കേരള സര്‍വകലാശാല അസിസ്റ്റന്റ് ഗ്രേഡ് നിയമന തട്ടിപ്പ് കേസില്‍ മുന്‍ വൈസ് ചാന്‍സലറെയും പ്രോ വൈസ് ചാലന്‍സലറെയും പ്രോസിക്യൂട്ട് ചെയ്യാന്‍ സര്‍ക്കാര്‍ നടപടി തുടങ്ങി. ഗര്‍ണറുടെ നിര്‍ദ്ദേശത്തെ തുടര്‍ന്നാണ് നടപടി. മുന്‍ വി.സിയെയും പ്രോ വി.സിയെയും പ്രോസിക്യൂട്ട് ചെയ്യാന്‍ അനുമതി വേണ്ടെന്ന് കഴിഞ്ഞ ദിവസം ഗവര്‍ണര്‍ പി.സദാശിവം സര്‍ക്കാരിനെ അറിയിച്ചിരുന്നു. ഇതിന്റെ അടിസ്ഥാനത്തിലാണ് ഇവരെ പ്രോസിക്യൂട്ട് ചെയ്യാന്‍ ആഭ്യന്തര വകുപ്പ് പുതിയ വിജ്ഞാപനത്തിന് നിര്‍ദ്ദേശം നല്‍കിയത്.
വി.സിയെയും പ്രോ വി.സിയെയും കൂടാതെ അന്ന് സര്‍വകലാശാലാ രജിസ്ട്രാറും പിന്നീട് എസ്.സി.ഇ.ആര്‍.ടി ഡയറക്ടറുമായ കെ.എ. ഹാഷിം, മുന്‍ സിന്‍ഡിക്കേറ്റ് അംഗങ്ങളായ എ.എ. റഷീദ്, ബി.എസ്. രാജീവ്, എം.പി. റസ്സല്‍, കെ.എ. ആന്‍ഡ്രു എന്നിവരെയും പ്രോസിക്യൂട്ട് ചെയ്യും. സര്‍വകലാശാലയില്‍ 2008 മേയില്‍ നാല്പതിനായിരത്തോളം പേര്‍ എഴുതിയ അസിസ്റ്റന്റ് ഗ്രേഡ് നിയമന പരീക്ഷയുടെ ഉത്തരക്കടലാസ് നശിപ്പിച്ചശേഷം റാങ്ക്പട്ടിക അട്ടിമറിച്ച് രാഷ്ട്രീയക്കാരുടെയും ഉന്നതോദ്യോഗസ്ഥരുടെയും അടുപ്പക്കാര്‍ക്കും ബന്ധുക്കള്‍ക്കും നിയമനം നല്‍കിയെന്നാണ് കേസ്. എഴുത്തുപരീക്ഷയുടെ മാര്‍ക്ക് നൂറില്‍ നിന്ന് 75 ആക്കിയശേഷം ഇന്റര്‍വ്യൂവിന് കൂടുതല്‍ മാര്‍ക്ക് നല്‍കിയാണ് ഇഷ്ടക്കാരെ തിരുകിക്കയറ്റിയത്. അസിസ്റ്റന്റ് നിയമന കേസ് പരിഗണിച്ച രണ്ട് ലോകായുക്ത ജസ്റ്റിസുമാരും ഇതിലെ ഗൂഢാലോചനയും റാങ്ക് പട്ടിക അട്ടിമറിക്കലും ക്രൈംബ്രാഞ്ച് അന്വേഷിക്കണമെന്ന് നിര്‍ദ്ദേശിച്ചിരുന്നു. കൂടാതെ ഹൈക്കോടതി നിയോഗിച്ച ജസ്റ്റിസ് നരേന്ദ്രന്‍ കമ്മിഷനും ഗൂഢാലോചന ക്രൈംബ്രാഞ്ച് അന്വേഷിക്കണമെന്നാണ് ശുപാര്‍ശ നല്‍കിയത്. ലോകായുക്ത വിധിക്കെതിരെ നല്‍കിയ അപ്പീലില്‍ ക്രൈംബ്രാഞ്ച് അന്വേഷണം ഹൈക്കോടതി സ്‌റ്റേ ചെയ്തതുമില്ല. സിന്‍ഡിക്കേറ്റ് അംഗങ്ങളില്‍ ആദ്യ മൂന്ന് പേരും സി.പി.എം നേതാക്കളാണ്.