കണ്ണൂര്‍ അന്താരാഷ്ട്ര വിമാനത്താവളത്തില്‍ നിന്ന് ഡിസംബര്‍ ഒന്‍പതിന് വാണിജ്യാടിസ്ഥാനത്തില്‍ സര്‍വീസ് നടത്താന്‍ എയര്‍ ഇന്ത്യാ എക്‌സ്പ്രസിന് അനുമതി ലഭിച്ചു. ഡയറക്ടര്‍ ജനറല്‍ ഓഫ് സിവില്‍ ഏവിയേഷനാണ് വെള്ളിയാഴ്ച വൈകീട്ട് ഇതുസംബന്ധിച്ച് വിവരം നല്‍കിയത്. എന്നാല്‍ ഉത്തരവിന്റെ പകര്‍പ്പ് തിങ്കളാഴ്ചയേ എത്തൂവെന്നതിനാല്‍ ബുക്കിങ് അന്നേ തുടങ്ങൂ. കിയാലിന്റെ നിബന്ധനകളും ഡി.ജി.സി.എ.യുടെ ഉത്തരവും പ്രകാരമുള്ള ചാര്‍ജുകള്‍ കണക്കുകൂട്ടി നിരക്ക് നിശ്ചയിക്കലടക്കമുള്ള നടപടികള്‍ പൂര്‍ത്തിയാക്കി തിങ്കളാഴ്ച ഓണ്‍ലൈന്‍ ബുക്കിങ് തുടങ്ങും.
തത്കാലം കണ്ണൂര്‍ വിമാനത്താവളത്തില്‍നിന്ന് സര്‍വീസ് നടത്താന്‍ ഒരു വിമാനമാണ് എയര്‍ ഇന്ത്യാ എക്‌സ്പ്രസ് എത്തിക്കുക. ഇത് തിരുവനന്തപുരത്തുനിന്ന് ഡിസംബര്‍ എട്ടിനാണ് എത്തുക. ആദ്യ സര്‍വീസ് ഒന്‍പതിന് രാവിലെ 10 മണിക്കാണ്. അബുദാബിയിലേക്ക് രാവിലെ 10 മണിക്ക് പുറപ്പെടുന്ന എയര്‍ ഇന്ത്യാ എക്‌സ്പ്രസ് വൈകിട്ട് ഏഴുമണിക്ക് മടങ്ങിയെത്തി 9.05ന് റിയാദിലേക്ക് പോകും. പുലര്‍ച്ചെതന്നെ തിരിച്ചെത്തും.
അബുദാബിയിലേക്ക് നാലുദിവസവും റിയാദിലേക്ക് മൂന്നു ദിവസവുമാണ് സര്‍വീസ് നടത്തുക. ഷാര്‍ജയിലേക്ക് നാലുദിവസവും മസ്‌കറ്റിലേക്ക് മൂന്നുദിവസവും സര്‍വീസുണ്ടാകും. ദോഹയിലേക്കും ആഴ്ചയില്‍ നാല് സര്‍വീസുണ്ടാകും. ദുബായിലേക്ക് തത്കാലം സര്‍വീസുണ്ടാവില്ല.