സ്‌കൂള്‍ ബസുകളിലെ ജി.പി.എസ്. ഘടിപ്പിക്കല്‍ പൂര്‍ത്തിയായശേഷം സ്വകാര്യ ബസുകളിലും ജി.പി.എസ്. നിര്‍ബന്ധമാക്കാന്‍ മോട്ടോര്‍ വാഹന വകുപ്പ്. നഗരത്തിലൂടെയുള്ള സ്വകാര്യ ബസുകളുടെ അമിതവേഗം നിയന്ത്രിക്കാന്‍ കഴിയാത്ത സാഹചര്യത്തിലാണ് ജി.പി.എസ്. ഘടിപ്പിക്കുന്നത്. നഗരത്തിലൂടെ പാഞ്ഞെത്തുന്ന സ്വകാര്യ ബസുകള്‍ക്ക് വേഗം കുറയ്ക്കുന്നതുള്‍പ്പെടെ നിര്‍ദേശങ്ങള്‍ നല്‍കിയിട്ടുണ്ടെങ്കിലും നിരത്തിലിറങ്ങുമ്പോള്‍ പാലിക്കാറില്ല.
ഡോര്‍ ഇല്ലാത്ത ബസുകളും അപകടാവസ്ഥയിലായ സീറ്റുകളുള്ള ബസുകളും നിരത്തിലുണ്ട്. ഇളകിയ സീറ്റുകള്‍ കയര്‍ കൊണ്ട് കെട്ടിയിരിക്കുന്ന നിലയിലും കാണാം. ഇവ കണ്ടുപിടിക്കാന്‍ മോട്ടോര്‍വാഹന വകുപ്പിന് കഴിയാതെപോകുന്നു. ചെറുവാഹനങ്ങളെ തട്ടിയിട്ട് പാഞ്ഞുപോകുന്നതാകട്ടെ നഗരത്തില്‍ പതിവുകാഴ്ചയും. ആളുകള്‍ കയറുന്നതിനുമുമ്പ് വാഹനം എടുക്കുന്നതും സ്‌റ്റോപ്പുകളില്‍ എത്തിയാല്‍ തിടുക്കം കൂട്ടി ആളുകളെ ഇറക്കുന്നതും നിത്യസംഭവമായി മാറിയിരിക്കുകയാണ്. പലപ്പോഴും പ്രായമായ സ്ത്രീകളും കൈക്കുഞ്ഞുമായെത്തുന്നവരും ബസ് ജീവനക്കാരുമായി വാക്കുതര്‍ക്കത്തിലേര്‍പ്പെടാറുണ്ട്.

ഒരേ റൂട്ടില്‍ സര്‍വീസ് നടത്തുന്ന ബസുകള്‍ തമ്മിലുള്ള മിനിറ്റുകളുടെ വ്യത്യാസം മറികടക്കുന്നതിനാണ് മരണപ്പാച്ചിലെന്ന് യാത്രക്കാര്‍ പറയുന്നു. ഇതുമൂലം കാല്‍നടക്കാരെപ്പോലും വകവയ്ക്കാതെയാണ് മത്സരയോട്ടം.മത്സരയോട്ടത്തിനിടയില്‍ സ്‌റ്റോപ്പുകളില്‍ നിര്‍ത്താന്‍ മടിക്കുന്നതായും കണ്ടുവരുന്നുണ്ട്. ഇതിനെല്ലാം പരിഹാരമായാണ് സ്വകാര്യ ബസുകള്‍ക്ക് ജി.പി.എസ്.സംവിധാനം ഏര്‍പ്പെടുത്താനൊരുങ്ങുന്നതെന്ന് അധികൃതര്‍ പറയുന്നു.
സ്വകാര്യബസ് ഡ്രൈവര്‍മാര്‍ക്ക് ആവശ്യമായ നിര്‍ദേശവും പരിശീലനവും നല്‍കാറുണ്ട്. എങ്കിലും നിരത്തിലിറങ്ങുമ്പോള്‍ പഴയ പടിയാകും. ഇതിനു മാറ്റം വരണമെങ്കില്‍ ഇലക്ട്രോണിക് മോണിറ്ററിങ് ആവശ്യമാണ്. സ്‌കൂള്‍ ബസുകളില്‍ ജി.പി.എസ്. ഘടിപ്പിക്കുന്ന പ്രവര്‍ത്തനം കഴിയുമ്പോള്‍ രണ്ടാംഘട്ടമെന്ന നിലയില്‍ തുടങ്ങാനാണ് പദ്ധതി. കൂടാതെ ബസുകളില്‍ അപകടാവസ്ഥയിലായ സീറ്റ് ഉണ്ടെന്ന് കണ്ടാല്‍ ജനങ്ങള്‍ക്ക് ബസിന്റെ നമ്പരും പേരുമായി മോട്ടോര്‍ വാഹന വകുപ്പിനെ സമീപിക്കാം. ഉടന്‍ നടപടിയുണ്ടാകും.