കൊട്ടാരക്കര ടിപ്പര് അപകടത്തിന്റെ കാരണം അമിതവേഗതയെന്ന് എഫ്ഐആര്
കൊട്ടാരക്കര ടിപ്പര് അപകടത്തിന്റെ കാരണം അമിതവേഗതയെന്ന് ചൂണ്ടിക്കാട്ടി ഡ്രൈവറെ പ്രതിയാക്കി മനഃപൂര്വമല്ലാത്ത നരഹത്യ കുറ്റം ചുമത്തി കേസെടുത്തു. ബോധപൂര്വം അലക്ഷ്യമായി വാഹനമോടിക്കല്, അലക്ഷ്യമായി വാഹനമോടിച്ചു അപകടമുണ്ടാക്കല് തുടങ്ങിയ വകുപ്പും ചുമത്തി. കൊട്ടാരക്കര നീലേശ്വരം മുക്കോണി മുക്കില് രാവിലെ 7 മണിക്കായിരുന്നു അപകടം. വിദ്യാര്ഥികള് അടക്കം എട്ടിലധികം പേര് ബസ് സ്റ്റോപ്പില് ഉണ്ടായിരുന്നു. മണ്ണുമായി അമിതവേഗതയില് വന്ന ലോറിയാണ് വിദ്യാര്ഥികള്ക്ക് മേലേക്ക് ഇടിച്ചുകയറിയത്.
മൂന്നു പേരെ മരിച്ച നിലയിലാണ് കൊട്ടാരക്കര താലൂക്ക് ആശുപത്രിയില് എത്തിച്ചത്. കുടവട്ടൂര് സ്വദേശിയായ ഹരിലാല്, ഓയൂര് കാര്മല് സ്കൂളിലെ പത്താം ക്ലാസ് വിദ്യാര്ഥി പാര്ത്ഥിപ്, നീലേശ്വരം മുക്കോണിമുക്ക് സ്വദേശി അജയകുമാര് എന്നിവരാണ് മരിച്ചത്. അപകടത്തില് സാരമായി പരിക്കേറ്റവരെ തിരുവനന്തപുരം മെഡിക്കല് കോളജിലേക്ക് കൊണ്ടുപോയി.
ഇറക്കവും വളവും കൂടി വരുന്ന ഭാഗത്തായാണ് അപകടമുണ്ടായത്. അളവില് കൂടുതല് മണ്ണുകയറ്റിയ ലോറി അമിതവേഗത്തില് എത്തിയതാണ് അപകടത്തിന് കാരണമായതെന്ന് നാട്ടുകാര് പറഞ്ഞു. ടിപ്പര് ലോറിയുടെ ഡ്രൈവര് നിസാമിന് വാഹനം ഓടിക്കാനുള്ള ഹെവി ലൈസന്സ് ഇല്ലെന്നും ടിപ്പറിന്റെ ജിപിഎസ് കട്ട് ചെയ്തത നിലയിലായിരുന്നുവെന്നും കൊട്ടാരക്കര എന്ഫോഴ്സ്മെന്റ് ആര്ടിഒ ദിലു പറഞ്ഞു.
https://www.facebook.com/Malayalivartha
