രാജ്യത്ത് വലിയ വെല്ലുവിളിയാണ് ഇടതുപക്ഷം നേരിടുന്നതെന്ന് സിപിഐ സംഘടനാരേഖ. പാര്‍ട്ടി കോണ്‍ഗ്രസില്‍ ചര്‍ച്ച ചെയ്യാന്‍ തയാറാക്കിയ കരട് രേഖയിലാണ് ഇക്കാര്യം പറയുന്നു.
തിരഞ്ഞെടുപ്പുകളിലുണ്ടായ തുടര്‍ച്ചയായ തിരിച്ചടികള്‍ പ്രതിസന്ധി വ്യക്തമാക്കുന്നു. പാര്‍ട്ടിയിലാണെങ്കില്‍ പഴയ ഉത്സാഹമോ ആത്മവിശ്വാസമോ ഇല്ല. അത്യന്തം ആശങ്കയുളവാക്കുന്നതാണ് ഈ മാറ്റം. പക്ഷേ, യാഥാര്‍ഥ്യത്തെ അഭിമുഖീകരിച്ചേ പറ്റൂ. പാര്‍ട്ടി കോണ്‍ഗ്രസിലെ ചര്‍ച്ചകള്‍ക്കായി സെപ്തംബറില്‍ ചേര്‍ന്ന സിപിഐ ദേശീയ കൗണ്‍സില്‍ തയാറാക്കിയ രേഖയിലാണ് ഈ പരാമര്‍ശങ്ങള്‍.
തിരിച്ചടികള്‍ക്ക് താഴെത്തട്ടു മുതലുള്ള പാര്‍ലമെന്ററി വ്യാമോഹവും കാരണമായെന്നും രേഖ വ്യക്തമാക്കുന്നു. ദേശീയതലത്തില്‍ സിപിഎമ്മിനു പുറമെ ആര്‍എസ്പിയും ഫോര്‍വേഡ് ബ്ലോക്കുമായുള്ള ബന്ധം ശക്തിപ്പെടുത്തണം. തിരഞ്ഞെടുപ്പു പരാജയങ്ങള്‍ പാര്‍ട്ടിയുടെ അടിത്തറയെത്തന്നെ ബാധിച്ചതായും ഇടതുപ്രസ്ഥാനങ്ങളുടെ മുരടിപ്പും തകര്‍ച്ചയും നേരത്തെ തുടങ്ങിയെങ്കിലും അതിന്റെ ശക്തമായ പ്രതിഫലനമായിരുന്നു കഴിഞ്ഞ പൊതുതിരഞ്ഞെടുപ്പിലുണ്ടായത്. ആ പ്രതിഭാസം തുടരുകയാണെന്നും രേഖ പറയുന്നു.
ആഴത്തിലുള്ള ആത്മപരിശോധനയും രാഷ്ട്രീയ നയങ്ങളിലുള്ള പുനരവലോകനവുമാണ് സിപിഐ ലക്ഷ്യമിടുന്നത്. രാഷ്ട്രീയ അടവുനയം പുനഃപരിശോധിക്കാനുള്ള സിപിഎം തീരുമാനത്തിന് സമാന്തരമായാണ് സിപിഐയുടെ നീക്കമെന്നതും ശ്രദ്ധേയമാണ്. പശ്ചിമബംഗാളിലെ ഭരണനഷ്ടം പാര്‍ട്ടി അണികളുടെ മാത്രമല്ല, ഇടതുപക്ഷത്തെ പിന്‍തുണക്കുന്ന ജനവിഭാഗങ്ങളുടേയും ആത്മവിശ്വാസം ചോര്‍ത്തിയെന്ന് രേഖ തുറന്നുസമ്മതിക്കുന്നു. മോദിയുടെ നേതൃത്വത്തില്‍ ബിജെപിക്ക് ഒറ്റയ്ക്ക് ഭൂരിപക്ഷം കിട്ടിയ സാഹചര്യത്തില്‍ കടുംപിടുത്തങ്ങളില്ലാത്ത രാഷ്ട്രീയ അടവുകള്‍ അനിവാര്യമാണ്. കമ്യൂണിസ്റ്റ് പാര്‍ട്ടികള്‍ തമ്മിലുള്ള ഐക്യവും ശക്തിപ്പെടുത്തണം. മധ്യവര്‍ഗത്തിന്റെ അകല്‍ച്ച മാറ്റാന്‍ പ്രത്യേക ശ്രദ്ധ വേണം. ഇതൊക്കെയാണെങ്കിലും ഗ്രാമപ്രദേശങ്ങളില്‍ മറ്റ് ഇടതുപക്ഷ പ്രസ്ഥാനങ്ങളേക്കാള്‍ സ്വീകാര്യത സിപിഐക്കുണ്ടെന്നും രേഖ അവകാശപ്പെടുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha