സംസ്ഥാനത്ത് ആട്ടോ ടാക്‌സി നിരക്ക് ഒരു മാസത്തിനകം കൂട്ടും. ജസ്റ്റിസ് രാമചന്ദ്രന്‍ കമ്മിഷന്‍ റിപ്പോര്‍ട്ടിന്റെ അടിസ്ഥാനത്തിലാകും വര്‍ദ്ധന. റിപ്പോര്‍ട്ട് വൈകാതെ സമര്‍പ്പിക്കുമെന്ന് സൂചനയുണ്ട്. ഇത് കിട്ടിയാല്‍ അടുത്തമാസത്തോടെ നിരക്ക് വര്‍ദ്ധിപ്പിക്കാനുള്ള തീരുമാനം സര്‍ക്കാര്‍ തലത്തില്‍ കൈക്കൊള്ളും. ഇന്ധനവില വര്‍ദ്ധനയെ തുടര്‍ന്ന് നിരക്ക് വര്‍ദ്ധന വേണമെന്ന് ഈ മേഖലയിലെ തൊഴിലാളി സംഘടനകള്‍ ആവശ്യപ്പെട്ട് വരികയാണ്.
ആട്ടോറിക്ഷയുടെ മിനിമം ചാര്‍ജ് നിലവിലുള്ള 20 രൂപയില്‍ നിന്ന് 25 ആക്കുമെന്നാണ് സൂചന. ടാക്‌സിയുടേത് 150ല്‍ നിന്ന് 250 രൂപ ആക്കിയേക്കും. ആദ്യത്തെ ഒന്നര കിലോമീറ്റര്‍ കഴിഞ്ഞാല്‍ ആട്ടോയ്ക്ക് കിലോമീറ്ററിന് 10 രൂപ എന്നുള്ളത് 13 രൂപയാക്കാനാണ് നീക്കം. മിനിമം ചാര്‍ജ് 30 രൂപയും അതിനുശേഷമുള്ള കിലോമീറ്ററിന് 15 രൂപയും വേണമെന്നാണ് ട്രേഡ് യൂണിയനുകള്‍ ആവശ്യപ്പെടുന്നത്. ടാക്‌സിക്ക് ആദ്യ 5 കിലോമീറ്ററിന് ശേഷം 25 രൂപയാക്കണം എന്നാണ് സംഘടനകളുടെ ആവശ്യം. എന്നാല്‍, ഇത് 20 രൂപയായി വര്‍ദ്ധിപ്പിക്കുമെന്നാണ് സൂചന
നാലു വര്‍ഷം മുമ്പാണ് ആട്ടോ ടാക്‌സി ചാര്‍ജ് പുതുക്കിയത്. അന്ന് പെട്രോളിന് കിലോമീറ്രറിന് 68 രൂപയായിരുന്നു വില. ഇപ്പോള്‍ അത് 86 രൂപയായി. അതേസമയം ഈ വര്‍ഷം മാര്‍ച്ചില്‍ ബസ് ചാര്‍ജ് വര്‍ദ്ധിപ്പിച്ചിരുന്നു. എന്നാല്‍ ഡീസല്‍ വില വര്‍ദ്ധനയുടെ പശ്ചാത്തലത്തില്‍ ബസ് ചാര്‍ജ് വീണ്ടും വര്‍ദ്ധിപ്പിക്കണമെന്ന് ബസുടമകള്‍ ആവശ്യപ്പെട്ടിട്ടുണ്ട്.
കഴിഞ്ഞ ദിവസം ഗതാഗത മന്ത്രി എ.കെ. ശശീന്ദ്രനുമായി നടത്തിയ ചര്‍ച്ചയില്‍ സ്വകാര്യ ബസുടമകളുടെ സംഘടനകള്‍ നവംബറില്‍ നടത്താനിരുന്ന അനിശ്ചിതകാല സമരം പിന്‍വലിച്ചിരുന്നു. ആവശ്യങ്ങള്‍ അനുഭാവപൂര്‍വം പരിഗണിക്കാമെന്ന് മന്ത്രി ഉറപ്പ് നല്‍കിയതിനെ തുടര്‍ന്നാണിത്. ചാര്‍ജ് വര്‍ദ്ധന ഉള്‍പ്പെടെയുള്ള കാര്യങ്ങളെക്കുറിച്ച് പഠിക്കാന്‍ ജസ്റ്റിസ് രാമചന്ദ്രന്‍ കമ്മിഷനെ നിയോഗിക്കാനും തീരുമാനമായിരുന്നു.