ജനങ്ങളെ കലാപത്തിന് ഇറക്കാനായി ശബരിമല വിധിയിലെ ആദ്യ നിലപാടില് നിന്ന് കോണ്ഗ്രസ് വ്യതിചലിച്ചെന്ന് മുഖ്യമന്ത്രി, ഒരു കെ.പി.സി.സി അംഗം ബി.ജെ.പിയുമായി ചേര്ന്ന് കഴിഞ്ഞെന്നും കാറ്റ് എങ്ങോട്ടാണ് വീശുന്നതെന്ന് വ്യക്തമാണെന്നും കെ. സുധാകരനെതിരെ മുഖ്യമന്ത്രിയുടെ ഒളിയമ്പ്
ഒരു കെ.പി.സി.സി അംഗം ബി.ജെ.പിയുമായി ചേര്ന്ന് കഴിഞ്ഞെന്നും കാറ്റ് എങ്ങോട്ടാണ് വീശുന്നതെന്ന് വ്യക്തമാകുന്നെന്നും കെ. സുധാകരനെതിരെ ഒളിയമ്പുമായി മുഖ്യമന്ത്രി പിണറായി വിജയന്. ശബരിമല സമരത്തിന് ബി.ജെ.പി ക്ഷണിച്ചപ്പോള് കോണ്ഗ്രസ് നേതാവ് ഓടിയെത്തി. ബി.ജെ.പി ക്ഷണിച്ചിട്ടാണ് താന് എത്തിയതെന്ന് പരസ്യമായി പറഞ്ഞു. എന്നിട്ട് ആര്.എസ്.എസ് ആക്രമണങ്ങളെ ന്യായീകരിച്ച് രംഗത്തെത്തി. കാറ്റ് എങ്ങോട്ടാണ് വീശുന്നതെന്ന് വ്യക്തമാക്കണമെന്നും മുഖ്യമന്ത്രി പറഞ്ഞു. ശബരിമല കോടതി വിധിയെ തുടര്ന്ന് കോണ്ഗ്രസും ബി.ജെ.പിയും പ്രക്ഷോഭവുമായി ഇറങ്ങിയിരിക്കുകയാണ്. വര്ഗീയ ധ്രുവീകരണം സൃഷ്ടിച്ച് രാഷ്ട്രീയ ലാഭം കൊയ്യുകയാണ് ലക്ഷ്യം. ശബരിമലയെ മുന്നിര്ത്തി രാഷ്ട്രീയം കളിച്ച് ലാഭം കൊയ്യാന് പലരും ശ്രമിക്കുന്നെന്നും മുഖ്യമന്ത്രി പറഞ്ഞു.
കോണ്ഗ്രസുകാര് ഓര്ക്കുക, ശബരിമല യുവതീ പ്രവേശന വിധി ചരിത്രപരമെന്നാണ്് എ.ഐ.സി.സി പറഞ്ഞത്. എന്നാല് സംസ്ഥാന കോണ്ഗ്രസിലെ ഒരു വിഭാഗം ആളുകള് കോണ്ഗ്രസിനെ തകര്ച്ചയിലേക്ക് എത്തിക്കാനാണ് ശ്രമിക്കുന്നത്. സ്ത്രീപ്രവേശനവുമായി ബന്ധപ്പെട്ട മുംബയ് കോടതി വിധി മഹാരാഷ്ട്ര സര്ക്കാര് നടപ്പാക്കി. ശബരിമലവിധി നടപ്പാക്കുന്നതിന് ആവശ്യമായ നിരോധനനിയമങ്ങള്, സോഷ്യല് മീഡിയ നിയന്ത്രണം, എന്നിവ നടത്താമെന്ന് ഉപദേശിച്ച് കേന്ദ്ര ആഭ്യന്തരമന്ത്രാലയം സംസ്ഥാന സര്ക്കാരിന് കത്തയച്ചെന്നും മുഖ്യമന്ത്രി പറഞ്ഞു.
വിധി നടപ്പാക്കണമെന്നാണ് കോണ്ഗ്രസ് നേതാക്കള് ആദ്യം പറഞ്ഞത്. ജനങ്ങളെ കലാപത്തിന് ഇറക്കാനായി പിന്നീട് നിലപാടില് നിന്നും വ്യതിചലിക്കുകയായിരുന്നു. ബിജെപിയുടെ അജണ്ടയുമായി ചേര്ന്ന് പ്രവര്ത്തിക്കാനുള്ള ഒരു സംഘം ആളുകള് കോണ്ഗ്രസിലുണ്ട്. അത് കോണ്ഗ്രസിനെ തകര്ക്കും എന്നത് ഓര്ത്താല് നല്ലതാണെന്ന് മുഖ്യമന്ത്രിഓര്മിപ്പിച്ചു. കോടതിയില് പ്രത്യക്ഷ നിലപാട് സ്വീകരിക്കാത്തവര് രാഷ്ട്രീയ ലാഭത്തിനുവേണ്ടി ശബരിമലയെ ഉപയോഗിക്കാന് ശ്രമിക്കുന്നത് അംഗീകരിക്കാനാകില്ല. ആരാണ് വര്ഗീയ ശക്തികളുടെ തോളത്ത് ചാരി നില്ക്കുന്നതെന്ന് നാട് കാണുകയാണെന്നും മുഖ്യമന്ത്രി വ്യക്തമാക്കി.
https://www.facebook.com/Malayalivartha
