കേരള സര്‍ക്കാരിനെ വലിച്ച് താഴെയിടുമെന്ന് ഭീഷണി മുഴക്കിയ ബി.ജെ.പി ദേശീയ അധ്യക്ഷന്‍ അമിത് ഷാ ദേശീയ രാഷ്ട്രീയ ഗുണ്ടയാണെന്ന് മന്ത്രി ജി. സുധാകരന്‍. ഷാ കോടതിയേയും ജനാധിപത്യത്തേയും വെല്ലുവിളിക്കുകയാണ്. സര്‍ക്കാരിനെ അട്ടിമറിക്കാന്‍ തടി മാത്രം പോര, മനോബലം കൂടി വേണമെന്നും സുധാകരന്‍ പറഞ്ഞു. 

ശബരിമലയിലെ അയ്യപ്പഭക്തരേയും വിശ്വാസികളേയും അടിച്ചമർത്താനാണ് ഭാവമെങ്കിൽ സർക്കാരിനെ വലിച്ച് താഴെയിടാൻ മടിക്കില്ലെന്ന അമിത് ഷായുടെ പ്രസ്താവനയോട് പ്രതികരിക്കുകയായിരുന്നു അദ്ദേഹം.

അതേസമയം, ശബരിമലയില്‍ നിന്നും അറസ്റ്റ് ചെയ്തത് ക്രിമിനലുകളെയാണെന്നും ബിജെപി തെറ്റിദ്ധാരണ പടര്‍ത്തുന്നുവെന്നും സര്‍ക്കാര്‍ വിശ്വാസികള്‍ക്കൊപ്പമാണെന്നും മുഖ്യമന്ത്രി വ്യക്തമാക്കി. സംഘപരിവാറിന്റെ നേതൃത്വത്തില്‍ ശബരിമലയിലേക്ക് ക്രിമിനലുകളെ റിക്രൂട്ട് ചെയ്യുന്നു. ഇവരാണ് ശബരിമലയില്‍ അക്രമവും തെറിയഭിഷേകവും നടത്തിയത്. എന്നാല്‍, പൊലീസ് അറ്സറ്റ് ചെയ്തത് വിശ്വാസികളെയാണെന്ന് ചില മാധ്യമങ്ങള്‍ വരുത്തിത്തീര്‍ക്കാന്‍ ശ്രമിച്ചു. അറസ്റ്റ് ചെയ്തത് ക്രിമിനല്‍ സംഘത്തെയാണെന്നും മുഖ്യമന്ത്രി പറഞ്ഞു.

രാജ്യം ഭരിക്കുന്ന പാര്‍ട്ടിയുടെ അധ്യക്ഷന്‍ പറയുന്ന കാര്യങ്ങള്‍ വസ്തുതാപരമായിരിക്കണം. അദ്ദേഹം പറയുന്ന കാര്യങ്ങള്‍ അദ്ദേഹത്തിന് തന്നെ അറിയില്ല. ശബരിമല വിഷയത്തില്‍ ബിജെപി കുപ്രചാരണം നടത്തുന്നു. അമിത്ഷായുടെ വാക്ക് കേട്ട് ആര്‍എസ്എസുകാര്‍ കളിക്കാന്‍ വന്നാല്‍ അത് വല്ലാത്ത കളിയാകും. മുഖ്യമന്ത്രി കൂട്ടിച്ചേര്‍ത്തു.

അമിത് ഷായുടെ വാക്കുകൾക്ക് എതിരെ വ്യാപക പ്രതിഷേധം ഉയര്ന്നു കഴിഞ്ഞു പ്രിയങ്ക ഗാന്ധി, മായാവതി ഉൾപ്പടെയുള്ളവർ രംഗത്തു വന്നിട്ടുണ്ട്.