സ്‌കൂള്‍ വാഹനങ്ങളില്‍ ജി.പി.എസ് ഘടിപ്പിക്കാന്‍ അനുവദിച്ച സമയപരിധി ബുധനാഴ്ച അവസാനിക്കും. നവംബര്‍ ഒന്നുമുതല്‍ ജി.പി.എസ് ഇല്ലാത്ത സ്‌കൂള്‍ വാഹനങ്ങള്‍ ഓടാന്‍ അനുവദിക്കില്ലെന്നാണ് മോട്ടോര്‍ വാഹന വകുപ്പ് ഉത്തരവ്. ഒക്‌ടോബര്‍ ഒന്നിനുമുമ്പ് ഇത് ഘടിപ്പിക്കണമെന്ന ഉത്തരവ് പ്രളയവും അതു സൃഷ്ടിച്ച സാമ്പത്തികമാന്ദ്യവും കണക്കിലെടുത്ത് ഒരുമാസത്തേക്ക് നീട്ടുകയായിരുന്നു. വാഹനങ്ങളുടെ ദിശയും വേഗവും സമയവും നിരീക്ഷിക്കുകയാണ് ജി.പി.എസിലൂടെ ലക്ഷ്യമിടുന്നത്.

സിഡാക്കുമായി ചേര്‍ന്ന് നടപ്പാക്കുന്ന സംവിധാനത്തിന്റെ കേന്ദ്രീകൃത കണ്‍ട്രോള്‍ റൂം ഗതാഗത കമീഷണറേറ്റിലാവും. ട്രാന്‍സ്‌പോര്‍ട്ട് കമീഷണറേറ്റിലും ആര്‍.ടി ഓഫിസുകളിലും സ്ഥാപിച്ച കണ്‍ട്രോള്‍ റൂമുകളില്‍ വാഹന വിവരങ്ങള്‍ അറിയാനാവും. വഴിയില്‍ കിടന്നാലും അപകടത്തില്‍പ്പെട്ടാലും അതിനകത്ത് നടക്കുന്ന സംഭവങ്ങളും അടക്കം എല്ലാം അറിയാം.

നിരീക്ഷണത്തിനും സോഫ്റ്റ്‌വെയറിനും അനുയോജ്യമായ വെഹിക്കിള്‍ ട്രാക്കിങ് യൂനിറ്റാണ് ഘടിപ്പിക്കുക. ഇതിനായി 12 സ്ഥാപനങ്ങളെ ചുമതലപ്പെടുത്തി. വാഹനങ്ങളുടെ അസ്വഭാവിക ചലനങ്ങള്‍ കണ്‍ട്രോള്‍ റൂമില്‍ അറിയുന്ന നിമിഷം തന്നെ സ്‌കൂള്‍ അധികൃതരുടെ മൊബൈല്‍ ഫോണില്‍ എസ്.എം.എസ് ആയി സന്ദേശം എത്തും. അടിയന്തര സന്ദേശം കൈമാറാനുള്ള പാനിക് ബട്ടനും വാഹനങ്ങളില്‍ ഉണ്ടാവും. ഇതില്‍ അമര്‍ത്തിയാല്‍ കണ്‍ട്രോള്‍ റൂമിലും പൊലീസിനും സന്ദേശം കിട്ടും.1015 ബസുകളുള്ള സ്‌കൂള്‍ മാനേജ്മന്റെുകള്‍ക്ക് രണ്ടുമുതല്‍ മൂന്നുലക്ഷം രൂപവരെ ജി.പി.എസിനായി മുടക്കേണ്ടിവന്നിട്ടുണ്ട്. കേടായാല്‍ കമ്പനി റിപ്പയര്‍ ചെയ്യും.

15 വര്‍ഷത്തെ സര്‍വിസും ഉറപ്പുനല്‍കുന്നുണ്ടെന്നും മോട്ടോര്‍ വാഹനവകുപ്പ് അറിയിച്ചു. 12 കമ്പനികളില്‍ മൂന്നെണ്ണം കേരളത്തില്‍നിന്നുള്ളതും ഒമ്പതെണ്ണം പുറത്തുള്ളവയുമാണ്. സ്‌കൂള്‍ അധികൃതരെ ആശങ്കപ്പെടുത്തുന്നതും ഇതാണ്. എന്നാല്‍, എല്ലാ സംരക്ഷണവും മോട്ടോര്‍ വാഹന വകുപ്പ് നല്‍കുമെന്നാണ് വിവരം. അടുത്തഘട്ടം സ്വകാര്യ കെ.എസ്.ആര്‍.ടി.സി ബസുകളില്‍ നിര്‍ബന്ധമാക്കാനും മോട്ടോര്‍ വകുപ്പ് തീരുമാനിച്ചിട്ടുണ്ട്.