ശബരിമല യുവതി പ്രവശനത്തെ എതിർത്തുള്ള സംഘർഷങ്ങളിലും അക്രമങ്ങളിലും പങ്കാളിയായവർക്കെതിരെ പോലീസ് മുറുക്കുന്നത് അഴിയാക്കുരുക്കാണ്. സംഘർഷത്തിൽ ജാമ്യത്തിന് കെട്ടിവയ്‌ക്കേണ്ടത് 13 ലക്ഷം വരെയാണ്. ബിജെപിയുടെയും മറ്റ് സംഘടനകളുടെയും നേതൃത്വത്തിൽ അക്രമണത്തിൽ പൊലീസ് വാഹനങ്ങളും കെഎസ്ആർടിസി ബസുകളും തകർത്ത കേസിൽ അറസ്റ്റിലായവർക്ക് ജാമ്യം ലഭിക്കണമെങ്കിൽ പതിനായിരം രൂപ മുതൽ 13 ലക്ഷം വരെയാണ് കെട്ടിവയ്‌ക്കേണ്ടത്. നിലയ്ക്കലിൽ സന്നിധാനം സ്‌പെഷ്യൽ ഓഫീസറായ എസ്പി അജിത്തിൻറെ വാഹനം കൊക്കയിലിട്ടവർക്കാണ് 13 ലക്ഷം കെട്ടിവയ്‌ക്കേണ്ടത്. ആകെ ഒൻപത് പ്രതികളാണ് ഇതിൽ ഉള്ളത്.

നിലയ്ക്കൽ സംഘർഷങ്ങളിൽ പൊലീസിൻറെയും സർക്കാരിൻറെയും മാധ്യമങ്ങളുടെയും വാഹനങ്ങൾ വ്യാപകമായി തകർക്കപ്പെട്ടിരുന്നു. ഇവരും എട്ടും ഒൻപതും ലക്ഷം രൂപ കെട്ടിവയ്‌ക്കേണ്ടി വരും. കോടതിയാണ് ഇവരുടെ ജാമ്യത്തുക നിശ്ചയിക്കുക.

വിവിധ സംഘർഷങ്ങളിലായി അറസ്റ്റിലായവരുടെയെണ്ണം രണ്ടായിരത്തി അറുപത്തി ഒന്നായി. ശബരിമല സംഘര്ഷങ്ങളിൽ പ്രതികളുടെ സംസ്ഥാന വ്യാപക അറസ്റ്റ് മൂന്നാം ദിനവും തുടരുകയാണ്. ഇന്നലെ ഒറ്റ രാത്രി കൊണ്ട് വിവിധ ജില്ലകളിലായി എഴുന്നൂറിലേറെപ്പേരെ അറസ്റ്റ് ചെയ്തു. ഇതോടെ 452 കേസുകളിലായി അറസ്റ്റിലായവരുടെയെണ്ണം 2061 ആയി. ഇനിയും ആയിരത്തിലേറെ പ്പേരെ കണ്ടെത്താനായി ജില്ലാ തലത്തിൽ പ്രത്യേക സംഘം തിരച്ചിൽ തുടരുകയാണ്. അറസ്റ്റ് തുടരുമെന്നും യുവതി പ്രവശ നടപ്പാക്കാനുള്ള സുരക്ഷാ ക്രമീകരണങ്ങളുമായി മുന്നോട് പോകുമെന്നും ഡി.ജി.പി വ്യക്തമാക്കി.

അറസ്റ്റിലായതിൽ 1500 ഓളം പേർക്ക് സ്റ്റേഷനിൽ നിന്ന് ജാമ്യം ലഭിച്ചു. എന്നാൽ നിലയ്ക്കൽ സംഘർഷങ്ങളിലും വിവിധയിടങ്ങളിൽ വാഹനം നശിപ്പിച്ചവർക്കും കോടതി വഴിയാണ് നടപടികൾ. ഇത്തരത്തിലുള്ളവർക്കാണ് ജാമ്യം ലഭിക്കാനായി പതിനായിരം മുതൽ ലക്ഷങ്ങൾ വരെ ജാമ്യത്തുക അടയ്‌ക്കേണ്ടി വരിക. മുന്നൂറിലേറെപ്പേറെ റിമാൻഡ് ചെയ്തു.