ശബരിമല വിഷയത്തില്‍ സര്‍ക്കാരിനെതിരെ പരസ്യമായ പോരിന് പന്തളം കൊട്ടാരം രംഗത്തെത്തി. മുഖ്യമന്ത്രിയുടെ വാദങ്ങളെ ഭക്തിയും യുക്തിയും ഉപോയിച്ച് കൊട്ടാരം നിര്‍വാഹക സമിതി പ്രസിഡന്റ് ശശികുമാരവര്‍മയും മറ്റ് അംഗങ്ങളും പ്രതിരോധിച്ചു. അയ്യപ്പഭക്തരെ അവര്‍ണരെന്നും സവര്‍ണരെന്നും പറഞ്ഞ് തമ്മിലടിപ്പിക്കാന്‍ ശ്രമിച്ചാല്‍ നടക്കില്ല. പുശ്ചത്തോടെയുള്ള വിമര്‍ശനത്തില്‍ വിഷമമുണ്ടെന്നും മുഖ്യമന്ത്രിയുടെ പേരെടുത്ത് പറയാതെ ശശികുമാര വര്‍മ വ്യക്തമാക്കി. ആചാരലംഘനം നടന്നാല്‍ ചോദ്യം ചെയ്യാന്‍ ഞങ്ങള്‍ക്ക് വകാശമുണ്ട്. ഭക്തരെ ജാതിയുടെ പേരില്‍ തമ്മിലടിപ്പിക്കാനുള്ള ശ്രമം നടക്കില്ല. നാട്ടുകാരുടെ പൈസ കൊണ്ട് ജീവിക്കുന്നവരല്ല പന്തളം കൊട്ടാരത്തിലുള്ളവരെന്നും അദ്ദേഹം വ്യക്തമാക്കി.

50 ലക്ഷം രൂപ ദേവസ്വം ബോര്‍ഡ് ക്ഷേത്രങ്ങള്‍ക്ക് നല്‍കുന്നത് ഏല്ലാ ക്ഷേത്രങ്ങളും ഏറ്റെടുത്ത ശേഷമാണെന്നും ശശികുമാര വര്‍മ വ്യക്തമാക്കി. ദേവസ്വം ബോര്‍ഡ് ക്ഷേത്രങ്ങളിലെ വരുമാനം സര്‍ക്കാര്‍ എടുക്കുന്നില്ല. മലഅരയന്‍മാരാണ് ശബരിമല ക്ഷേത്രം സംരക്ഷിച്ചിരുന്നത്. മലയരയന്‍മാര്‍ക്ക് വിളക്ക് കൊളുത്താനുള്ള അവകാശം തിരികെ നല്‍കണമെന്ന് ആവശ്യപ്പെട്ട് പന്തളം കൊട്ടാരം കേസ് കൊടുത്തിട്ടുണ്ടെന്നും ശശികുമാര വര്‍മ പറഞ്ഞു. ചെയ്യേണ്ടവര്‍ ഒന്നും ചെയ്യാത്തതിനാലാണ് കൊട്ടാരം ഇടപെട്ടതെന്നും ശശികുമാര വര്‍മ വ്യക്തമാക്കി. 

ക്ഷേത്രത്തില്‍ സ്്ത്രികള്‍ പ്രവേശിച്ചാല്‍ അടച്ചിടുമെന്ന് തന്ത്രി പറഞ്ഞത് ശുദ്ധികലശം നടത്താന്‍ വേണ്ടിയാകാം. മറ്റേതെങ്കിലും തരത്തിലാണെങ്കില്‍ തന്ത്രിയോട് ചോദിക്കണം. കോടതി വിധി അംഗീകരിക്കുന്നെന്നും കേന്ദ്ര ഗവണ്‍മെന്റിന്റെ ശ്രദ്ധയില്‍ ഇക്കാര്യം ധരിപ്പിച്ചിട്ടുണ്ട്. ശബരിമലയിലെ പ്രത്യേകതകള്‍ അറിയിച്ചിട്ടുണ്ട്. ശബരിമലയില്‍ തന്ത്രി ബ്രഹ്മചാരിയായിരിക്കണമെന്ന് നിയമമില്ല. പ്രതിഷ്ഠാ സമയത്തെ കാര്യം വെച്ചാണിത് പറയുന്നത്. ഇക്കാര്യം ആദ്യമായാണ് കേള്‍ക്കുന്നതെന്നും ശശികുമാര വര്‍മ പറഞ്ഞു.