ശബരിമല വിഷയത്തില്‍ സി.പി.എമ്മിനും സര്‍ക്കാരിനുമെതിരെ വാളോങ്ങിയ ബി.ഡി.ജെ.എസ് നേതാവ് തുഷാര്‍ വെള്ളാപ്പള്ളിയെ തളയ്ക്കുന്നു. ഇതിന്റെ ആദ്യ പടിയായി തുഷാറിനെതിരെ ഗുരുവായൂര്‍ ദേവസ്വം വിജിലന്‍സ് കുറ്റപത്രം സമര്‍പ്പിച്ചു. യു.ഡി.എഫ് സര്‍ക്കാരിന്റെ കാലത്ത് ദേവസ്വം മെമ്പറായിരുന്ന തുഷാറും പ്രസിഡന്റായിരുന്ന ടി.വി ചന്ദ്രമോഹനും ഇല്ലാത്ത തസ്തിക ഉണ്ടാക്കി നിയമനം നടത്തിയെന്നാണ് കുറ്റപത്രം.

ഉയര്‍ന്ന ശമ്പളമുള്ള രണ്ട് തസ്തികകളാണ് ഇവര്‍ സൃഷ്ടിച്ചത്. ക്രമവിരുദ്ധമായി നിയമനം നടത്തുകയും ചെയ്തു. ശബരിമല വിഷയത്തില്‍ എസ്.എന്‍.ഡി.പി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍ സര്‍്ക്കാരിന് അനുകൂലമായ നിലപാട് സ്വീകരിക്കുമ്പോഴും യോഗത്തിന്റെ വൈസ് പ്രസിഡന്റായ തുഷാര്‍ സര്‍ക്കാര്‍ വിരുദ്ധനിലപാടുമായി, ബി.ജെ.പിക്കൊപ്പം ചേര്‍ന്ന് പ്രവര്‍ത്തിക്കുകയാണ്. 

തുഷാറിനെയും ചന്ദ്രമോഹനെയും പ്രോസിക്യൂട്ട് ചെയ്യാനുള്ള അനുമതി ദേവസ്വം വിജിലന്‍സ് തേടിയിരിക്കുകയാണ്. കഴിഞ്ഞ ഭരണസമിതിയുടെ കാലത്ത് രഞ്ജിത്ത്, രാജു എന്നിവരെയാണ് ക്രമവിരുദ്ധമായി നിയമിച്ചത്. കൊടുങ്ങല്ലൂര്‍ സ്വദേശിയാണ് നിയമനത്തിനെതിരെ പരാതി നല്‍കിയത്. ഇതിന്റെ അന്വേഷണം വേഗം പൂര്‍ത്തിയാക്കി കുറ്റപത്രം സമര്‍പ്പിച്ചത് സര്‍ക്കാരിന്റെയും പാര്‍ട്ടിയുടെയും ഇടപെടല്‍ ഉണ്ടെന്ന് വ്യക്തമാണ്. ശബരിമലയില്‍ മണ്ഡലമാസ പൂജകള്‍ക്ക് നടതുറക്കും മുമ്പ് തുഷാറിനെ വരച്ചവരയില്‍ നിര്‍ത്തുകയാണ് ലക്ഷ്യം. വെള്ളാപ്പള്ളി നടേശന്‍ പ്രശ്‌നത്തില്‍ ഇടപെടുമെന്ന് സൂചനയുണ്ട്.