മുഖ്യമന്ത്രി ശബരിമല അയ്യപ്പ വിശ്വാസികളോട് യുദ്ധപ്രഖ്യാപനം നടത്തുകയാണെന്ന് പ്രതിപക്ഷനേതാവ് രമേശ് ചെന്നിത്തല ആരോപിച്ചു. എന്ത് വില കൊടുത്തും യുവതികളെ സന്നിധാനത്ത് എത്തിക്കണമെന്ന മുഖ്യമന്ത്രിയുടെ ഉത്തരവ് നടക്കാതെ പോയത് തന്ത്രിയുടെയും പന്തളം രാജ കുടംബത്തിന്റെയും കടുത്ത നിലപാട് കാരണമാണ്. പൊലീസ് വേഷമിടവുവിച്ച് വന്‍ പൊലീസ് സന്നാഹത്തോടെ യുവതികളെ നടപ്പന്തല്‍ വരെ എത്തിച്ചെങ്കിലും തുടര്‍ന്ന് പതിനെട്ടാം പാടി കയറ്റാന്‍ കഴിയാതെ പോയത് ക്ഷേത്രം അടച്ചിടുമെന്ന തന്ത്രിയുടെ മുന്നറിയിപ്പ് മൂലമാണ്. യുവതികളെ കയറ്റിയത് പോലെ തന്നെ പൊലീസിന് തിരിച്ചറക്കേണ്ടി വന്നു. അതിന്റെ രോഷമാണ് ഇപ്പോള്‍ തീര്‍ക്കുന്നതെന്നും അദ്ദേഹം ചൂണ്ടിക്കാട്ടി.

ക്ഷേത്രത്തിലെ പൂജകളുടെയും, ആചാരങ്ങളുടെയും കാര്യത്തില്‍ അവസാന വാക്ക് തന്ത്രി തന്നെയാണ്. അത് കോടതി പോലും അംഗീകരിച്ചതാണ്. ഇത് പലതവണ ഹൈക്കോടതിയും, സുപ്രിം കോടതിയും അംഗീകരിച്ചാതാണ്. അക്കാര്യം മറന്ന് കൊണ്ടാണ് മുഖ്യമന്ത്രി തന്ത്രിക്കെതിരെ കലി തുള്ളിയത്. . ശബരിമലയുടെ കാര്യത്തില്‍ മഹേന്ദ്രന്‍ വേഴ്‌സസ് തിരുവിതാംകൂര്‍ ദേവസ്വം ബോര്‍ഡ് കേസില്‍ ഹൈക്കോടതി വളരെ വ്യക്തമായി തന്നെ വിധി പ്രഖ്യാപിച്ചിട്ടുണ്ട്. താഴമണ്‍ കുടംബമാണ് ശബരിമലയിലെ പരമ്പരാഗത തന്ത്രി കുടംബമെന്നും, ശബരിമല ക്ഷേത്രത്തിലെ ആത്മീയാനുഷ്ഠനാങ്ങളുടെയും ആചാരങ്ങളുടെയും അവസാന വാക്ക് തന്ത്രിയുടേതാണെന്ന് ദേവസ്വം ബോര്‍ഡ് സത്യവാങ്ങ്മൂലം നല്‍കുകയും ഹൈക്കോടതി അത് അംഗീകരിക്കുകയും ചെയ്തിട്ടുണ്ട്. ദേവസ്വം ബോര്‍ഡ് ആ സത്യവാങ്ങ് മൂലത്തില്‍ ഉറച്ച് നില്‍ക്കുന്നുണ്ടോ? 

ഗുരുവായൂര്‍ അമ്പലം സംബന്ധിച്ച സി കെ രാജന്‍ വേഴ്‌സസ് സ്‌റ്റേറ്റ് ഓഫ് കേരള എന്ന കേസിലെ ക്ഷേത്രത്തിലെ ആചാരബദ്ധമായ കാര്യങ്ങളില്‍ തന്ത്രിയാണ് അവസാന വാക്കെന്ന് ഹൈക്കോടതി പറഞ്ഞിട്ടുണ്ട്. എം പി ഗോലാലകൃഷ്ണന്‍ നായര്‍ വേഴ്‌സസ് സ്‌റ്റേറ്റ് ഓഫ് കേരള എന്ന കേസില്‍ 2005 ലെ വിധിയിലും സുംപ്രിം കോടതി ഇത് വ്യക്തമാക്കിയിട്ടുണ്ട്. പന്തളം രാജാവ് അയ്യപ്പന്റെ പൃതൃസ്ഥാനീയനാണ് പന്തളം കൊട്ടാരത്തില്‍ നിന്ന് തിരുവാഭാരണങ്ങള്‍ എത്തിയാല്‍ മാത്രമെ ശബരിമലയിലെ മകരസംക്രമ പൂജ നടക്കുകയുളളു. ഇരുമുടി കെട്ടില്ലാതെ പതിനെട്ടാം പടി കയറാനുള്ള അവകാശം പന്തളം രാജാവിന് മാത്രമാണ്. ഇതെല്ലാം ആചാരങ്ങളനുസരിച്ചുള്ള അധികാരമാണ്. ഇതൊന്നും മുഖ്യമന്ത്രി വിചാരിച്ചാല്‍ മാറ്റാന്‍ കഴിയില്ല. പന്തളം കൊട്ടാരത്തിന് ശബരിമലയില്‍ അവകാശിമില്ലന്ന് പറയുന്ന മുഖ്യമന്ത്രി ഈ ആചാരങ്ങളെയും വിശ്വാസങ്ങളെയും വെല്ലുവിളിക്കുകയാണ്. 

കോടികള്‍ വിലമതിക്കുന്ന ശബരിമല തിരുവാഭരണം സൂക്ഷിച്ചിരിക്കുന്നത് പന്തളം കൊട്ടാരത്തിന്റെ അധീനതയിലുള്ള ക്ഷേത്രത്തിലാണ്. ഇത് ആചാരത്തിന്റെ ഭാഗമാണ്. ഇതും മാറ്റണമെന്ന് മുഖ്യമന്ത്രി പറയുമോ?. ശബരിമലയിലെ ആചാരങ്ങള്‍ പൊളിറ്റ് ബ്യുറോ തിരുമാനം കൊണ്ട് മാറ്റാന്‍ കഴിയില്ല. മുഖ്യമന്ത്രിയുടെ ഇപ്പോഴത്തെ നിലപാടില്‍ നിന്ന് ഒരു കാര്യം വ്യക്തമായി ശബരിമലയില്‍ ഉണ്ടായ പ്രശ്‌നങ്ങള്‍ക്കെല്ലാം പൂര്‍ണ്ണ ഉത്തരവാദി മുഖ്യമന്ത്രിയാണ്. . സുപ്രിം കോടതി വിധി നടപ്പാക്കുന്നതില്‍ മുഖ്യമന്ത്രി അനാവിശ്യമായ ധൃതിയാണ് കാണിച്ചത്. സാധാരണ ഇത്തരമൊരു വിധി കിട്ടിക്കഴിഞ്ഞാല്‍ അത് നടപ്പാക്കുന്നതിന് കാണിക്കുന്ന ഔദ്യോഗിക നടപടി ക്രമങ്ങളൊന്നും പാലിച്ചിട്ടില്ലെന്നും അദ്ദേഹം ചൂണ്ടിക്കാട്ടി.