അയോധ്യ മോഡല് രഥയാത്രക്കൊരുങ്ങി ബി.ജെ.പി; ശ്രീധരന് പിള്ളയും, തുഷാര് വെള്ളാപ്പള്ളിയും ചേര്ന്നു നയിക്കുന്ന യാത്ര കാസര്ഗോഡ് മധൂര് ഗണപതി ക്ഷേത്രത്തില് നിന്നും പമ്പയിലേക്കാണ്
അയോധ്യ മോഡല് രഥയാത്രക്കൊരുങ്ങി ബി.ജെ.പി സോമനാഥ ക്ഷേത്രത്തില് നിന്നും അയോധ്യയിലേക്ക് എല്.കെ. അദ്വാനി നടത്തിയ രഥയാത്രയ്ക്കു സമാനമായി കേരളത്തിലും രഥയാത്രയുമായി ബി.ജെ.പി. പി.എസ്. ശ്രീധരന് പിള്ളയും, തുഷാര് വെള്ളാപ്പള്ളിയും ചേര്ന്നു നയിക്കുന്ന യാത്ര കാസര്ഗോഡ് മധൂര് ഗണപതി ക്ഷേത്രത്തില് നിന്നും പമ്പയിലേക്കാണ്. നവംബര് എട്ടാം തീയതി മുതല് 12-ാം തീയതി വരെയാണ് രഥയാത്ര.
ടിപ്പു സുല്ത്താന് ആക്രമിച്ചു തകര്ത്ത ക്ഷേത്രമാണ് മധൂര് ഗണപതി ക്ഷേത്രം. ടിപ്പു തകര്ത്ത ക്ഷേത്രത്തില് നിന്നും പിണറായി വിജയന് ആചാരങ്ങള് തകര്ക്കാന് നോക്കുന്ന ശബരിമല ക്ഷേത്രത്തിലേക്കാണ് ഈ യാത്രയെന്ന് ബി.ജെ.പി. പ്രസിഡന്റ് പി.എസ്. ശ്രീധരന് പിള്ള പറയുന്നു.
യാത്രയില് ഞങ്ങളോടൊപ്പം ചേരുന്ന വിശ്വാസി സമൂഹത്തെ കള്ളക്കേസില് കുടുക്കാന് ശ്രമിച്ചാല് രാഷ്ട്രീയമായി തിരിച്ചടിക്കുമെന്നു നേതാക്കള് പറയുന്നു. പതിനായിരങ്ങളെ അണിനിരത്തി നീങ്ങുന്ന യാത്രയില് വിശ്വാസികളുടെ വന് പങ്കാളിത്തമാണ് ബി.ജെ.പി പ്രതീക്ഷിക്കുന്നത്. ഓരോ ജില്ലയിലും ഇതിനായി പ്രതേ്യക ജാഥാ ടീമിനെ നിശ്ചയിക്കും. അഖിലേന്ത്യാ നേതാക്കളും, മറ്റു സംസ്ഥാനങ്ങളിലെ മുഖ്യമന്ത്രിമാരെയുമുള്പ്പെടുത്തി വിപുലമായ പദ്ധതിയാണ് ഇതിനായി അണിയറയിലൊരുങ്ങുന്നത്. യാത്ര സംബന്ധിച്ച വിവരങ്ങള് ബി.ജെ.പി പ്രസിഡന്റ് അമിത് ഷായുമായി പി.എസ്. ശ്രീധരന്പിള്ള ഇന്നു ചര്ച്ച നടത്തും.
രഥയാത്ര കേരളത്തില് അത്ര പതിവുള്ളതല്ല. കാസര്ഗോഡു നിന്ന് തിരിച്ച് എല്ലാ പ്രധാന നഗരങ്ങളിലുമെത്തുമ്പോള് ഹിന്ദു നേതാക്കളും, ഹൈന്ദവ സംഘടനാ പ്രതിനിധികളും പങ്കെടുക്കുന്ന വിപുലമായ യോഗങ്ങളുമുണ്ട്. പ്രധാന അമ്പലങ്ങളില് നിന്ന് ലഭിക്കുന്ന പ്രസാദമുള്പ്പെടെ സ്വീകരിച്ച് ഭക്തി സാന്ദ്രമായാണ് രഥയാത്ര. വിശ്വാസി സമൂഹത്തെ ഉണര്ത്താനുദ്ദേശിച്ചുള്ള ഈ രഥയാത്ര അഖിലേന്ത്യാ തലത്തില് തന്നെ ചര്ച്ചയാകും എന്നാണ് കരുതുന്നത്. യാത്രക്കുനേരെ സര്ക്കാര് പോലീസിനെ ഉപയോഗിച്ചാല് വലിയ തിരിച്ചടി തന്നെ കൊടുക്കണമെന്നാണ് ഉന്നതതല തീരുമാനം. രഥയാത്രാ വിവരങ്ങള് രണ്ടു ദിവസത്തിനകം ഔദേ്യാഗികമായി പ്രഖ്യാപിക്കാനാണ് പാര്ട്ടി തീരുമാനം.
https://www.facebook.com/Malayalivartha
