പന്തളം കൊട്ടാരം സ്വീകരിച്ചേക്കാവുന്ന നിയമനടപടികള് സര്ക്കാരിനെയോ ദേവസ്വം ബോര്ഡിനെയോ ബാധിക്കില്ല... ശബരിമലയില് പന്തളം കൊട്ടാരത്തിന് ഒരു അധികാരവുമില്ല നിയമപരമായ ഏകാവകാശി ദേവസ്വം ബോര്ഡ് മാത്രം; സര്ക്കാരിന് കിട്ടിയ നിയമോപദേശമിങ്ങനെ...
ശബരിമലയില് പ്രായഭേദമന്യേ സ്ത്രീകളെ പ്രവേശിപ്പിക്കണമെന്ന സുപ്രീം കോടതി വിധിയേത്തുടര്ന്നുള്ള വാദപ്രതിവാദങ്ങള് പുതിയ തലത്തിലേക്ക്. യുവതികള് പ്രവേശിച്ചാല് നടയടച്ച് മടങ്ങുമെന്ന തന്ത്രി കണ്ഠര് രാജീവരരുടെ നിലപാടിനും തന്ത്രിക്കു നിര്ദേശം കൊടുക്കാന് അധികാരമുണ്ടെന്ന പന്തളം കൊട്ടാരത്തിന്റെ അവകാശവാദത്തിനും മുഖ്യമന്ത്രി ഇന്നലെ മറുപടി കൊടുത്തതോടെയാണു പുതിയ വിവാദം ഉടലെടുത്തത്. അതേസമയം തിരു-കൊച്ചി നാട്ടുരാജ്യങ്ങളിലെ ക്ഷേത്രങ്ങള് ദേവസ്വം ബോര്ഡുകള്ക്കു വിട്ടുകൊടുത്ത കവനന്റ് (ഉടമ്ബടി) പ്രകാരം പന്തളം കൊട്ടാരത്തിനു ശബരിമലയില് യാതൊരു അവകാശവുമില്ലെന്നു സര്ക്കാരിന് അഡ്വക്കേറ്റ് ജനറലിന്റെ നിയമോപദേശം.
തിരുവിതാംകൂര് രാജാവ് ബാലരാമവര്മയും കൊച്ചി രാജാവ് രാമവര്യും ഇന്ത്യന് സര്ക്കാരിനുവേണ്ടി അഡ്മിനിസ്ട്രേറ്റര് വി.പി. മേനോനുമാണ് 1949 ജൂലൈ ഒന്നിന് ഉടമ്ബടിയില് ഒപ്പിട്ടത്. പന്തളം രാജകുടുംബം ഉടമ്ബടിയില് കക്ഷിയേയല്ലെന്നു നിയമോപദേശത്തില് വ്യക്തമാക്കി.
പന്തളം കൊട്ടാരത്തിനു ശബരിമലയില് എന്തെങ്കിലും അവകാശമുണ്ടെന്നു തെളിയിക്കുന്ന രേഖകള് ലഭ്യമല്ല. ഉടമ്ബടിക്കു മുമ്ബുതന്നെ ശബരിമല ക്ഷേത്രം തിരിവിതാംകൂര് രാജാവിനു പന്തളം കൊട്ടാരം വിട്ടുകൊടുത്തിരുന്നു. അതിനാല് പന്തളം കൊട്ടാരം സ്വീകരിച്ചേക്കാവുന്ന നിയമനടപടികള് സര്ക്കാരിനെയോ ദേവസ്വം ബോര്ഡിനെയോ ബാധിക്കില്ല. ഐക്യകേരളം നിലവില് വന്നശേഷം ദേവസ്വം ബോര്ഡ് രൂപീകരിക്കണമെന്നും എല്ലാവര്ഷവും റവന്യൂ വരുമാനത്തില്നിന്നു സംസ്ഥാനസര്ക്കാര് 50 ലക്ഷം രൂപ ദേവസ്വം ബോര്ഡിനു കൈമാറണമെന്നും കരാറില് പറയുന്നു. ഒരുലക്ഷം രൂപ ഭണ്ഡാരം വകയായും കൈമാറണം. ദേവസ്വം ബോര്ഡ് നിലവില്വരുന്നതിനു മുമ്ബ് രാജ്യപ്രമുഖിനാണു ക്ഷേത്രങ്ങളുടെ ഭരണച്ചുമതല നല്കിയത്. അതുപ്രകാരം തിരുവിതാംകൂര് രാജാവായായിരുന്നു ആദ്യത്തെ രാജ്യപ്രമുഖ്. 1956-ല് സംസ്ഥാനം രൂപീകരിച്ചശേഷം ദേവസ്വം ബോര്ഡ് രൂപീകൃതമായി.
ഇതോടെ രാജ്യപ്രമുഖിന്റെ അധികാരം ബോര്ഡിനു ലഭിച്ചു. അന്നുമുതല് ശബരിമല ക്ഷേത്രത്തിന്റെ നിയമപരമായ ഏകാവകാശി ദേവസ്വം ബോര്ഡാണ്. എ.ജിയുടെ നിയമോപദേശത്തിന്റെ അടിസ്ഥാനത്തിലാണു കഴിഞ്ഞദിവസം മുഖ്യമന്ത്രി പിണറായി വിജയന് പന്തളം കൊട്ടാരത്തിനും തന്ത്രിക്കുമെതിരേ ശക്തമായി ആഞ്ഞടിച്ചതെന്നാണു സൂചന. അതേസമയം ശബരിമലയില് പന്തളം രാജകുടുംബത്തിന്റെ അധികാരം സംബന്ധിച്ച ദേവസ്വം ബോര്ഡ് നിലപാട് പന്തളം കൊട്ടാരം നിര്വാഹകസമിതി അധ്യക്ഷന് ശശികുമാരവര്മ തള്ളിയിരുന്നു. ഉടമ്ബടിപ്രകാരം ക്ഷേത്രം അടച്ചിടാന് അധികാരമുണ്ടെന്നായിരുന്നു ശശികുമാരവര്മയുടെ വാദം. സംശയമുള്ളവര്ക്കു പഴയ ഉടമ്ബടി പരിശോധിക്കാമെന്നും ക്ഷേത്രാചാരങ്ങള്ക്കു ഭംഗം വന്നാല് തന്ത്രിക്ക് എടുക്കാവുന്ന ഏറ്റവും നല്ല തീരുമാനം ക്ഷേത്രം അടച്ചിടുകയാണെന്നും അദ്ദേഹം പറഞ്ഞിരുന്നു.
https://www.facebook.com/Malayalivartha
