു വേണുവിലൂടെ കഴിയും എന്ന് ഇടതുപക്ഷവും കരുതുന്നു.അതാണ് ബിജെപിയുടെയുടെയും ഭയം. അതിനാണ് പുതിയ കേസിലൂടെ ഇടതുപക്ഷം ശ്രമിക്കുന്നത്.

കേരളത്തിലെ പ്രമുഖ കോൺഗ്രസ് നേതാവ് കേസിന് പിന്നിലുണ്ടെന്ന് വേണുപക്ഷം കരുതുന്നു. വേണുവിന് കേരളത്തിൽ ഗ്രൂപ്പുണ്ട്. അതിൽ അണികൾ കുറവായിരിക്കാം. എന്നാൽ വരും ദിവസങ്ങളിൽ വേണുവിന്റെ ഗ്രൂപ്പ് ശക്തി പ്രാപിക്കും. അതിനുമുമ്പു തന്നെ വേണുവിനെ തകർക്കാനാണ് ശ്രമം. മല്ലേലിൽ ശ്രീധരൻ നായരെ സോളാർ കേസിൽ രംഗത്തിറക്കി ഉമ്മൻ ചാണ്ടിയെ അവസാനിപ്പിക്കാൻ ശ്രമിച്ചത് ഒരു പ്രമുഖ കോൺഗ്രസ് നേതാവാണെന്ന കാര്യം അരിയാഹാരം കഴിക്കുന്ന മലയാളികൾക്കെല്ലാം അറിയാം. അതേ തന്ത്രം വേണുവിനോടും പയറ്റുന്നു. അതേസമയം വേണു തന്ത്രശാലിയാണ്. ചിലപ്പോൾ കോടതിയിൽ നൽകാൻ പോകുന്ന രഹസ്യ മൊഴിയിൽ സോളാർ നായിക വേണുവിന്റെ പേര് തന്നെ പറഞ്ഞില്ലെന്ന് വരാം. എങ്കിൽ അതോടെ തീരും വേണു കേസിന്റെ കഥ.പക്ഷേ അതിന് സാധ്യത കുറവാണ്.