ബന്ധുനിയമന വിവാദം പിണറായി സര്‍ക്കാരിന് വീണ്ടും തലവേദനയാകുന്നു. മന്ത്രി ഇ.പി ജയരാജന് പിന്നാലെ മന്ത്രി കെ.ടി ജലീലും ബന്ധുനിയമനക്കുരുക്കില്‍. യൂത്ത് ലീഗും യൂത്ത് കോണ്‍ഗ്രസും പ്രശ്‌നം ശക്തമാക്കുന്നു. യോഗ്യതയുള്ള പൊതുമേഖലാ ജീവനക്കാരനെ ഒഴിവാക്കിയാണ് കെ.ടി ജലീല്‍ തന്റെ ബന്ധു കെ.ടി അബീദിനെ ന്യൂനപക്ഷവികസന ധനകാര്യ കോര്‍പ്പറേഷന്റെ ജനറല്‍മാനേജരായി നിയമിച്ചതിന്റെ തെളിവുകള്‍ പുറത്ത് വന്നതോടെ എങ്ങനെ നേരിടണമെന്ന് മുന്നണിക്കുള്ളില്‍ ആശയക്കുഴപ്പമുണ്ട്. ശബരിമല വിഷയം നടക്കുന്നതിനാല്‍ ജലീലിന്റെ വഴിവിട്ട നിയമനത്തിന് വേണ്ടത്ര മാധ്യമശ്രദ്ധ ലഭിക്കുന്നില്ല.

എന്നാല്‍ ഇന്ന് ശബരിമല പ്രശ്‌നം അവസാനിക്കും നാളെ മുതല്‍ വിഷയം പ്രതിപക്ഷം രാഷ്ട്രീയ ആയുധമാക്കും. മുഖ്യമന്ത്രി നിലപാട് വ്യക്തമാക്കണമെന്ന് മുസ്്‌ലിംലീഗ് ദേശീയ ജനറല്‍ സെക്രട്ടറി പി.കെ കുഞ്ഞാലിക്കുട്ടിയും ആവശ്യപ്പെട്ടിട്ടുണ്ട്. സംസ്ഥാന ഹജ് കമ്മിറ്റി ഓഫീസില്‍ മന്ത്രി കെ.ടി ജലീലിന്റെ നിര്‍ദ്ദേശപ്രകാരം ഒരാളെ നിയമിച്ചിട്ടുണ്ട്. നിലമ്പൂര്‍ പഞ്ചായത്ത് മുന്‍ അംഗമായ യുവതിയെയാണ് നിയമിച്ചത്. ഓഫീസിലെ ഒഴിവുകളില്‍ സര്‍ക്കാര്‍ ജീവനക്കാരെ ഡെപ്യൂട്ടേഷനില്‍ നിയമിക്കുകയാണ് പതിവ്. അത് ലംഘിച്ചാണ് നിയമനം നടത്തിയത്. കെ.ടി അദീബ് വെല്‍ഫെയര്‍ പാര്‍ട്ടി മുക്കിലപീടിക യൂണിറ്റ് പ്രസിഡന്റ് പ്രൊഫ.കെ.ടി ഹംസയുടെ മകനാണ്. അത് സി.പി.എമ്മിനെയും സര്‍ക്കാരിനെയും വല്ലാതെ കുഴയ്ക്കുന്നുണ്ട്. ലീഗ് ഇത് ആയുധവുമാക്കുന്നു.

മന്ത്രിയുടെ കസേര തെറിക്കും വരെ പ്രതിഷേധ പരിപാടികള്‍ നടത്തുമെന്ന ഉറച്ച നിലപാടിലാണ് യൂത്ത് ലീഗ് സംസ്ഥാന കമ്മിറ്റി. മണ്ഡലം തലങ്ങളില്‍ ചൊവ്വാഴ്ച പ്രതിഷേധപരിപാടികള്‍ നടത്തുകയും ചെയ്തു. ചൊവ്വാഴ്ച തിരുവനന്തപുരത്ത് സെക്രട്ടറിയേറ്റിലേക്കും ജലീലിന്റെ തവനൂര്‍ എടപ്പാളിലെ ഓഫീസിലേക്കും കോഴിക്കോട്ടെ മൈനോറിറ്റി ഡവലപ്‌മെന്റ് ആന്‍ഡ് ഫിനാന്‍സ് കോര്‍പറേഷന്‍ ആസ്ഥാനത്തേക്കും യൂത്ത് ലീഗ് മാര്‍ച്ച് നടത്തി. മുസ്്‌ലിംലീഗ് നേതാവായിരുന്ന കെ.ടി ജലീല്‍ സീറ്റ് നല്‍കാത്തതിനെ തുടര്‍ന്നാണ് പാര്‍ട്ടി വിട്ട് ഇടത് സ്വതന്ത്രനായി ലീഗ് കോട്ടയില്‍ മല്‍സരിച്ച് ജയിച്ചത്. അന്ന് മുതല്‍ തുടങ്ങിയതാണ് ലീഗും ജലീലും തമ്മിലുള്ള പോര്. 

ബന്ധുനിയമന വിഷയത്തില്‍ ഇ.പി ജയരാജനെ സി.പി.എം ആദ്യം പുറത്താക്കിയിരുന്നു. എന്നാല്‍ ആ ജയരാജന്‍ ജലീലിനെ പിന്തുണയ്ക്കുന്ന നിലപാടുമായി ആദ്യം എത്തി. അതിനാല്‍ സി.പി.എം ജലീലിനെ പിന്തുണയ്ക്കുമെന്നാണ് കരുതുന്നത്. വെള്ളിയാഴ്ച സി.പി.എം സംസ്ഥാന സെക്രട്ടറിയേറ്റ് ചേരുന്നുണ്ട്. ഇക്കാര്യം ചര്‍ച്ച ചെയ്യുമെന്നാണ് വിവരം.